Aprily: Fotoana ‘Iasantsika Mafy sy Ikelezantsika Aina’
1 Fotoana fisaintsainana ireo herinandro aloha sy aorian’ny Fahatsiarovana, ho an’ny vahoakan’i Jehovah. Mieritreritra ny vokatry ny fahafatesan’i Kristy isika, ary mandinika ny fanantenana nomen’Andriamanitra antsika, izay ho tanteraka noho ny ra nalatsak’i Jesosy. Mahay mankasitraka ny vahoakan’i Jehovah, nefa tsy amin’ny teny fotsiny. (Kol. 3:15, 17) Tamin’ny Aprily tamin’ny herintaona, dia nasehontsika fa mankasitraka ny fandaharana nataon’i Jehovah hamonjena ny olombelona isika, ka nikely aina tamin’ny fanompoana. An-jatony no nirotsaka ho mpisava lalana mpanampy. Vao mainka isika faly, rehefa nahita fa nitombo ny isan’ny mpanatrika ny Fahatsiarovana!
2 Voatosika hanao zavatra tokoa isika, satria azontsika antoka ny fanantenantsika. Mifanaraka amin’izany mihitsy ny tenin’ny apostoly Paoly hoe: “Ho amin’izany tanjona izany no iasantsika mafy sy ikelezantsika aina, satria isika manantena an’Andriamanitra velona, Mpamonjy ny karazan’olona rehetra, indrindra fa ny mahatoky.”—1 Tim. 4:10.
3 Ahoana no hampisehoanao fa mino ny fandaharan’i Jehovah hahazoana fiainana mandrakizay ianao, amin’izao vanim-potoan’ny Fahatsiarovana izao? Fanintelony, tamin’ny Aprily tamin’ny herintaona, no nisy mpitory be indrindra namerina tatitra, teto Madagasikara. Azontsika ampitomboina ve io isa io amin’ity Aprily ity? Mila mifarimbona ny mpitory rehetra, na vita batisa izy na tsia. Mety hisy olona vaovao maro hahafeno fepetra amin’izany koa. Raha hanao fandaharana hiasa mafy sy hikely aina àry ianao amin’ity Aprily ity, dia diniho izay fomba azonao anentanana ny hafa hiaraka aminao, anisan’izany ireo vaovao sy ireo mbola tsy ampy traikefa.
4 Ampio hiverina hitory izay tsy mitory intsony: Raha misy mpitory fantatrao fa tsy nanompo nandritra ny iray na roa volana, dia mety ho azonao ampaherezina izy, ary asainao hiara-manompo aminao. Raha misy tsy mitory intsony eo anivon’ny fiangonana, dia hanao ezaka manokana ny anti-panahy mba hitsidihana azy ireny sy hampirisihana azy hitory indray amin’ity Aprily ity.
5 Nilaza ny apostoly Petera fa omen’Andriamanitra ny fanahiny masina izay “mankatò azy amin’ny maha mpitondra azy.” (Asa. 5:32) Mankatò azy isika, ohatra, rehefa manaraka ilay baiko mba “hitory amin’ny olona ka hanazava tsara” ny fahamarinana. (Asa. 1:8; 10:42) Marina fa mila ny fanahin’Andriamanitra isika mba hahasahiana mitory. Vao mainka anefa izy hanampy antsika, rehefa manomboka mampiseho isika fa maniry hampifaly azy. Enga anie hotadidintsika foana fa zava-dehibe ny manao ny dingana voalohany, izany hoe mankatò an-tsitrapo an’i Jehovah!
6 Ampio ny ankizy sy ny tanora: Ry ray aman-dreny, hitanareo ve fa te hiresaka amin’ny olona momba ny fahamarinana ny zanakareo? Efa miara-manompo aminareo ve izy? Fakan-tahaka ve ny fitondran-tenany? Raha eny, inona intsony no andrasana? Miresaha amin’ny iray amin’ny Komitin’ny Fanompoan’ny Fiangonana, ka fantaro raha mahafeno fepetra ho mpitory ny zanakareo, amin’ity Aprily ity na amin’ny Mey.
