Natao ho An’ny Karazan’olona Rehetra ny Gazetintsika
1. Inona no itovizan’ny apostoly Paoly sy ny mpanompo mendri-pitokisana sy malina?
1 Nanovaova ny fomba nitoriany ny vaovao tsara ny apostoly Paoly, mba hahazoany ny “karazan’olona rehetra.” (1 Kor. 9:22, 23) Olona samy hafa fiaviana sy finoana koa no kendren’ny mpanompo mendri-pitokisana sy malina amin’ireo gazetintsika. Tokony hoeritreretintsika tsara àry hoe olona hoatran’ny ahoana no hamaky Ny Tilikambo Fiambenana sy ny Mifohaza!, mba ho haintsika ny mametraka azy ireo.
2. Natao ho an’iza ny Mifohaza!?
2 Mifohaza!: Natao ho an’ny olona mitovy amin’ireo “Atenianina” niresahan’i Paoly io gazety io. (Asa. 17:22) Tsy nahalala ny fampianarana kristianina ireo Atenianina ireo, ary zara raha nahay ny Soratra Masina. Natao ho an’ireo tsy dia mahay na tsy mahay Baiboly mihitsy koa ny Mifohaza! Mety hoe tsy mahalala ny fampianarana kristianina mihitsy izy ireo, na tsy matoky ny fivavahana, na koa mihevitra hoe tsy ilaina eo amin’ny fiainana andavanandro ny Baiboly. Anisan’ny tanjon’ny Mifohaza! ny handresy lahatra ny mpamaky hoe tena misy Andriamanitra. Natao hanampiana ny olona hino ny Baiboly koa izy io, ary hampahafantarana hoe tsy mitovy amin’ny fivavahana hafa ny Vavolombelon’i Jehovah.
3. Natao ho an’iza ireo gazety Tilikambo karazany roa?
3 Ny Tilikambo Fiambenana: Natao ho an’ireo olona manaja an’Andriamanitra sy ny Soratra Masina ilay gazety ho an’ny besinimaro. Mahay Baiboly ihany izy ireo, saingy tsy mahalala ny tena marina. Toa an’ireo nantsoin’i Paoly hoe olona “matahotra an’Andriamanitra” izy ireo. (Asa. 13:14-16) Ny gazety fianarana kosa dia natao indrindra ho an’ny Vavolombelon’i Jehovah. Nosoratan’i Paoly ho an’ireo nahay ny Soratra Masina sy nahalala tsara ny marina ny taratasiny. (1 Kor. 1:1, 2) Toy izany koa, fa natao ho an’ireo manatrika fivoriana sady mahalala ny teny fampiasan’ny Vavolombelon’i Jehovah sy ny fampianarany ireo lahatsoratra ao amin’ny gazety fianarana.
4. Nahoana no tokony ho fantatsika tsara izay raketin’ny gazety tsirairay hapetratsika?
4 Gazety iray ihany matetika no asongadintsika, na dia atolotsika miaraka aza ny Tilikambo sy Mifohaza! Fantaro tsara àry izay raketin’ny gazety tsirairay. Amin’izay dia ho hainao tsara ny hanasongadina an’izay lahatsoratra mety hahaliana an’ireo olona hitanao.