Ampitomboy ny Fanompoanao Mandritra ny Vanim-potoan’ny Fahatsiarovana
1. Nanjary nanao ahoana ny Israelita natahotra an’Andriamanitra, noho ireo “fotoam-pivavahana voatendrin’i Jehovah”?
1 Nankalaza ny “fotoam-pivavahana voatendrin’i Jehovah” ny Israelita, isan-taona. (Lev. 23:2) Nahafaly azy ireo sy nahatonga azy ho be zotom-po tamin’ny fivavahana madio, ny fisaintsainana momba ny hatsaran’ny Andriamaniny.—2 Tant. 30:21–31:2.
2, 3. Nahoana no mety ny hampitomboantsika ny fanompoantsika mandritra ny vanim-potoan’ny Fahatsiarovana, ary rahoviana no hankalazaina izy io?
2 Mitombo koa ny fanompoana mahafaly ataontsika ho an’Andriamanitra, isan-taona, mandritra ny vanim-potoan’ny Fahatsiarovana. Nanome antsika ny zanany lahitokana i Jehovah, ka fotoana hieritreretana lalina momba izany fanomezana sarobidy izany io vanim-potoana io. (Jaona 3:16; 1 Pet. 1:18, 19) Voatosika hidera an’i Jehovah sy hiezaka hanao ny sitrapony isika, rehefa misaintsaina ny fitiavana nasehon’izy mianaka.—2 Kor. 5:14, 15.
3 Hankalazaina ny alakamisy 24 Martsa aorian’ny filentehan’ny masoandro ny Sakafo Harivan’ny Tompo, amin’ity taona ity. Ahoana no azontsika ampitomboana ny fanompoantsika mandritra ny volana Martsa sy Aprily ary Mey?
4, 5. a) Ahoana no nataon’ny mpitory sasany mba hiresahana ny vaovao tsara tamin’ny olona maro kokoa? b) Inona no hitanao fa mandaitra eto amin’ny faritanintsika?
4 Mitoria amin’ny olona maro kokoa: Mitadiava fomba hitoriana amin’ny olona maro araka izay azo atao, rehefa manompo eny amin’ny saha. Azonao atao ve ny mitory isan-trano amin’ny fotoana hahatratrarana ny ankamaroan’ny olona ao an-tranony, toy ny amin’ny tolakandro na takariva? Raha misy te hitory alohan’ny fianarana boky, dia afaka mandamina fivoriana alohan’ny fanompoana fohy ny mpiandraikitra azy io, mba hiasan’ny mpitory ny faritany eo akaiky eo.
5 Azo atao koa ny mitory eny amin’ny toerana falehan’ny olona. Naniry hanao mpisava lalana mpanampy ny anabavy iray tany Japon, na dia niasa tontolo andro aza. Nanoro hevitra azy ny anti-panahy iray, mba hitory teo amin’ny gara, alohan’ny handehanany miasa isan’andro. Menatra izy tamin’ny voalohany, sady nesoin’ny olona. Tsy kivy anefa izy, ka lasa 40 teo ho eo ny fanaterany gazety, anisan’izany ny mpiasa hamonjy lamasinina sy ny mpiasan’ny gara ary mpivarotra vitsivitsy. Nahapetraka gazety 235 teo ho eo izy isam-bolana. Niresaka hevitra fohy ara-baiboly tamin’ny olona koa izy isan’andro, ka afaka nanomboka fampianarana Baiboly enina.
6. Ahoana no azon’ny tanora ampitomboana ny fanompoany?
6 Fahafahana hitory: Mahazo fotoam-pialan-tsasatra ny mpitory mbola mianatra. Fotoana mety hanaovana mpisava lalana mpanampy angamba ireny. Afaka mampitombo ny fanompoany koa ny tanora kristianina, rehefa mitory any am-pianarana. Mety ho gaga ianao hahita fa tena liana amin’ny zavatra inoanao ny mpiara-mianatra aminao. Nahoana raha hararaotina mba hitoriana, ireny dinidinika an-dakilasy na famoronan-dahatsoratra ireny? Afaka nanao izany ny sasany, ka nampiasa ireo video-ntsika. Nisy afaka nanomboka fampianarana Baiboly tamin’ireo mpiara-mianatra taminy, ary nanampy azy ireny handroso ka hanolo-tena sy hatao batisa. Fomba tsara ‘hiderana ny anaran’i Jehovah’ izany.—Sal. 148:12, 13.