7 Ampio ny vaovao: Ary ahoana ny amin’ny olona ampianarinao Baiboly? Afaka mandray anjara amin’ilay ezaka manokana atao amin’ity Aprily ity ve izy ireo? Mino ny Tenin’Andriamanitra ve ny mpianatrao? Efa mampihatra ny toro lalan’ny Baiboly ve izy? Efa mampifanaraka ny fiainany amin’ny fitsipik’Andriamanitra ve izy? Efa manatrika ny fivorian’ny fiangonana ve izy? Maniry hanompo an’i Jehovah Andriamanitra ve izy? Raha eny, dia ampirisiho izy hiresaka amin’ny anti-panahy, mba hahitana raha mahafeno fepetra ho mpitory izy, ka ho afaka hiara-miasa aminao amin’ity Aprily ity na amin’ny Mey.
8 Ahoana no anampiana azy hitory? Mahita fomba maro anampiana an’ireo mahafeno fepetra hitory isika, rehefa mandinika ny fomba nampiofanan’i Jesosy ny mpianany. Tsy hoe nitady vahoaka fotsiny izy, ary naniraka ny apostoliny hitory tamin’izy ireo. Nantitranteriny aloha fa ilaina ny asa fitoriana, ary nampirisihiny hivavaka hatrany momba izany izy ireo. Nisy zava-dehibe telo nomeny azy ireo avy eo: namana, faritany, ary hafatra hotorina. (Matio 9:35-38; 10:5-7; Marka 6:7; Lioka 9:2, 6) Afaka manao izany koa ianao. Na zanakao ilay hampianao, na mpianatra vaovao, na olona tsy nitory elaela, dia tsara ny miezaka mafy mba hanatratra ireto tanjona manaraka ireto.
9 Asongadino fa ilaina ny asa fitoriana: Alenteho ao an-tsain’ilay olona fa zava-dehibe ny asa fitoriana. Resaho amin’ny fomba mahafinaritra izany. Tantarao ny zava-bitan’ny fiangonana teo amin’ny fanompoana. Ampirisiho ilay olona maniry hitory na ilay tsy mitory intsony, mba hivavaka momba ny faniriany hitory. Tsara raha miara-mitory isan-trano, haingana araka izay azo atao, ianao sy ilay mpitory vaovao.
10 Manomàna hafatra mahaliana: Tsy ampy fotsiny ny maniry hitory ny hafatra momba ilay Fanjakana. Mila matoky tena koa ny olona iray rehefa mitory, indrindra raha vaovao izy na efa ela tsy nanompo. Tsy very maina ny fotoana anampiana ireo vaovao sy tsy mitory intsony, mba hanao fanomanana. Misy hevitra mahasoa omena amin’ny Fivoriana Momba ny Fanompoana sy ny fivoriana alohan’ny fanompoana, nefa tsy misy mahasolo ny fanomanana.
11 Ahoana no azonao anampiana ny vaovao mba hanomana ny fanompoany? Atombohy amin’ny fomba fanolorana gazety izany, ka ataovy tsotra sy fohy ilay izy! Asao izy hieritreritra zava-nitranga vao haingana mety hahaliana ny olona eo amin’ny faritany, ary mitadiava hevitra iray mifandray amin’izany ao amin’ny gazety farany. Iaraho mamerimberina aminy ilay fomba fitory, ary ampiasao eny amin’ny fanompoana.
12 Ampio ireo olona mety ho lasa vahoakan’i Jehovah: Olona 80 000 mahery no nanatrika ny Fahatsiarovana tamin’ny herintaona. Mpitory 15 700 no namerina tatitra. Midika izany fa olona liana 64 000 eo ho eo no nanatrika an’io fandaharana manokana io, sy nihaino fampianarana lehibe avy ao amin’ny Baiboly. Nanjary nahafantatra ny sasany tamintsika izy ireny, ka azo inoana fa nisy vokany tsara teo aminy izany. Maro aminy no midera antsika, sy manome vola hanohanana ny asantsika maneran-tany, ary miaro antsika. Mety ho lasa vahoakan’i Jehovah ireny olona maro be ireny. Inona no azontsika atao mba hanampiana azy handroso kokoa?
