Ampio ny Olona Itorianao mba Hisaintsaina
1. Inona no fomba tena mandaitra rehefa mitory?
1 Inona no mandaitra kokoa rehefa mitory: Ny manizingizina ny hevitsika sa ny manampy olona hisaintsaina sy hanatsoaka hevitra marina? Rehefa niresaka tamin’ireo Jiosy tao Tesalonika ny apostoly Paoly, dia nampisaintsaina azy ireo, ka ‘tonga mpino ny sasany taminy.’ (Asa. 17:2-4) Ahoana àry no atao raha te hampisaintsaina olona?
2. Ahoana no anahafantsika an’i Paoly rehefa mitory?
2 Eritrereto ny fihetseham-pony sy ny fomba fiheviny: Mila mihevitra ny fihetseham-pon’ny olona isika rehefa mampisaintsaina azy. Rehefa nandaha-teny tamin’ireo Grika tsy mpino tao amin’ny Areopago i Paoly, dia zavatra fantatr’izy ireo sy nekeny no nataony fampidiran-dresaka. (Asa. 17:22-31) Eritrereto koa àry ny zavatra inoan’ny olona eo amin’ny faritaninao sy izay heveriny fa marina, rehefa manomana ny fitorianao ianao. (1 Kor. 9:19-22) Rehefa misy manohitra, dia mitadiava hevitra iombonana, ary iny aloha resahina.
3. Nahoana no manampy antsika hampisaintsaina olona ny fahaizana mametraka fanontaniana?
3 Mahaiza mampiasa fanontaniana: Raha te hanoro lalana olona iray isika mba hahatongavany any amin’ny toerana tokony halehany, dia tsy maintsy fantatsika aloha hoe aiza ho aiza izy. Toy izany koa rehefa mitory. Tsy ho afaka hanampy ny olona hanatsoaka hevitra marina isika, raha tsy fantatsika aloha izay fomba fiheviny. Matetika i Jesosy no tsy tonga dia nandresy lahatra, fa nametraka fanontaniana mba hahalalana ny hevitr’ilay olona aloha. Rehefa nanontany, ohatra, ny lehilahy iray hoe “Inona no hataoko mba handovako fiainana mandrakizay?”, dia namantatra ny heviny aloha i Jesosy. (Lioka 10:25-28) Indray mandeha koa dia nilaza valin-teny diso i Petera, ka nampiasa fanontaniana nety tsara i Jesosy mba hanitsiana ny heviny. (Mat. 17:24-26) Afaka mampiasa fanontaniana koa àry isika mba hampisaintsainana ny olona, rehefa misy manontany na milaza hevi-diso.
4. Nahoana isika no tokony hiezaka hampisaintsaina ny olona itoriantsika?
4 Rehefa miezaka mampisaintsaina olona isika dia manahaka an’i Jesosy, ilay Mpampianatra Lehibe, sy ireo mpitory nahay tamin’ny taonjato voalohany. Manaja sy manisy vidiny ny hafa koa isika amin’izany. (1 Pet. 3:15) Mety hanaiky hotsidihina ilay olona raha manao izany isika.