Vaovao tsara iray torina amin’ny fiteny maro
TAO amin’ny filazalazany ny amin’ny famantarana ny andro farany, i Jesosy dia nanambara indrindra fa hotorina amin’ny tany manontolo ny vaovao tsaran’ilay Fanjakana. (Matio 24:14). Mamela antsika hahatakatra ny antony tsy maintsy niandrasana izao vanim-potoana misy antsika izao mba hahatanterahan’io asa io any amin’ny firenena rehetra sy amin’ny fiteny maro ny Tantara. Araka ny filazan’ny Petit Larousse, dia tamin’ny taonjato faha-15, izany hoe vao 500 taona monja izay, no namoronan’i Gutenberg ny fomba fanontam-pirinty amin’ny alalan’ny lohavy azo afindrafindra. Hatramin’izay, dia najoro ny fomba famoahana natao hanaovana fanontana amin’ny ambaratonga lehibe izay mamela ny hanapariahana pejy natao pirinty izaitratra.
Tsara ny mitadidy fa talohan’io famoronana io dia zavatra tsy fahita firy ny Baiboly satria voatery nadika tanana. Nitaky asa goavana io fomba fanaovan-javatra lafo vidy io. Nahaforona dingana iray lehibe fandrosoana àry ny fahitana ny milina fanontam-pirinty misy lohavy mivohitra sy mitovy haavo (presse typographique) izay nanjary nahafahana nahazo Baiboly sy zavatra vita an-tsoratra ara-baiboly amin’ny fiteny rehetra.
Fandrosoana mahatalanjona no efa vita teo amin’ny sehatry ny fanaovam-pirinty sy ny fanontana, hatramin’ny 1914. Amin’izao andro izao dia efa nanolo saika hatraiza hatraiza ireo milina fanaovam-pirinty taloha misy lohavy mivohitra sy mitovy haavo ireo milina fanaovam-pirinty “offset”.
Vao haingana kokoa, dia nanafaingana io fitrangan-javatra io ny fahatongavan’ny “informatique”. Hatramin’izay, ireo soratra, ireo tsindrimpeo ary ireo evan’ny soratra tany am-piandohana atao an-tsary sy an’ohatra hafa (symboles pictographiques) dia tehirizina ao anatin’ny ôrdinatera ary azo ampiasaina avy hatrany amin’ny fanindriana amin’ny rantsantanana fotsiny ny fitendrena. Nanamora be dia be ny famoahana zavatra vita an-tsoratra ho an’ny olona samy hafa fiteny maneran-tany izany.
Tamin’ny 1979, ny Fikambanana Watchtower dia niroso tamin’ny ilay antsoina hoe tetikasa MEPS (litera voalohany amin’ny teny anglisy hoe “système électronique de photocomposition multilingue”). Tsy manamboatra afa-tsy fandaharana ho an’ny fiteny vitsivitsy monja ireo fikambanana ara-barotra, satria ny zavatra ahin’izy ireo dia ny hanao petra-bola ahazoana tombony. Tsy toy izany no zava-kendren’ny Fikambanana Watchtower. Nilaza tokoa ny Baiboly fa tokony hotorina “amin’izay monina ambonin’ny tany sy amin’ny firenena sy ny fokom-pirenena sy ny samy hafa fiteny ary ny olona rehetra” ny vaovao tsara. — Apokalypsy 14:6.
Maro tamin’ireo sampana 93 maneran-tany àry no nampandraisina anjara tamin’ny fandaharam-pikarohana iray momba ireo toetra mampiavaka ireo fiteny samihafa. Nosokajina ireo soratra sy tsindrimpeo rehetra ilaina amin’ny famoahana zavatra vita an-tsoratra amin’ireny fiteny ireny, tsy nohadinoina koa ireo fitsipika manokana mifehy ny fanasarahan-teny. Nilaina avy eo ny nanao an-tsary ny tarehin-tsoratra tsirairay avy, ny nitahiry izany amin’ny “langage informatique” ary ny nanamboatra azy amin’ny endriny tena izy. Nitaky asa tamim-pitandremana aman-taonany maro izany. Ny vokany dia ny hoe mbola tsy navoaka an-tsoratra tamin’ny fiteny maro ohatra ny amin’izao fotoana izao mihitsy ny hafatr’ilay Fanjakana, ary tsy mitsaha-mitombo ny isany.
Tamin’ny voalohany, dia ny Fikambanana Watchtower ihany no namolavola sy nanamboatra ireo ôrdinatera sy ireo fandaharana atao ao anatiny. Nisy Vavolombelon’i Jehovah tonga avy any amin’ny vazan-tany efatra mba hiara-miasa amin’ilay raharaha. Nanjary nisy fifanakalozam-pahaizana, nefa koa fifampaherezana. (Romana 1:12). Toy ny hoe niverina kely indray ny tantaran’ny tilikambon’i Babela saingy amin’ny zotra mifanohitra. Nahazo fampiofanana lalina ireny mpiasa ampy fahaizana ireny, ary avy eo dia nalefa tany amin’ireo sampana maneran-tany niaraka tamin’ny fitaovana. Manana fomba fanontana iraisam-pirenena izay mamela azy ireo hamoaka zavatra vita an-tsoratra amin’ny fiteny mihoatra ny 200 àry ny Vavolombelon’i Jehovah amin’izao fotoana izao any amin’ireo tany sy nosy maherin’ny zato.
Torina marina tokoa amin’ny firenena rehetra sy amin’ny fiteny rehetra ny vaovao tsaran’ilay Fanjakana amin’izao andro farany izao araka ny nanambaran’i Jesosy azy.