13 Mety ho tena hisy vokany eo amin’ny fomba fisainan’ny olona iray ny fanatrehana ny Fahatsiarovana. Angamba tsy nahita izay notadiaviny tany an-toeran-kafa izy, matoa tonga nanatrika azy io. Mety ho tsapany koa fa mendrika ny hodinihina kokoa ny zavatra noresahintsika taminy. Misy olona tsy mahalala mihitsy ny fitiavana tsy manam-petra nasehon’i Jehovah, ka mety ho zava-baovao tanteraka aminy ny fanazavana momba ny vidim-panavotana.
14 Aorian’ny Fahatsiarovana, dia ampio haingana ny olona vaovao rehetra nanatrika. Manana andraikitra manokana ianao, raha nanasa olona vaovao. Alohan’ny hodiany, dia ampahafantaro azy ny fivoriana hafa rehetra. Lazao ny lohatenin’ny lahateny ho an’ny besinimaro manaraka. Ampahafantaro azy ny toerana sy ny ora anaovana ny Fianarana Boky akaiky azy indrindra. Hazavao hoe nahoana ny fiangonana manontolo no manao fandaharana mba hanatrehana ny fivoriamben’ny vondrom-paritra. Mifandraisa foana amin’ireo vaovao, mandritra ireo volana ho avy. Asao hivory izy rehefa tonga ny mpiandraikitra ny faritra, na rehefa misy fivoriamben’ny faritra na fivoriambe manokana. Ataovy izay rehetra azo atao mba hahatonga azy hampiseho fa ‘manana toe-po tsara mba hahazoana fiainana mandrakizay’ izy!—Asa. 13:48.
15 Inona no azon’ny anti-panahy atao? Hiankina be dia be amin’ny anti-panahy ny fahombiazan’ilay ezaka bebe kokoa atao amin’ity Aprily ity. Raha mpiandraikitra fianarana boky ianao, dia ataovy lisitra izay zavatra azonao anampiana ny tsirairay ao amin’ny fianarana bokinao, mba handray anjara amin’ilay ezaka manokana. Misy tanora, na vaovao, na mpitory tapatapaka, na tsy mitory intsony ve ao? Jereo raha efa nisy zavatra nataon’ny ray aman-dreniny, na ny mpisava lalana, na ny mpitory hafa mba hanampiana azy ireny. Mitadiava koa fomba hafa anampiana azy ireny. Tsy nitory nandritra ny roa taona, ohatra, ny anabavy iray. Nahavita 50 ora mahery teny amin’ny fanompoana anefa izy, ny Aprily tamin’ny taona nanaraka. Inona no nahatonga azy hahavita izany? ‘Ny fitsidihana nampahery nataon’ireo anti-panahy’, hoy izy.
16 Mahafaly ny mandray anjara feno: Inona no fitahiana azontsika rehefa ‘miasa mafy sy mikely aina’ amin’ny fanompoana isika? (1 Tim. 4:10). Mifankatia kokoa ireo rahalahy satria miara-manompo matetika kokoa.
17 Tsy isalasalana fa omen’i Jehovah fitahiana be dia be ireo mihevitra fa sarobidy ny tombontsoa hitory ilay fanjakany. (Sal. 145:11, 12) Hanao izany koa izy amin’ity Aprily ity, raha mikely aina manompo azy isika. Te hahazo izany fitahiana izany ve ianao?
[Efajoro, pejy 3]
Iza no Azonao Ampirisihina Hitory Amin’ity Aprily Ity?
Ny zanakao ve?
Sa ny mpianatrao?
Sa olona tsy nitory intsony?