Manontany ny Tanora Hoe...

Nahoana no Miresaka Momba An’Andriamanitra?

“Samy manana ny fivavahany avy ny olona rehetra. Tsy tokony hanandrana hanery ny hafa hino ny fiheveranao momba an’Andriamanitra ianao.” — Racish, 14 taona, Guyana.

“Misalasala aho hiresaka momba an’Andriamanitra satria mahamenatra ahy ny fanesoana hanaraka izany.” — Rohan, 17 taona, Guyana.

“Tokony hiresaka momba an’Andriamanitra isika satria izy no Mpamorona antsika ary avy aminy ny aintsika.” — Marco, 13 taona, Alemaina.

MBA henoy ange ny antokona tanora iray miresaka dia azo inoana fa ho tonga amin’izao fanatsoahan-kevitra mampalahelo izao ianao: Tsy ny foto-kevitra be mpitia indrindra eo amin’ny resadresaka ifanaovan’ny tanora velively ny hoe Andriamanitra, amin’ny ankapobeny. Miresaha ny amin’ny spaoro, ireo fitafiana, ireo sarimihetsika nivoaka farany indrindra, na ny tsy lahy na tsy vavy tahaka ny tena, dia mazàna no hitarika fifanakalozan-kevitra mafana ianao. Fa mba sahia kosa miresaka an’Andriamanitra hoe, na dia izany aza, dia mety ho tonga haingana ny fanginana be mahasanganehana.

Tsy mino an’Andriamanitra tsotra izao ny tanora sasany. Mety hanjohy hevitra izy ireo hoe satria tsy afaka mahita azy izy ireo, dia tsy maintsy tsy misy izy — toa fandaniam-potoana ny firesahana momba azy. Na dia izany aza, ireo tsy mpino an’Andriamanitra dia vitsy an’isa tokoa eo amin’ireo tanora. Araka ny fanadihadiana iray nataon’i Gallup, dia sahabo ho 95 isan-jaton’ireo tanora amerikana no tena mino an’Andriamanitra. Raha ny tena izy, dia nanatsoaka hevitra toy izao i Gallup: “Ho an’ny tanora maro, ilay Andriamanitra inoan’izy ireo dia tsy fotopoto-pitsipika manjavozavo ao an-tsaina fotsiny, fa Andriamanitra iray manana ny maha-izy azy izay mandinika ny ataon’izy ireo, ka mamaly soa na manasazy azy ireo araka izany.” Nahoana àry ny tanora maro aoka izany no misalasala hiresaka momba izay inoan’izy ireo?

Ny antony mampiahotra ny sasany

Toa heverin’ny maro ho tsy fahalalam-pomba tsotra izao ny firesahana momba ireo raharaham-pinoana ary ho tsara indrindra raha tazonina ho an’ny tena samirery ireo fiheverana ara-pivavahana. Toa sakodiavatra ny tanora sasany amin’ny fieritreretana fotsiny ny hoe hifanakalo hevitra momba an’Andriamanitra. ‘Tsy lasa izany’, hoy ny fanjohian-kevitr’izy ireo.

Na inona na inona fiheveran’ireo mitovy taona aminao, dia inona ny toerana tananao eo amin’io raharaha io? Mifanentana indrindra izany fanontaniana izany raha toa ka notezaina tamin’ny naha-Vavolombelon’i Jehovah ianao. Nahoana? Satria ny fanaovana fanambarana, ny firesahana amin’ny hafa momba an’Andriamanitra, no tena votoatin’izany finoana izany! — Isaia 43:9, 10; Matio 24:14.

Na dia izany aza, ny Vavolombelona tanora sasany, izay kivy noho ny fankahalana hitan’izy ireo indraindray, dia miahotra ny handray anjara amin’ny asa fitoriana ampahibemaso — na mandray anjara noho ny fampirisihan’ny ray aman-drenin’izy ireo fotsiny. Mandray anjara amin’io asa io ny hafa saingy maniry any am-po tsy miloaka any mba tsy hisy naman’izy ireo any an-tsekoly hahita azy ireo manao izany. Any an-tsekoly, ny sasany dia miezaka ny hihazona ho tsiambaratelo ireo zavatra inoany ara-pivavahana. Matetika izany dia noho ny fahatahoran’izy ireo ny fanesoan’ireo mpiara-mianatra. “Natahotra ny hiresaka momba an’Andriamanitra aho”, hoy ny fieken’i Ryan tanora, “satria ho nanome anaram-bosotra ahy ireo namako ary tsy nanana herim-po hanohizana ny resadresaka aho.”

