Ilay Fanohanana Izay Misy Vidiny

“TSY maintsy niady tamin’ny tahotra ny ho faty sy ireo fe-potoan’ny fahaketrahana aho”, hoy ny fitantaran’i Virginia, Vavolombelon’i Jehovah iray any Arzantina. Nampiharana mastectomie tanteraka sy fanesorana ireo fihary atodin’aina roa izy tamin’ny adiny tamin’ny kanseran’ny nono.a

Eny tokoa, ny tahotra ny ho faty vokatry ny kanseran’ny nono dia hita hatraiza hatraiza. Io tahotra io, miaraka amin’ny fahatahorana ny ho kilemaina sy hamoy izay mifandray akaiky amin’ny maha-vehivavy ary ny fahafahana mampinono, dia afaka mandrava ara-pihetseham-po ny fiainan’ny vehivavy iray. Afaka mahatonga azy hilentika ao anatin’ny famoizam-po lalina ireo fahatsapana ho irery manenika azy. Ahoana no azo itsimbinana azy amin’izany famelezana mafy ara-pihetseham-po izany?

Mila fanohanana

“Mila fanohanana izy!”, hoy ny navalin’i Joan avy any Etazonia. Matin’ny kanseran’ny nono ny reniny sy ny renibeny, ary miatrika io ady izay natrehin’izy ireo io izy ankehitriny. Eo no fotoana ahafahan’ireo mpianakavy sy namana tsy mivadika manolotra fanohanana sy fanampiana mampionona. I Terry vadin’i Joan dia tonga mpanohana mahery sy manorina ho azy. Izao no fanazavan’i Terry: “Ny toerako, araka ny fahitako azy, dia ny ho hery mitondra fandanjalanjana. Nilaiko ny nanampy an’i Joan hanao fanapahan-kevitra mahakasika fomba fitsaboana izay hanome azy fatokiana sy tanjaka hoenti-miady sy tsy hilavoana lefona. Zavatra izay tsy maintsy nianaranay noresena ny fahatahorany fandidiana ny kansera, ary niezaka ny hahazo antoka aho fa noresahina tamin’ireo fiarahanay nidinika tamin’ireo dokotera ireo fanontaniany sy fahatahorany.” Nanampy teny toy izao i Terry: “Zavatra azontsika atao ho an’ny fianakaviantsika sy ireo namantsika kristiana izay tsy manana ny fanohanan’ny fianakaviana izany. Afaka mijery sy mihaino ary miteny eo amin’ny toerany isika eo anoloan’ireo mpiasan’ny fitsaboana.”

Ilaina homena an’ireo izay mpitovo na maty vady ny fiheverana manokana. Hoy i Diana, avy any Aostralia, amintsika: “Maty taorian’ny fandidiana ny kanserany ny vadiko, dimy taona lasa izay, kanefa nanampy ahy hanonitra ny fahabangany ireo zanako. Tsara fanahy izy ireo saingy tsy nentin’ny fihetseham-pony. Nanome ahy tanjaka izany. Notontosaina tamin’ny fomba haingana sy nilamina ny zava-drehetra.”

Misy fiantraikany ara-pihetseham-po eo amin’ny fianakaviana manontolo ny kanseran’ny nono. Koa ny rehetra dia mila fiahiana sy fanohanana mampiseho fitiavana avy amin’ny hafa (indrindra fa avy amin’ireo rahalahiny sy anabaviny ara-panahy, raha Vavolombelon’i Jehovah izy ireo).

Izao no fanazavan’i Rebecca, avy any Etazonia, izay niady tamin’ny kanseran’ny nono ny reniny: “Anisan’ny fianakavianao koa ny kongregasiona, ary misy vokany lehibe eo amin’ny fihetseham-ponao ireo zavatra ataon’izy ireo. Na dia maro aza no tsy niombon-kevitra manokana tamin’ny fomba fitsaboana tsy mahazatra nofidin’ny reniko, dia nanohana anay ara-pihetseham-po izy ireo tamin’ny fiantsoana an-telefaonina sy tamin’ny fitsidihana. Tonga mihitsy aza ny sasany nanampy tamin’ny fanomanana ny sakafony manokana. Nandamina ny fampifandraisana anay sy ny Efitrano Fanjakana an-telefaonina ireo loholona mba tsy ho tapaka amin’ny fivoriana mihitsy izahay. Nandefa carte nisy firarian-tsoa niaraka tamin’ny fanomezana ara-bola mihitsy aza ny kongregasiona.”

