“Nahoana Raha Manao Mpisava Lalana?”
1. Inona no tsapan’ny anabavy iray momba ny asan’ny mpisava lalana?
1 “Io no asa mahafa-po indrindra sy ahazoana fitahiana be indrindra”, hoy i Kathe Palm. Mpisava lalana maharitra nahafoy tena nandritra ny am-polony taona izy, ary nanompo eran’i Silia, any Amerika Atsimo. Mety hisy hieritreritra ny fitahiana azon’ny mpanompo manontolo andro, ka hilaza aminao hoe: “Nahoana raha manao mpisava lalana?”
2. Nahoana no tena mahafa-po ny asa mifandray amin’ny fanompoana an’i Jehovah?
2 Mahafa-po: Finaritra nanao ny sitrapon’ny Rainy i Jesosy, ilay Modelintsika. (Jaona 4:34) Tsy nandainga àry izy rehefa nilaza tamin’ny mpanara-dia azy fa ny asa mifandray amin’ny fanompoana an’i Jehovah no tena mahafa-po. Ho afa-po isika raha asa ankasitrahan’i Jehovah no hamenoantsika ny fiainantsika. Ho sambatra kokoa isika rehefa mampiasa ny fotoana sy ny hery ary ny fananantsika mba hanampiana ny hafa.—Asa. 20:31, 35.
3. Inona avy ireo zavatra mahafaly antsika rehefa manompo bebe kokoa isika?
3 Mahafaly ny manomboka sy mitarika fampianarana Baiboly. Ho tsapanao kokoa izany rehefa manompo bebe kokoa ianao. Mety ho be olona toa tsy miraharaha ao amin’ny faritanintsika. Ho hitantsika anefa fa mamokatra ihany izy io, rehefa mihamahay sy za-draharaha isika. Manatrika ny Sekolin’ny Fanompoan’ny Mpisava Lalana ny mpisava lalana maharitra, herintaona eo ho eo aorian’ny hanombohany, ka afaka mampihatra ny fampiofanana azony izy. (2 Tim. 2:15) Mbola mety ho vanona ireo voan’ny fahamarinana nafafintsika, raha tsy kivy isika.—Mpito. 11:6.
4. Inona no tokony hoeritreretin’ny tanora mamarana ny fianarany?
4 Ry tanora: Raha efa ao amin’ny kilasy famaranana ianao, efa noeritreretinao tsara ve izay hataonao amin’ny hoavy? Ny fianarana no tena mandany ny fotoananao, hatramin’izao. Inona kosa no hampiasanao ny fotoananao rehefa vita ny fianaranao? Tsy aleo ve mieritreritra ny hanao mpisava lalana maharitra, ka mivavaka momba izany, toy izay hiasa tontolo andro? Hahasoa anao foana ny fahaizana ho azonao amin’izany, satria hitory amin’olona samihafa ianao, hamaha olana, hianatra hamola-tena, ary hampitombo ny fahaizanao mampianatra.
5. Inona no azon’ny ray aman-dreny sy ny fiangonana atao mba hampirisihana ny hafa hanao mpisava lalana?
5 Ry ray aman-dreny, ampirisihinareo hanompo manontolo andro ve ny zanakareo? Tena hanampy azy ireo hanao an’ilay Fanjakana ho loha laharana ny teninareo sy ny modely omenareo. (Mat. 6:33) Hoy i Ray, izay nanomboka nanao mpisava lalana, tamin’izy namarana ny fianarany teny amin’ny lise: “Tsapan’i Neny fa tena mahafa-po foana ny manao mpisava lalana.” Samy afaka mampirisika sy manampy ny hafa mba hanao mpisava lalana ny rehetra anisan’ny fiangonana. Hoy i Jose, any Espaina: “Ny asan’ny mpisava lalana no noheverina ho asa tsara indrindra ho an’ny tanora, teo anivon’ny fiangonanay. Tsy sarotra tamiko ny nanomboka nanao mpisava lalana, satria nankasitraka ny asan’ny mpisava lalana ny fiangonana ary tena nanampy azy ireo.”
