Tsy Maintsy ‘Hotorina ny Vaovao Tsara’
1. Ahoana no ahalalantsika fa tsy misy mahasakana ny asa fitoriana?
1 Tsy misy mahasakana an’i Jehovah tsy hanatanteraka ny sitrapony mihitsy. (Isaia 14:24) Toa tsy ho resin’i Gideona sy ny 300 lahy niaraka taminy ireo miaramila midianita 135 000. Hoy anefa i Jehovah taminy: “Vonjeo eo am-pelatanan’ny Midianina ny Israely. Tsy efa naniraka anao ve aho?” (Mpits. 6:14) Manampy antsika hanao inona koa i Jehovah ankehitriny? Hoy i Jesosy: “Hotorina maneran-tany ity vaovao tsaran’ilay fanjakana ity.” (Mat. 24:14) Tsy hisy hahasakana an’io asa io tsy ho vita!
2. Nahoana isika no matoky fa hanampy antsika tsirairay amin’ny fanompoana i Jehovah?
2 Manampy antsika tsirairay i Jehovah: Matoky isika fa manao izay hahombiazan’ny Vavolombelony amin’ny fitambarany i Jehovah. Ary ahoana ny amin’ny tsirairay? Rehefa nila fanampiana ny apostoly Paoly, dia tsapany fa nanohana azy i Jehovah, tamin’ny alalan’i Jesosy Zanany. (2 Tim. 4:17) Matoky koa isika fa hitahy ny fiezahantsika tsirairay hanao ny sitrapony i Jehovah.—1 Jaona 5:14.
3. Amin’ny toe-javatra manao ahoana avy isika no ampian’i Jehovah?
3 Mihena ve ny hery anompoanao, noho ny fanahiana isan’andro? “Omeny hery ny reraka.” (Isaia 40:29-31) Misy manenjika na manohitra anao ve? “Apetraho amin’i Jehovah izay manavesatra anao, fa izy no hanohana anao.” (Sal. 55:22) Tsy matoky tena ve ianao indraindray? “Mandehana fa homba anao aho rehefa miteny ianao.” (Eks. 4:11, 12) Marary ve ianao ka tsy mahavita be amin’ny fanompoana? Mankasitraka ny ezaka ataonao amin’ny fo manontolo i Jehovah ary mampiasa anao, na be na kely no vitanao.—1 Kor. 3:6, 9.
4. Nahoana no misy heriny eo amintsika ny fatokiana an’i Jehovah?
4 “Maninjitra ny tanany [i Jehovah], ka iza no afaka mampihemotra izany?” (Isaia 14:27) Enga anie isika hitory hatrany ‘amim-pahasahiana araka ny fahefana nomen’i Jehovah’, satria matoky fa mitahy ny fanompoantsika izy.—Asa. 14:3.