Niaiky toy izao i Joan: “Hatramin’izao, rehefa mieritreritra ny amin’ny fitiavana nasehon’ireo anadahiko sy rahavaviko ara-panahy aho, dia mihetsi-po aoka izany! Nandritra ny fito herinandro, dimy andro isan-kerinandro, dia nifandimby ireo rahavaviko be fitiavana nitondra ahy nandroso sy niverina nankany amin’ny hopitaly mba hanaraka fitsaboana. Ary fandehanana 150 kilaometatra nandroso sy niverina izany! Toy inona moa ny fisaorako an’i Jehovah noho ny fitahiana tondraka manana an’io fianakavian’ny mpirahalahy kristiana io!”

Ny fomba hafa ahafahantsika rehetra mampahery sy manohana dia ireo resaka manorina ataontsika. Ilaina ny mitandrina mba tsy hampitondrantsika tsy nahy fahoriana amin’ny firesahana maharitra momba ireo zavatra tsy manorina. Nanazava toy izao i June avy atsy Afrika Atsimo: “Tsy azo antenaina ny hilazan’ny olona iray izay tsy voan’ny kansera ny tokony holazaina mihitsy. Raha ny amiko dia heveriko fa tsara kokoa ho an’ny hafa ny tsy hiresahana momba ireo olona voan’ny kansera raha tsy hoe tsara angaha ny fiafarany.” Miombon-kevitra amin’izany i Noriko avy any Japana: “Raha miresaka amiko momba ny olona iray izay sitrana sady tsy niverenan’ny kansera ny olona, amin’izay aho dia manana fanantenana koa fa angamba ho tahaka azy ireny.”

Tadidio fa aleon’ny vehivavy sasany tsy miresaka momba ny fahasalamany amin’ny fotoana rehetra. Ny hafa anefa, noho ny fiheverana izay mahasoa azy manokana, dia mila ny miresaka momba ny fanandraman-javatra hitany amin’ny kanseran’ny nono, indrindra fa amin’ireo izay akaiky azy. Ahoana no hahafantaran’ny olona iray izay zavatra mahasoa indrindra tokony hatao? Izao no fanipazan-kevitr’i Helen, avy any Etazonia: “Anontanio ilay olona raha tiany ny hiresaka momba izany, ary avelao izy no hiresaka.” Eny, “aoka ianao ho vonona ny hihaino”, hoy i Ingelise avy any Danemark. “Aoka ianao ho eo fotsiny mba hanohana azy ara-pihetseham-po, mba tsy havela ho irery miaraka amin’ny alahelony izy.”

Fiezahana hanana fomba fijery manorina

Afaka mahatonga ny marary iray ho trotraka sy ho valaka mandritra ny herinandro, volana na taona maro ny fitsaboana ny kanseran’ny nono. Ny iray amin’ireo fisedrana lehibe indrindra ho an’ny vehivavy iray voan’ny kanseran’ny nono dia mety ho ny fiatrehana ilay zava-misy hoe tsy afaka manao zavatra betsaka toy ny teo aloha izy. Ny fanekena ny fetran’ny vatany dia hidika ho fitsitsiana aina sy fialana sasatra mandritra ny andro.

Rehefa mitranga ny fahaketrahana, dia ilaina ny mandray fepetra haingana mba hihazonana toe-tsaina manorina. Toy izao no fitantaran’i Noriko ny fanandraman-javatra hitany: “Nahatonga ahy ho ketraka ny fitsaboana tamin’ny hormonina. Tamin’izany toe-javatra izany dia tsy afaka nanao ny zavatra tiako aho, ary nanomboka nahatsapa tena ho tsy nilain’i Jehovah sy ny kongregasiona kristiana. Raha nanjary tsy nanorina kokoa ny fisainako, dia nitamberina tao an-tsaiko ireo fijaliana farany nodiavin’ireo mpianakaviko izay matin’ny kansera. Nangeja ahy ny tahotra raha mbola nanontany tena aho hoe: ‘Afaka miaritra izany toy ny nataon’izy ireo ve aho?’ ”

Nanohy ny teniny toy izao i Noriko: “Tamin’izay fotoana izay no nanaovako fiezahana mba hanitsy ny fisainako tamin’ny fampiasana ireo zavatra vita an-tsoratra avoakan’ny Vavolombelon’i Jehovah, mba hieritreretako ny fomba fijerin’i Jehovah ny fisiantsika. Nianarako fa ny fifikirana amin’Andriamanitra dia aseho, tsy amin’ny habetsahan’ny asa vita, fa amin’ny antony manosika anaovana izany. Koa satria tiako ny hampifaly an’i Jehovah amin’ny toe-poko sy ny toe-pisainako, dia nanapa-kevitra aho fa tokony hanompo azy amim-pifaliana sy amin’ny fo manontolo na dia tsy afaka manao afa-tsy zavatra kely aza aho eo amin’ny fanompoana kristiana.”

