Izao no Fotoana Tokony Hitoriana!
1 “Matahora an’Andriamanitra ka omeo voninahitra izy.” Ambara amin’ny “firenena sy foko sy olona samy hafa fiteny ary vahoaka rehetra” io hafatra io ankehitriny, eo ambany fitarihan’ny anjely. Nahoana? “Satria tonga ny ora fitsaran[’Andriamanitra].” Efa ao anatin’io ‘ora fitsarana’ io isika ankehitriny, ary hifarana izy io rehefa horavana ity tontolo ity. Noho izany, dia tena ilain’ny olona ny ‘mivavaka amin’Ilay nanao ny lanitra sy ny tany sy ny ranomasina ary ny loharano.’ Tsy misy asa lehibe sy maika kokoa noho ny fanambarana ny “vaovao tsara mandrakizay” ankehitriny. Izao mihitsy àry no fotoana tokony hitoriana!—Apok. 14:6, 7.
2 Nitory ilay Fanjakana sy nanao mpianatra nandritra ny 12 000 tapitrisa ora teo ho eo ny mpanompon’i Jehovah, nandritra ireo folo taona lasa. Maro no nanova ny fiainany, mba handraisana anjara bebe kokoa amin’ny fijinjana ara-panahy. (Matio 9:37, 38) Mpitory 850 000 mahery isam-bolana, ohatra, no nanao ny asan’ny mpisava lalana, tamin’ny taon-dasa. Mitory mandritra ny 70 ora eo ho eo isam-bolana ny mpisava lalana maharitra, ary 50 ora kosa no takina amin’ny mpisava lalana mpanampy.
3 Inona no ilaina raha te ho mpisava lalana? Miezaka hanana fiainana tsotra foana ny mpisava lalana, satria fantany fa “kely sisa ny fotoana tavela.” (1 Kor. 7:29, 31) Mitady fomba hampihenana ny vola ampiasainy izy, mba ho kely kokoa ny fotoana iasany. Misy, ohatra, mifindra amin’ny trano kely kokoa. Misy koa tsy mitahiry intsony ny fananana tsy ilainy. (Matio 6:19-21) Matetika izy ireo no tsy maintsy mampihena ny fotoana hialany voly. Manao izany rehetra izany izy ireo, mba hahafahany hanompo bebe kokoa sy hifantoka kokoa amin’ny fanompoana. (Efes. 5:15, 16) Maro ny mpitory nahavita nandamina ny fotoanany mba hanaovana ny asan’ny mpisava lalana, satria naneho fikirizana, nahafoy tena, ary niantehitra tamin’i Jehovah.
4 Afaka ny ho mpisava lalana ve ianao? Nahoana raha manontany mpisava lalana mahomby, hoe ahoana no ahafahany manao io fanompoana io? Miaraha manompo aminy eny amin’ny saha, dia hahatsapa ny fifaliany koa ianao. Diniho ireo lahatsoratra momba ny asan’ny mpisava lalana, niseho tao amin’ny boky aman-gazetintsika. Manàna tanjona maromaro azonao tratrarina, mba hahatongavanao ho mpisava lalana. Raha misy vato misakana, dia ento amim-bavaka amin’i Jehovah izany, ary mangataha fanampiana aminy mba hahitanao vahaolana.—Ohab. 16:3.
5 Ahazoana fitahiana sy fifaliana: Lasa kinga kokoa amin’ny fampiasana ny Tenin’Andriamanitra ny mpitory, rehefa manao ny asan’ny mpisava lalana, ka mampitombo ny fifaliany izany. “Tena tombontsoa be ny mahay manazava ny Tenin’Andriamanitra amin’ny fomba marina tsara”, hoy ny tanora mpisava lalana iray. “Mampiasa Baiboly matetika mantsy ny mpisava lalana, ka haiko tsara izao hoe inona no andinin-teny tena mety amin’izay olona itoriako.”—2 Tim. 2:15.
6 Ahaizana zavatra maro hafa ilaina eo amin’ny fiainana koa ny asan’ny mpisava lalana. Manampy ny tanora hahay handamina ny fotoanany izy io, sady mampianatra azy hitantam-bola sy hifandray amin’olona. Maro no lasa mahay mampifanaraka kokoa ny fomba fisainany amin’ny fomba fihevitr’i Jehovah, rehefa nanao ny asan’ny mpisava lalana. (Efes. 4:13) Mahazo tombontsoa hafa koa ny mpisava lalana, satria matetika izy ireo no mahatsapa fa momba azy ny tanan’i Jehovah.—Asa. 11:21; Fil. 4:11-13.
7 Lasa akaiky kokoa an’i Jehovah isika rehefa manao ny asan’ny mpisava lalana, ary izany angamba no anisan’ny fitahiana lehibe indrindra azo avy amin’io fanompoana io. Manampy antsika hiatrika fitsapana izany. Hoy ny anabavy iray nanana zava-manahirana lehibe: “Lasa nifandray akaiky kokoa tamin’i Jehovah aho rehefa mpisava lalana, ary nanampy ahy hiatrika ilay olana izany.” Hoy koa izy: “Tena faly be aho manompo an’i Jehovah manontolo andro. Afaka mahafoy tena hanampy ny olona tsy araka ny noeritreretiko mihitsy aho izao.” (Asa. 20:35) Handray fitahiana tondraka koa isika, raha manao izay rehetra azo atao amin’io asa lehibe io, dia ny fitoriana.—Ohab. 10:22.
[Fanontaniana]
1. Nahoana no izao no fotoana tokony hitoriana?
2. Ahoana no ampisehoan’ny mpanompon’i Jehovah, fa miaiky izy hoe efa akaiky ny farany?
3. Inona matetika no fanovana ilain’ny mpitory hatao, mba hahatongavana ho mpisava lalana?
4. Inona avy no azonao atao, mba hahatongavana ho mpisava lalana?
5. Nahoana isika no lasa mahay mitory kokoa, rehefa manao ny asan’ny mpisava lalana?
6. Mampianatra antsika hanao inona ny asan’ny mpisava lalana?
7. Nahoana isika no lasa akaiky kokoa an’i Jehovah, rehefa manao ny asan’ny mpisava lalana?