Ankoatra izany dia ao ireo izay miahotra noho ny fahatahoran’izy ireo sao tsy afaka miaina mifanaraka amin’ny fomba feno amin’ireo fari-pitsipiky ny Baiboly izy ireo. Noho ny fahatsapana ny fanintonan’ny “filan’ny tanora fanahy”, dia manjohy hevitra izy ireo fa ho tsara indrindra ny tsy hampahafantarany ny tenany ho Kristiana sao dia manao zava-dratsy izy ireo. — 2 Timoty 2:22.

Tsy miresaka momba an’Andriamanitra ny sasany satria mahatsiaro tena ho tsy ampy fahaizana tsotra izao. Toy izao no nilazan’i Wilton, 19 taona, izany: “Hitako ho sarotra ny niresaka momba an’Andriamanitra tamin’ireo mpiara-miasa amiko satria noheveriko ho tsy ampy fahaizana mba hanaporofoana ireo zavatra lazaiko momba azy aho. Noheveriko fa raha iadiana hevitra momba ireo zavatra inoako aho, dia tsy hanana valiny mahafa-po.”

Adidy kristiana

Moa ve ianao nety ho niahotra hiresaka momba an’Andriamanitra noho ny antony mitovy amin’izany? Raha izany no izy, dia tsy irery ianao. Niady mafy tamin’ny fihetseham-po toy izany ny tanora hafa. Kanefa, maro no nanjary nahatakatra fa, na dia eo aza ireo zava-drehetra izay mety hanakivy ny olona iray tsy hiresaka momba an’Andriamanitra amin’ny hafa, dia misy ireo antony manery ny hanaovana izany. Inona avy no sasany amin’izany?

Nilaza izany tsara i Marco tanora, izay voaresaka teo am-piandohana, rehefa nilaza izy fa Andriamanitra “no Mpamorona antsika ary avy aminy ny aintsika”. (Apokalypsy 4:11). Eny, fanomezana sarobidy ny aina. Toy izao no nilazan’ny mpanao salamo an’Andriamanitra: “Ao aminao no misy loharanon’aina”. (Salamo 36:9). Noho ianao nahazo io fanomezana io, moa ve tsy tokony hampiseho fankasitrahana noho izy io ianao?

Ny fomba iray ampisehoana fankasitrahana dia ny fiderana an’i Jehovah Andriamanitra eo anatrehan’ny hafa. Izy no Loharanon’ny masoandro, ny volana, ny orana, ny rivotra fohintsika, sy ny sakafo hanintsika. (Asan’ny Apostoly 14:15-17). “Ny fanomezan-tsoa rehetra sy ny fanomezana tanteraka rehetra dia avy any ambony”, hoy i Jakoba mpianatra. (Jakoba 1:17). Moa ve ianao misaotra an’Andriamanitra noho ireny fanomezana ireny? (Kolosiana 3:15). Inona no fomba tsara kokoa hilazana ny fisaoranao noho ny firesahana momba an’Andriamanitra? — Lioka 6:45.

Raha ny marina anefa, Andriamanitra dia mandidy antsika hiresaka momba azy. Nandidy ny Kristiana toy izao i Jesosy Kristy Zanany: “Koa mandehana hianareo, dia ataovy mpianatra ny firenena rehetra”. (Matio 28:19, 20). Tsy hoe tsy tafiditra amin’ny andraikitra handray anjara amin’io asa io ny tanora. Mandidy toy izao ny mpanao salamo: “Miderà an’i Jehovah (...), na ny zatovolahy, na ny zatovovavy, na ny antitra, na ny tanora, — samia midera ny anaran’i Jehovah avokoa, fa ny anarany ihany no misandratra; ambonin’ny tany sy ny lanitra ny voninahiny.” (Salamo 148:7, 12, 13). Kanefa, tsy voatery hihevitra izany fanendrena izany ho toy ny enta-mavesatra ianao. Raha ny marina, dia tombontsoa izany — afaka ny ho anisan’ny “mpiara-miasa amin’Andriamanitra” tokoa ianao. — 1 Korintiana 3:9.

Ahoana raha tsy mahatsapa tena ho ampy fahaizana tsotra izao ianao? Nanana fihetseham-po toy izany ny mpaminany Jeremia tamin’ny andron’ny Baiboly. “Indrisy, Jehovah Tompo ô!”, hoy izy. “Indro, tsy mahay mandaha-teny aho, fa mbola zaza.” Ahoana ny valin-tenin’i Jehovah? “Aza manao hoe: Mbola zaza aho; fa handeha amin’izay rehetra hanirahako anao hianao, ary izay rehetra handidiako anao no hambaranao.” (Jeremia 1:6, 7). Noho ny fanampian’i Jehovah, dia nanao izany indrindra i Jeremia nandritra ny 40 taona!