Ny fisalasalana maharitra eo amin’ny vehivavy maro miady amin’ny kanseran’ny nono dia afaka mikiky ny fomba fijery manorina. Nanazava i Diana fa izay nanampy azy indrindra dia ny famenoana ny fony sy ny sainy tamin’ireo zavatra mahafinaritra rehetra nomen’i Jehovah Andriamanitra azy: “Ny fianakaviako, ireo namako, ny mozika kanto, ny fijerena ny ranomasina mahatalanjona sy ny masoandro mody kanto.” Nampirisika toy izao indrindra izy: “Miresaha amin’ny hafa momba ny Fanjakan’Andriamanitra. Ary mambole faniriana mafy tokoa an’ireo toe-piainana izay hanjaka eto an-tany eo ambany fanapahan’ilay Fanjakana, izay tsy hisian’ny aretina intsony!” — Matio 6:9, 10.

Nahazo ny tanjaka hiadiana amin’ny fahaketrahana koa i Virginia tamin’ny fisaintsainana ny zava-kendreny eo amin’ny fiainana: “Tena tiako ny ho velona satria manana izany asa sarobidy hatao izany aho.” Raha ny amin’ireo fotoana sarotra sy ipoiran’ny tahotra, dia hoy izy: “Mametraka ny fitokiako feno amin’i Jehovah aho, amin’ny fahafantarana fa tsy hahafoy ahy mihitsy izy. Ary eritreretiko ilay andininy ao amin’ny Baiboly ao amin’ny Salamo 116:9, izay manome toky ahy hoe: ‘Handeha eo anatrehan’i Jehovah eo amin’ny tanin’ny velona aho.’ ”

Nampifantoka ny fanantenany tamin’i Jehovah, ilay Andriamanitry ny Baiboly, ireo vehivavy rehetra ireo. Miantso an’i Jehovah ho “Andriamanitry ny fampiononana rehetra, Izay mampionona anay amin’ny fahorianay rehetra” ny bokin’ny 2 Korintiana, toko voalohany, andininy faha-3 sy faha-4, ao amin’ny Baiboly. Maninjitra ny tanany ve i Jehovah mba hanohanana ireo izay mila fampiononana?

Izao no navalin’i Mieko avy any Japana: “Miaiky mafy aho fa amin’ny fijanonana eo amin’ny fanompoana azy, dia mahazo ny fampiononana sy ny fanampiana maherin’i Jehovah aho.” Hoy koa i Yoshiko amintsika: “Na dia mety ho tsy takatry ny olona aza ny fijaliako, dia mahafantatra ny zava-drehetra i Jehovah, ary miaiky mafy aho fa nanampy araka izay nilaiko izy.”

Hoy i Joan hoe: “Manan-kery hampivoaka anao avy ao amin’ny famoizam-po ny vavaka sady hahatonga anao hiarina indray. Rehefa eritreretiko ny amin’ny fanasitranana lehibe notanterahin’i Jesosy fony izy teto an-tany sy ny fanasitranana feno hataony ao amin’ny tontolo vaovao, dia mampionona ahy toy inona moa ireo teny ireo!” — Matio 4:23, 24; 11:5; 15:30, 31.

Moa ve ianao afaka maka sary an-tsaina tontolo iray tsy hisy kanseran’ny nono, ary raha ny tena izy, dia tsy hisy aretina mihitsy? Izany no fampanantenana nomen’i Jehovah, ilay Andriamanitry ny fampiononana rehetra. Miresaka ny amin’ny fotoana izay tsy hisian’ny olona hilaza intsony hoe marary izy, ny Isaia 33:24. Ho tanteraka tsy ho ela izany fanantenana izany rehefa hampihatra ny fanapahany feno amin’ny tany ny Fanjakan’Andriamanitra eo am-pelatanan’i Kristy Jesosy Zanany, ka hanesotra ireo antony rehetra mahatonga aretina sy alahelo ary fahafatesana! Nahoana no tsy mamaky momba izany fanantenana mahatalanjona izany ao amin’ny Apokalypsy 21:3 ka hatramin’ny faha-5? Manàna herim-po mba hiatrika ny hoavy miaraka amin’ilay fanohanana izay manome ny tena fampiononana.

[Fanamarihana ambany pejy]