Aza Mieritreritra hoe Tsy Mahay Mampianatra Ianao
1. Nahoana no tsy te hampianatra Baiboly ny Kristianina sasany?
1 Tsy te hampianatra Baiboly ve ianao satria matahotra sao tsy hahay hampianatra? Tsy ianao irery no matahotra hoatr’izany. Nisy mpanompon’i Jehovah koa nihevitra fa tsy ho hainy ny andraikitra nampanaovina azy. Anisan’izany i Mosesy sy Jeremia. (Eks. 3:10, 11; 4:10; Jer. 1:4-6) Inona àry no azo atao mba handresena izany vato misakana izany?
2. Nahoana isika no tsy tokony hianina fotsiny amin’ny fitoriana isan-trano, ka hiandry ny hafa hampianatra ny olona?
2 Tokony hotadidintsika fa tsy mitaky izay zavatra tsy ho vitantsika i Jehovah. (Sal. 103:14) Matoa àry izy maniraka antsika ‘hampianatra’ ny olona, dia ho vitantsika izany. (Mat. 28:19, 20) Tsy ny olona manam-pahaizana na ampy traikefa indrindra ihany no nasainy hanao izany. (1 Kor. 1:26, 27) Tsy tokony hianina fotsiny amin’ny fitoriana isan-trano àry isika, ka hiandry ny hafa hampianatra Baiboly ny olona.
3. Ahoana no ampiofanan’i Jehovah antsika hahay hampianatra Baiboly?
3 Mampiofana antsika i Jehovah: I Jehovah no mampiofana antsika hanao mpianatra. (2 Kor. 3:5) Mampiasa ny fandaminany izy mba hampianarana antsika ny fahamarinana ao amin’ny Baiboly, ka na ny olona tapi-pahaizana eto amin’ity tontolo ity aza tsy mahafantatra izany. (1 Kor. 2:7, 8) Nosoratany ao amin’ny Baiboly koa ny fomba fampianatr’i Jesosy, ilay Mpampianatra Lehibe, mba hotahafintsika. Ampiofaniny foana koa isika any am-pivoriana, ary omeny an’izay fitaovana ilaina hampianarana Baiboly. Anisan’izany ny boky Ampianarina, izay manazava amin’ny fomba tsotra sy mirindra tsara ny fahamarinana. Mety tsy ho sarotra be araka ny ieritreretantsika azy àry ny hoe mampianatra Baiboly.
4. Nahoana isika no matoky fa hanampy antsika i Jehovah?
4 Nampian’i Jehovah i Mosesy sy Jeremia ka nahavita ny asa nanendrena azy. (Eks. 4:11, 12; Jer. 1:7, 8) Afaka mangataka fanampiana amin’i Jehovah koa isika. Ny marina momba azy mantsy no ampianarintsika ny olona ka tena mahafaly azy izany. (1 Jaona 3:22) Ataovy tanjona àry ny hampianatra Baiboly, dia ho faly sy ho afa-po amin’ny fanompoana ianao.