Afaka ny ho Mpampianatra Mahay Ianao!
1. Inona no tombontsoa miavaka ananan’ny mpitory rehetra?
1 Anisan’ny lafim-panompoana mahafa-po indrindra ny mampianatra ny fahamarinana. Faly isika rehefa mandray tsara ny hafatra momba ilay Fanjakana ny olona. Faly koa isika manampy azy hanatona an’ilay Mpanjakan’izao rehetra izao. (Jak. 4:8) Izao àry no tokony ho tanjon’ny mpitory rehetra: Ny hampianatra an’izay mangetaheta ny fahamarinana sy hahita azy manitsy ny toetrany sy ny toe-tsainy ary ny fitondran-tenany. Tombontsoa miavaka izany!—Matio 28:19, 20.
2. Nahoana ny sasany no matahotra hitarika fampianarana Baiboly? Inona anefa no azon’izy ireo atao?
2 Miantehera amin’i Jehovah: Olon-tsotra ny sasany tamin’ireo mpanompon’i Jehovah tsy nivadika. Nihevitra izy ireny fa tsy ho vitany mihitsy ny asa nampanaovina azy. Tsy natahotra intsony anefa izy ireo rehefa niantehitra tamin’i Jehovah, ka nahavita asa lehibe. Anisan’ireny i Mosesy sy Jeremia ary Amosa. (Eks. 4:10-12; Jer. 1:6, 7; Amosa 7:14, 15) Toy izany koa ny apostoly Paoly. “Nisikina herim-po tamin’ny alalan’Andriamanitsika” izy, ka sahy niteny. (1 Tes. 2:2) Afaka miantehitra amin’i Jehovah àry isika rehetra. Hanampy antsika mantsy izy, ary hanome antsika fahendrena sy hery, mba hitarihantsika fampianarana Baiboly mandroso.—Isaia 41:10; 1 Kor. 1:26, 27; 1 Pet. 4:11.
3, 4. Inona no fampiofanana natao hanampiana antsika hampianatra ny Tenin’Andriamanitra?
3 Ekeo ny fampiofanana: Nanomana fandaharana hampiofanana antsika tsy tapaka i Jehovah, ilay Mpampianatra Lehibe, mba hahatonga antsika ho mpampianatra tena mahay. (Isaia 54:13; 2 Tim. 3:16, 17) Ekeo izany fampiofanana izany, ka miezaha mafy hahatakatra bebe kokoa ny Soratra Masina sy hanatsara ny fahaizanao mampianatra. Izany no tena zava-kendren’ny Sekolin’ny Fanompoana sy ny Fivoriana Momba ny Fanompoana. Ny fivoriana rehetra anefa no mampiofana antsika hampianatra ny Tenin’Andriamanitra.
4 Iezaho hatao tsotra ny fomba fampianatrao an’ireo fahamarinana lalina. Hoy ny boky Sekolin’ny Fanompoana, pejy 227: “Tsy maintsy mazava tsara aminao aloha ny foto-kevitrao, vao afaka manazava azy amin’ny hafa ianao.” Hotadidinao ireo hevi-dehibe tokony hampiasaina, raha manome valin-teny ianao any am-pivoriana. Manomàna tsara àry, dia hatoky tena kokoa ianao rehefa mampianatra.
5. Inona no fampiofanana fanampiny omena antsika, mba hahatonga antsika ho mpampianatra mahay?
5 Efa hatrany am-boalohany mihitsy ny Kristianina no niara-niasa, rehefa nanao mpianatra. (Lioka 10:1) Raha azo atao àry, dia miaraha mampianatra amin’ny mpitory efa za-draharaha. Anisan’izany ny mpisava lalana sy anti-panahy ary mpiandraikitra mpitety faritany. Mariho ny fomba ampiasany an’ireo sary sy fanoharana ary fitaovana fampianarana hafa ao amin’ny bokintsika, mba hanazavana ireo fahamarinana ao amin’ny Baiboly. Mangataha soso-kevitra aminy, hoe ahoana no hahatonga anao ho mpampianatra mahay. (Ohab. 1:5; 27:17) Ankasitraho ireny fampiofanana avy amin’Andriamanitra ireny.—2 Kor. 3:5.
6. Inona no tena ilaina mba hahatonga antsika ho mpampianatra ny Tenin’Andriamanitra?
6 Miantehera amin’i Jehovah, ary mandraisa soa avy amin’ny fampiofanana omeny. Ataovy antom-bavaka ny fanirianao handroso. (Sal. 25:4, 5) Ho faly koa ianao hanampy olon-kafa ho lasa mpampianatra ny Tenin’Andriamanitra, toa anao!