Tahaka izany koa ny an’ny Kristiana amin’izao andro izao, fa ‘ny mahatonga antsika hahafeno fepetra tsara dia avy amin’Andriamanitra’. (2 Korintiana 3:5, NW ). Na dia ilay karazan’olona saro-kenatra, tsy be teny, hatrany an-kibon-dreny aza ianao, dia afaka manampy anao hanana ny herim-po hitenenana Andriamanitra. Ao anatin’ny kongregasiona kristiana dia misy fandaharana maro izay afaka manampy anao hanjary “hahafeno fepetra tsara” kokoa amin’ny maha-mpampianatra ny Tenin’Andriamanitra. Raha tsapanao fa mila fanampiana ny tenanao, nahoana no tsy miresaka amin’ny iray amin’ireo mpiandraikitra ao amin’ny kongregasiona? Mety ho raharaha momba ny fanamboarana fandaharam-pianarana manokana ny Baiboly fotsiny izany na ny fiaraha-miasa amin’ny olona iray ampy fanandraman-javatra kokoa.

Izay azonao vitaina

Afaka manome anao fahatsapana ho nahavita zavatra tokoa ny firesahana momba an’Andriamanitra. Voalohany aloha, dia maro amin’ireo mitovy taona aminao no eo am-pikarohana vahaolana amin’ireo zava-manahirana eo amin’ny fiainana, mila fanampiana amim-pamoizam-po. Tsy manana fitarihan-dalana izy ireo ary tsy manana fahitana mazava ny hoavy. Manontany tena izy ireo hoe: ‘Nahoana no eto isika? Ho aiza isika? Nahoana no feno zava-manahirana aoka izany izao tontolo izao?’ Amin’ny maha-Kristiana anao, dia manana ny valiny ianao, ary azo inoana fa tsara toerana indrindra mba hampita izany fahalalana izany amin’ireo mitovy taona aminao ianao. Afaka mifandray aminao izy ireo, ary azo inoana fa aleon’izy ireo miresaka amin’ny olona mitovy taona aminy toy izay amin’ny olon-dehibe iray.

Marina fa hiatrika fandavana ianao indraindray. Kanefa, mety hahita olona vonona handray ny hafatra raketin’ny Baiboly koa ianao. Nipetraka tao anatin’ny aotobisy iray ny Vavolombelona tanora iray sady namaky ilay bokiny hoe Manontany ny Tanora — Valiny Mandaitra.a Nanomboka namaky niaraka taminy ny zazalahy iray nipetraka teo anilany. “Boky tsara izy izany!”, hoy ny fihiakan’ilay zazalahy. “Miresaka be dia be momba an’Andriamanitra itỳ boky itỳ. Tsy liana ny amin’ny fivavahana ny ankamaroan’ny olona.” Nohararaotin’ilay Vavolombelona tanora izany mba hanaovana fifanakalozan-kevitra lalina momba ny foto-kevitra ny amin’ny anaran’Andriamanitra.

Marina fa rehefa mampahafantatra ny tenanao ho Kristiana ianao, dia voatery mitondra tena tahaka ny Kristiana iray. (1 Petera 2:12). Kanefa, tsy hanao afa-tsy ny hampino bebe kokoa ny hafatra entinao ny fitondran-tena kristiana tsara dia tsara. Diniho izay nitranga tamin’ny tanora iray atao hoe Eric. Nanaitra ny sainy ny fitondran-tena tsara dia tsaran’ireo tanora Vavolombelona tao an-tsekoliny. Namoha ny fahalianany hianatra misimisy kokoa momba an’Andriamanitra izany. Natomboka ny fianarana Baiboly niaraka taminy, ary Kristiana vita batisa izy amin’izao andro izao, manompo any amin’ny foibe iraisam-pirenen’ny Vavolombelon’i Jehovah any New York.

Afaka manampy anao koa ny firesahana momba an’Andriamanitra! Afaka miaro koa izany. Rehefa fantatr’ireo namanao fa Vavolombelon’i Jehovah ianao, dia maro no hanaja anao. Mety tsy hirona firy ny hanery anao handray anjara amin’ny fanaovan-dratsy izy ireo rehefa ekeny fa manana fari-pitsipika ambony ianao sady fantany fa hanao fanambarana amin’izy ireo tokoa ianao ho setrin’izany fanerena izany.

Mazava ho azy fa tsy midika akory izany hoe isaky ny miloa-bava ianao dia tsy maintsy manonona andinin-teny. Mbola ho liana koa amin’ny spaoro, ny fitafiana, na ny mozika ianao ary haniry ny hiresaka momba ireny zavatra ireny indraindray. Kanefa tadidio izao: “Avy amin’ny haben’ny ao am-po no itenenan’ny vava.” (Matio 12:34). Raha tena ao am-ponao tokoa ny fitiavana an’Andriamanitra, dia mandeha ho azy ny hanirianao hiresaka momba azy.

[Fanamarihana ambany pejy]

[Sary, pejy 16]

Menatra ve ianao hitan’ireo mpiara-mianatra aminao rehefa eny amin’ny asa fitoriana ampahibemaso?