Fitoriana Isan-trano
1. Inona no fanontaniana mipoitra mifandray amin’ny fitoriana isan-trano, ary nahoana?
1 “Ireo efa za-draharaha amin’ny fampiasana fomba isan-karazany mba hampahafantarana ny Fahamarinana, dia hanaiky fa ny fanelezana ny [boky] FIANDOHAN’NY ARIVO TAONA amin’ny fitoriana isan-trano izao, no fomba mandaitra indrindra hanambarana ny Fahamarinana.” Manasongadina ny maha zava-dehibe ny fitoriana isan-trano io teny io, izay hita tao amin’ny Tilikambo Fiambenan’i Ziona (anglisy), 1 Jolay 1893. Ny fitoriana isan-trano no amantaran’ny olona eran-tany ny Vavolombelon’i Jehovah. Mihasarotra anefa izao ny mahita olona ao an-tranony, any amin’ny tany maro. Mbola mandaitra àry ve ny fitoriana isan-trano?
2. Inona avy no ohatra ao amin’ny Baiboly mampiseho fa tokony hitory isan-trano isika?
2 Mifanaraka amin’ny Baiboly sady mandaitra: Tokony hitory isan-trano isika rehefa jerena izay lazain’ny Baiboly. Nirahin’i Jesosy tsiroaroa ho any an-tranon’ny olona, ohatra, ny mpianany 70. (Lioka 10:5-7) Hoy koa ny Baiboly momba ny mpanara-dia an’i Jesosy, taoriana kelin’ny nahafatesany: “Tsy nitsahatra nampianatra sy nitory ny vaovao tsara ... izy ireo isan’andro, na tao amin’ny tempoly izany na isan-trano.” (Asa. 5:42) Nazoto nampianatra isan-trano koa ny apostoly Paoly.—Asa. 20:20.
3. Inona avy no mahatsara ny fitoriana isan-trano?
3 Mbola fomba mandaitra hizarana ny vaovao tsara foana ny fitoriana isan-trano ankehitriny. Manampy antsika ‘hitady’ izay mendrika, amin’ny fomba milamina tsara izy io. (Matio 10:11) Mazàna ny olona no tony kokoa rehefa ao an-tranony. Afaka mamantatra izay mahaliana sy mampanahy azy isika, rehefa miresaka aminy mivantana ka mihaino azy sy mijery ny endriny, ary mahita ny manodidina azy. Ny fitoriana isan-trano matetika no fomba tsara indrindra ahafahantsika miresaka ela amin’ny olona.
4. Ahoana no ahitantsika vokatra kokoa rehefa mitory isan-trano?
4 Manaova fanitsiana: Vonona hanao fanitsiana “noho ny vaovao tsara”, ny apostoly Paoly. (1 Kor. 9:23) Azontsika ovana koa angamba ny fotoana hitoriantsika, mba ho amin’ny fotoana maha ao an-tranony ny olona. Mety ho amin’ny takariva izany, na amin’ny faran’ny herinandro, na amin’ny andro fety. Raiso an-tsoratra ireo tsy tratra an-trano, ary miezaha miverina any aminy indray amin’ny fotoana hafa.
5. Ahoana no mety hahafahan’ireo tsy tena salama hitory isan-trano?
5 Mety ho afaka hitory isan-trano na ireo tsy tena salama aza. Angamba isika afaka manao fandaharana mba hiaraka amin’izy ireny any amin’izay trano mora aleha, ary avelantsika izy handeha miadana araka izay mety aminy. Sempotra, ohatra, ny anabavy iray, ka trano iray ihany no vitany isaky ny antsasak’adiny. Tena faly sy afa-po anefa izy rehefa avy miara-mitory amin’ny mpitory vitsivitsy!
6. Nahoana isika no tokony hitory isan-trano tsy tapaka?
6 Mbola mahita olona maro toy ny ondry foana isika rehefa mitory isam-baravarana. Izao no nolazain’ny olona iray tamin’ilay mpitory nandondona tao aminy: “Mandrosoa. Fantatro hoe iza ianao. Nivavaka tamin’Andriamanitra foana aho mba handefasany olona hanampy ahy, ary teo am-pivavahana aho no nandondona ianao. Nihaino ahy izy ary naniraka anao.” Porofoin’ny vokatra hita fa mitahy an’io fomba fitory io i Jehovah. (Matio 11:19) Aoka àry ianao ho tapa-kevitra hitory isan-trano tsy tapaka.