Mila Mivavaka Isika Mpitory
1. Inona no ilaintsika mba hanatontosana ny fanompoantsika?
1 Manome hery hanatontosana ny fanompoantsika i Jehovah fa tsy vitantsika samirery izany. (Fil. 4:13) Mampiasa ny anjeliny izy mba hanampy antsika hahita olona toy ny ondry. (Apok. 14:6, 7) I Jehovah no mampitombo an’ireo voan’ny fahamarinana ambolentsika sy tondrahantsika. (1 Kor. 3:6, 9) Tena mila miantehitra amin’ilay Raintsika any an-danitra àry isika mpitory, ka hivavaka aminy.
2. Inona no azo atao antom-bavaka?
2 Ho antsika: Tokony hivavaka isika isaky ny hitory. (Efes. 6:18) Inona, ohatra, no azo atao antom-bavaka? Afaka mivavaka isika mba ho sahy sy hanana toe-tsaina tsara momba an’ilay faritany. (Asa. 4:29) Afaka mangataka amin’i Jehovah isika mba hitarihany antsika any amin’ny olona tso-po mety hianatra Baiboly. Afaka mivavaka mangina vetivety isika mba hanampiany antsika hahay hamaly tsara, raha misy manontany. (Neh. 2:4) Azontsika atao ny mivavaka mba ho hendry, ka hanao ny fanompoana ho loha laharana foana. (Jak. 1:5) Faly koa i Jehovah rehefa mankasitraka azy isika noho ny tombontsoa manompo azy.—Kol. 3:15.
3. Nahoana no mampandroso ny fitoriana ny vavaka ho an’ny hafa?
3 Ho an’ny hafa: Tokony ‘hifampivavaka’ koa isika, ary hanonona ny anaran’ny mpiara-manompo mihitsy aza raha mety. (Jak. 5:16; Asa. 12:5) Tsy afaka manompo be ve ianao satria marary? Mivavaha àry ho an’ny mpiara-manompo salama. Aza hamaivanina mihitsy ny herin’ny vavaka ataonao ho azy ireo. Mety koa ny mivavaka ho an’ny mpitondra mba hitiavany ny fitoriantsika, ka ‘hanana fiainana tony sy milamina hatrany’ ny rahalahintsika.—1 Tim. 2:1, 2.
4. Nahoana isika no tokony haharitra amin’ny vavaka?
4 Andraikitra goavana ny mitory maneran-tany an’ilay vaovao tsara. Hanampy antsika hamita azy io i Jehovah raha ‘maharitra amin’ny vavaka isika.’—Rom. 12:12.