7. a) Inona no nataon’ny rahalahy iray rehefa nisy fahafahana hitory? b) Efa tojo zavatra mitovy amin’izany ve ianao?
7 Mitadiava foana fomba hiresahana momba ilay Andriamanitsika sy ny fikasany mahatalanjona. Mandeha amin’ny zotran-damasinina mitovy foana ny rahalahy iray isan’andro, ka mitory amin’ny mpandeha izy rehefa mety izany. Nitory tamin’ny tovolahy iray nandritra ny dimy minitra isan’andro izy, ohatra, rehefa niandry ny lamasinina manaraka handehanany. Nanaiky hianatra Baiboly ilay tovolahy sy ny namany, vokatr’izany. Natao teny ambony lamasinina ilay fampianarana. Nanatona ilay rahalahy mba hangataka fampianarana Baiboly koa ny ramatoa zokiolona iray, nihaino ny resak’izy ireo. Mianatra Baiboly io ramatoa io, rehefa tafaraka lamasinina amin’ilay rahalahy. Nitarika fampianarana Baiboly folo teny ambony lamasinina ilay rahalahy.
8. Inona no azon’ny be taona sy ny tsy salama atao, mba hampitomboana ny fanompoany?
8 Ahoana raha voafetra ny vitanao noho ny fandrosoan’ny taona na ny aretina? Mety mbola hisy azonao atao ihany mba hampitomboana ny fideranao an’i Jehovah. Efa nanandrana nitory an-taratasy ve ianao? Miresaha amin’ny mpiandraikitra ny fianarana boky, raha mbola tsy hainao tsara izany. Mety hanao fandaharana izy mba hiarahanao amin’ny mpitory efa zatra an’io fomba fitory io. Afaka mifanakalo traikefa sy mifanampy ianareo mba hahitana vokatra. Misy fanoloran-kevitra mandaitra momba ny fitoriana an-taratasy ao amin’ny boky Mandraisa Soa avy Amin’ny Sekolin’ny Fanompoana, pejy 71-73.
9. Ahoana no hanampiantsika ireo mpianatra Baiboly mba hahafenoany fepetra hiara-mitory amin’ny fiangonana?
9 Mety handrisika ny vaovao hampitombo ny fiderany an’i Jehovah ny fanatrehany ny Fahatsiarovana. Mety hiahotra ny ho tonga mpitory izy ireny, nefa azonao ampiana. Itantarao zavatra mampahery hita teny am-pitoriana izy. Ampiofano tsikelikely koa izy, mba hahay hanazava ireo fampianaran’ny Baiboly sy hiaro ny finoany. (1 Pet. 3:15) Miresaha amin’ny mpiandraikitra mpitantan-draharaha, raha te ho tonga mpitory ny vaovao tsara ny mpianatra Baiboly iray. Handamina fiaraha-midinika miaraka amin’ilay mpianatra izy, mba hijerena raha fenony ny fepetra hiaraha-mitory amin’ny fiangonana. Tena faly ny fon’i Jehovah mahita ireo vaovao miandany aminy, amin’ilay raharaha iadian-kevitra eo amin’izao rehetra izao!—Ohab. 27:11.
10. a) Nahoana no manampy antsika hahavita mpisava lalana mpanampy ny fandaharam-potoana tsara? b) Afaka nanao mpisava lalana mpanampy ve ianao tamin’ny herintaona, nandritra ny vanim-potoan’ny Fahatsiarovana? Ahoana no nahavitanao izany?
10 Afaka manao mpisava lalana mpanampy ve ianao? Tena tokony hotratrarina ny 50 ora takina, rehefa manao mpisava lalana mpanampy. (Matio 5:37) Midika izany fa mila manokana 12 ora eo ho eo isan-kerinandro ianao, mba hanompoana eny amin’ny saha. Mety aminao ve ny iray amin’ireo fandaharam-potoana eo amin’ny pejy 5? Raha tsia, afaka manao ny fandaharam-potoananao ve ianao mba hanaovana mpisava lalana mpanampy amin’ny Martsa, na Aprily, na Mey? Mivavaha amin’i Jehovah mba hitahiany ny ezaka ataonao hampitomboana ny fanompoana.—Ohab. 16:3.
