Fotoana Ifampaherezan’ny Rehetra
1. Nahoana no mahasoa ny fitsidihan’ny mpiandraikitra mpitety faritany?
1 Nanoratra toy izao ho an’ny fiangonana tany Roma ny apostoly Paoly: ‘Maniry mafy hahita anareo aho, hampitako fanomezana ara-panahy aminareo, mba hahatonga anareo ho mafy orina tsara ao amin’ny finoana, na, raha ny marimarina kokoa, dia mba hisy fifampaherezana eo amintsika, ka mba hampahery anareo ny finoako ary ny anareo kosa hampahery ahy.’ (Rom. 1:11, 12) Fotoana ahafahana mifampahery koa ankehitriny ny fitsidihan’ny mpiandraikitra mpitety faritany.
2. Nahoana no lazaina mialoha ny fotoana itsidihan’ny mpiandraikitra ny faritra?
2 Ny fiangonana: Ampandrenesina telo volana mialoha mazàna ny fitsidihan’ny mpiandraikitra ny faritra. Afaka mandamina ny fandaharam-potoanantsika isika amin’izay, ka handray soa faran’izay betsaka amin’ilay fitsidihana. (Efes. 5:15, 16) Ho afaka hangataka andro tsy iasana angamba ianao, mba handraisanao anjara amin’ny fanompoana eny amin’ny saha, mandritra ilay herinandro. Misy manao mpisava lalana mpanampy amin’ilay volana itsidihan’ny mpiandraikitra. Raha mikasa handeha ianao, nefa mifanindry amin’ny fitsidihan’ny mpiandraikitra ny faritra izany, azonao ovana ve ny fandaharam-potoananao mba ho eo ianao?
3. Inona no azontsika atao mandritra ilay fitsidihana, mba hahazoana fampaherezana?
3 Ny hampahery sy hampiofana ny tsirairay amin’ny fanompoana eny amin’ny saha, no tena tanjon’ny fitsidihan’ny mpiandraikitra ny faritra. Nahoana raha misoratra anarana hiara-manompo aminy na amin’ny vadiny? Tian’ny mpiandraikitra ny faritra ny miara-miasa amin’ny mpitory samihafa, anisan’izany ireo tsy za-draharaha sy ireo te hanatsara ny fahaizany manompo. Afaka manahaka ny fomba fitoriny ny rehetra, ary mampihatra ny soso-kevitra omeny amim-pitiavana. (1 Kor. 4:16, 17) Ho afaka hifampahery bebe kokoa aminy isika, raha manasa azy hisakafo. (Heb. 13:2) Henoy tsara ny lahateniny, satria mifanaraka amin’izay ilain’ny fiangonana izany.
4. Ahoana no hampaherezantsika ny mpiandraikitra ny faritra?
4 Ny mpiandraikitra ny faritra: Toy ireo rahalahy teo anivon’ny fiangonana ihany ny apostoly Paoly. Niatrika zava-tsarotra sy nitebiteby izy. Nila fampaherezana koa àry izy, ary nankasitraka izany. (2 Kor. 11:26-28) Rehefa ren’ny fiangonana tao Roma fa ho avy i Paoly, dia tonga nitsena azy tany amin’ny Tsenan’i Apio ny sasany tamin’izy ireo. Lalana 74 kilaometatra avy ao Roma izy io. Nentina higadra izy tamin’izay. “Nisaotra an’Andriamanitra i Paoly raha vantany vao nahita an’ireo, ary nihanahery.” (Asa. 28:15) Afaka manao toa azy ireo koa ianao mba hampaherezana ny mpiandraikitra ny faritra. Anehoy “fanajana roa heny” izy. Manao izany ianao raha mazoto manohana ny fitsidihany. (1 Tim. 5:17) Lazao aminy fa mankasitraka ny ezaka ataony hanampiana anao ianao, ary porofoy amin’ny ataonao izany. Ho faly izy sy ny vadiny rehefa mahita ny finoana sy fitiavana ary fiaretana asehonao.—2 Tes. 1:3, 4.
5. Nahoana no mila fampaherezana isika rehetra ankehitriny?
5 Iza moa no tsy mila fampaherezana amin’izao “fotoan-tsarotra tsy mora setraina” izao? (2 Tim. 3:1) Aoka àry ianao ho tapa-kevitra ny hanohana amin’ny fomba feno ny herinandro manokana itsidihan’ny mpiandraikitra ny faritra. Fotoana mahafaly ifampaherezana izany. Samy afaka mampahery, na ny mpiandraikitra mpitety faritany na ny mpitory eo anivon’ny fiangonana. Izany koa no ahafahantsika ‘mifampionona hatrany.’—1 Tes. 5:11.