Ahoana no Anombohana Fampianarana Amin’ny Boky Ampianarina?
Faly ny ankamaroantsika mampianatra Baiboly. Ahoana anefa no hanombohana izany? Manampy antsika amin’io lafiny io ilay boky vaovao hoe Inona Marina no Ampianarin’ny Baiboly? Natao hisarihana ny olona hiara-midinika ny Baiboly, ny pejy 3-7 ao amin’io boky io. Na ireo mpitory mbola tsy za-draharaha aza, dia hahita fa tsotra ny mampiasa azy io mba hanombohana fampianarana.
◼ Izao atao, raha hampiasa ny pejy 3 ianao:
Milazà zava-nitranga nolazain’ny vaovao, na olana mety hanahiran-tsaina ny olona eo amin’ny faritaninao. Aorian’izay dia apetraho aminy ireo fanontaniana amin’ny sora-matevina eo amin’ny pejy 3, ary avelao izy hilaza ny heviny. Tohizo eo amin’ny pejy 4-5 ny resaka avy eo.
◼ Izao indray atao raha ny pejy 4-5 no tianao horesahina voalohany:
Afaka milaza ianao hoe: “Tsy hahafinaritra ve raha hitranga tokoa ireo fiovana aseho an-tsary eto?” Na azonao atao ny manontany hoe: “Iza amin’ireo zavatra ampanantenaina eto no tianao hitranga?” Henoy tsara ny valin-tenin’ilay olona.
Raha tena mahaliana azy ny iray amin’ireo andinin-teny, dia iaraho midinika aminy ny fehintsoratra manazava izany ao amin’ilay boky, mba hampisehoana aminy izay ampianarin’ny Baiboly momba ilay foto-kevitra. (Jereo ny efajoro) Ataovy toy ny fampianarana Baiboly ilay dinidinika. Azo atao eo am-baravarana amin’ny fitoriana voalohany izany, mandritra ny dimy na folo minitra.
◼ Azo atao koa ny mampiasa ny pejy 6 mba hanasana an’ilay olona haneho ny heviny:
Asehoy azy ireo fanontaniana eny ambany, ary anontanio izy hoe: “Efa mba nisy nanitikitika ny sainao ve ny iray amin’ireo fanontaniana ireo?” Raha tiany ny hahafantatra ny valin’ny iray amin’ireo fanontaniana, dia asehoy azy ny fehintsoratra misy ny valin’ilay izy ao amin’ilay boky. (Jereo ny efajoro) Efa mitarika fampianarana Baiboly ianao, rehefa miara-midinika ilay fanazavana amin’ilay olona.
◼ Azo ampiasaina ny pejy 7 mba hanazavana ny fomba fianarana Baiboly:
Vakio aloha ny fehezanteny telo voalohany. Avadiho eo amin’ny toko 3 ilay boky avy eo, ary ampiasao ny fehintsoratra 1-3 mba hanoroana azy ny fomba fianarana. Resaho fa hovaliana amin’ny manaraka ireo fanontaniana eo amin’ny fehintsoratra 3.
◼ Fomba hanohizana an’ilay resaka:
Amin’ny faran’ilay fianarana voalohany, dia efa sariho ny sainy ho amin’ny resaka hatao amin’ny manaraka. Afaka milaza toy izao ianao: “Tao anatin’ny minitra vitsy monja isika, dia efa nahafantatra izay ampianarin’ny Baiboly momba ny foto-kevitra lehibe iray. Azontsika dinihina amin’ny manaraka hoe [milazà fanontaniana iray]. Afaka miverina ve aho amin’ny herin’ny androany, amin’ny ora toy izao ihany?”
Manome fitaovana hampiasaina amin’ny asantsika foana i Jehovah, arakaraka ny hanatonan’ny farany. (Matio 28:19, 20; 2 Tim. 3:17) Aoka àry hampiasaintsika tsara io fitaovana sarobidy io, mba hanombohana fampianarana Baiboly.
[Efajoro, pejy 3]
Fanazavana Ireo Andinin-teny eo Amin’ny Pejy 4-5
◻ Apokalypsy 21:4 (p. 27-28, feh. 1-3)
◻ Isaia 33:24; 35:5, 6 (p. 36, feh. 22)
◻ Jaona 5:28, 29 (p. 72-73, feh. 17-19)
◻ Salamo 72:16 (p. 34, feh. 19)
Valin’ireo Fanontaniana eo Amin’ny Pejy 6
◻ Nahoana isika no mijaly? (p. 108-109, feh. 6-8)
◻ Ahoana no iatrehana ny fanahiana eo amin’ny fiainana? (p. 184-185, feh. 1-3)
◻ Inona no azontsika atao mba hahasambatra kokoa ny fianakaviantsika? (p. 142, feh. 20)
◻ Manao ahoana isika rehefa maty? (p. 58-59, feh. 5-6)
◻ Mbola hahita ny havantsika efa maty ve isika indray andro any? (p. 72-73, feh. 17-19)
◻ Ahoana no ahazoana antoka fa hanatanteraka ny fampanantenany Andriamanitra? (p. 25, feh. 17)