11. Inona no azon’ny anti-panahy sy mpanampy amin’ny fanompoana atao, mba hanohanana ireo hanao mpisava lalana mpanampy?
11 Hanohana tanteraka anao ny anti-panahy sy ny mpanampy amin’ny fanompoana, mba hahatonga ity vanim-potoan’ny Fahatsiarovana ity ho fotoana miavaka hiderana an’i Jehovah. Mety hanao mpisava lalana mpanampy koa ny maro amin’izy ireo. Handamina fivoriana alohan’ny fanompoana fanampiny ny anti-panahy amin’io. Mety ho amin’ny faran’ny tolakandro izany, na andavanandro amin’ny takariva, na amin’ny faran’ny herinandro. Mila faritana ny toerana sy ny fotoana hanaovana ireo fivoriana alohan’ny fanompoana, sy izay hitarika izany. Hiresaka mialoha amin’ireo mpitory hanao mpisava lalana na mikasa hanao izany àry ny anti-panahy. Handamina tsara ireo fivoriana alohan’ny fanompoana ny anti-panahy, mba hana-namana foana ianao amin’ireo andro natokanao hanompoana. Hahomby ny fikasana rehetra amin’izay, ary ho maro ny soa raisina.—Ohab. 20:18.
12. Inona no manosika antsika hidera an’i Jehovah lalandava?
12 Ataovy araka izay fara herinao: Mety tsy hahavita mpisava lalana mpanampy ianao noho ny toe-javatra misy anao. Tadidio anefa fa mankasitraka ny ezaka sy ny sorona ataontsika ‘araka izay ananantsika’ i Jehovah, fa ‘tsy araka izay tsy ananantsika.’ (2 Kor. 8:12) Manana antony maro be isaorana an’i Jehovah isika. Rariny àry raha nanoratra i Davida hoe: “Hisaotra an’i Jehovah lalandava aho; ho eo am-bavako mandrakariva ny fiderana Azy.” (Sal. 34:1) Enga anie ka ho tapa-kevitra toy izany isika mandritra ity vanim-potoan’ny Fahatsiarovana ity.
[Efajoro, pejy 3]
Ahoana no Hampitomboanao ny Fanompoanao?
◼ Mitoria rehefa ao an-tranony ny olona
◼ Mitoria eny amin’ny toerana falehan’ny olona
◼ Mitoria any am-piasana na any am-pianarana
◼ Mitoria an-taratasy
◼ Manaova mpisava lalana mpanampy
[Tabilao, pejy 5]
Fandaharam-potoana Ho An’ny Mpisava Lalana Mpanampy—Ataovy izay hahavitana 12 Ora isan-kerinandro, amin’ny fanompoana eny amin’ny saha
Maraina—Alatsinainy Hatramin’ny Asabotsy
Azo asolo andro hafa ny alahady
Andro Fotoana Ora
Alatsinainy Maraina 2
Talata Maraina 2
Alarobia Maraina 2
Alakamisy Maraina 2
Zoma Maraina 2
Asabotsy Maraina 2
Tontaliny: 12
Tontolo Andro Indroa
Afaka mifidy andro roa ao anatin’ny herinandro ianao. (Mety hahavitana 48 ora ao anatin’ny volana ity fandaharam-potoana ity, arakaraka ny andro fidinao.)
Andro Fotoana Ora
Alarobia Tontolo Andro 6
Asabotsy Tontolo Andro 6
Tontaliny: 12
Takariva Roa sy Faran’ny Herinandro
Afaka mifidy takariva roa ao anatin’ny herinandro ianao.
Andro Fotoana Ora
Alatsinainy Takariva 11⁄2
Alarobia Takariva 11⁄2
Asabotsy Tontolo Andro 6
Alahady Tapak’andro 3
Tontaliny: 12
Tolakandro Roa sy Asabotsy
Azo asolo andro hafa ny alahady
Andro Fotoana Ora
Alatsinainy Tolakandro 2
Alarobia Tolakandro 2
Zoma Tolakandro 2
Asabotsy Tontolo Andro 6
Tontaliny: 12
Ny Fandaharam-potoanako
Soraty ny ora hotratrarina amin’ny fotoana tsirairay.
Andro Fotoana Ora
Alatsinainy
Talata
Alarobia
Alakamisy
Zoma
Asabotsy
Alahady
Tontaliny: 12