6. Inona no azontsika atao raha tsy te ho mpisava lalana isika izao?
6 Reseo ny olana: Ahoana kosa raha mbola tsy te hanao mpisava lalana ianao? Resaho amin’i Jehovah izay tsapanao, ary lazao hoe: ‘Te hampifaly anao aho. Tsy haiko anefa raha mety amiko ny asan’ny mpisava lalana.’ (Sal. 62:8; Ohab. 23:26) Tadiavo, avy eo, ny tari-dalan’ny Teniny sy ny fandaminany. Mpisava lalana maharitra maro no ‘nanandrana’ nanao mpisava lalana mpanampy aloha. Nahafaly azy ireo izany, ka lasa mpanompo manontolo andro izy ireo.—Sal. 34:8.
7. Inona no azontsika atao raha manahy isika sao tsy hahafeno an’ireo 70 ora isam-bolana?
7 Ahoana kosa raha manahy ianao sao tsy hahafeno an’ireo 70 ora takina isam-bolana? Miresaha amin’izay mpisava lalana ao anatin’ny toe-javatra toy ny anao. (Ohab. 15:22) Soraty ny fandaharam-potoana samihafa azonao arahina. Ho hitanao fa mora kokoa ny manajanona an’ireo zavatra tsy tena lehibe fanaonao, ary mampiasa an’izany fotoana izany mba hanompoana.—Efes. 5:15, 16.
8. Nahoana no tokony hodinihintsika tsindraindray ny toe-javatra misy antsika?
8 Diniho ny toe-javatra misy anao: Miovaova ny fiainana. Diniho tsindraindray àry ny toe-javatra misy anao. Efa akaiky hisotro ronono ve, ohatra, ianao? Hoy i Randy, izay naka ny fisotroan-drononony aloha kokoa: “Lasa afaka nanomboka nanao mpisava lalana izahay mivady, ary nifindra tany amin’izay nilana mpitory maro kokoa. Nandraisako fitahiana maro izany, fa ny lehibe indrindra dia izao: Mandry ny eritreritro.”
9. Inona no tokony hodinihin’ny mpivady?
9 Nandinika tsara ny fiainany ny mpivady sasany ka nahita fa tsy voatery hiasa tontolo andro izy roa. Marina fa mety hila hanatsotra ny fiainany izy ireo, nefa tsy hanenenany izany. Te hanompo bebe kokoa, ohatra, ny vadin’i John, ka niala tamin’ny asany manontolo andro. Hoy i John: “Tena faly aho mieritreritra hoe variana manompo an’i Jehovah ny vadiko mandritra ny andro.”
10. Inona no handrisika ny Kristianina hanao mpisava lalana?
10 Porofon’ny fitiavana sy ny finoana: Ny fitoriana no asa lehibe indrindra asain’i Jehovah ataontsika rehetra. Horinganina tsy ho ela ity tontolo ity, ary izay miantso ny anaran’i Jehovah ihany no hovonjena. (Rom. 10:13) Inona no handrisika antsika hankatò an’ilay didin’ny Zanany mba hazoto hitory? Ny fitiavana lalina an’i Jehovah sy ny fankasitrahana an’izay nataony ho antsika. (Mat. 28:19, 20; 1 Jaona 5:3) Mino koa isika fa andro farany izao, ka hanararaotra hanompo araka izay vitantsika isika, fa tsy ho revo tanteraka amin’ity tontolo ity.—1 Kor. 7:29-31.
11. Ahoana no tokony handraisantsika ny fampirisihana antsika hanao mpisava lalana?
11 Tsy hoe manohana ny fandaharan’ny fandaminana fotsiny ny olona manao mpisava lalana, fa mampiseho koa hoe mahafoy tena ho an’Andriamanitra. Hevero ho toy ny teny fiderana àry ny fampirisihana anao mba hanao mpisava lalana. Eritrereto tsara raha ho afaka hanao an’io asa mahafa-po io ianao, ary mivavaha momba izany.
[Teny notsongaina, pejy 4]
Ry ray aman-dreny, ampirisihinareo hanompo manontolo andro ve ny zanakareo?
[Teny notsongaina, pejy 5]
Ny fitoriana no asa lehibe indrindra asain’i Jehovah ataontsika rehetra.