Famoronana Asa any Amin’ireo Tany eo An-dalam-pandrosoana
AVY AMIN’NY MASOIVOHON’NY MIFOHAZA! ANY SÉNÉGAL
MATY ny rain’ny zatovovavy iray fony izy mbola kely, namela ny reniny maro anaka, nisy zaza valo. Efa mihantitra ankehitriny ny reniny, hany ka tsy maintsy mandray anjara amin’ny famelomana ny fianakaviana ilay zatovovavy amin’ny fitadiavana asa. Foana hatreo ilay nofinofiny hanohy fianarana. Tsy maintsy miasa izy, na dia tsy manana fahaizana manao zavatra na tsy nahavita fianarana ara-dalàna aza.
Mahazatra ny tarehin-javatra toy izany any amin’ireo tany eo an-dalam-pandrosoana. Zara raha misy ny asa, na dia ho an’ireo nianatra tany amin’ny oniversite aza. Na dia izany aza, amin’ny fananana fahatapahan-kevitra sy fahaizana mamoron-javatra, dia maro no afaka namorona asa ho an’ny tenany. Ny asa toy izany dia mety tsy hahatonga olona iray hanankarena, kanefa dia milaza toy izao ny Baiboly ao amin’ny 1 Timoty 6:8: “Raha manan-kanina sy fitafiana isika, dia aoka hianina amin’izany.”
Amin’ny fitadidiana ao an-tsaina io torohevitra manampy hahay handanjalanja io, dia aoka isika handinika fomba sasany mampiseho fahaiza-mahita hevitra izay iveloman’ny Kristiana sy ahombiazany any amin’ireo tany eo an-dalam-pandrosoana.
Varotra hani-masaka — Araka ny lamody afrikana
Be mpitady foana ny hani-masaka. Eto Afrika Andrefana, ireo vehivavy vonona ny hanombo-javatra dia nahita fomba maro samihafa mahavariana mba hanodinana io zava-misy io ho fahazoana tombony. Ny sasany, ohatra, dia manorina fialofana kely eny akaikin’ny toerana anaovana fanorenana iray, ary dia mahandro sakafo antoandro ho an’ireo mpiasa. Ny hafa manolotra sakafo ho an’ireo izay eny an-dalana mandeha hiasa ny maraina. Manangana latabatra kely misy dabilio izy ireo, mampangotraka rano eo amin’ny fatana arina, ary mandroso sakafo maraina tsotra: kafe mafana miaraka amin’ny mofo vaovao sy dibera. Ny takariva izy ireo dia manokatra fivarotana indray ary mandroso sakafo maivana ho an’ireo mpiasa, amin’ny faran’ny andro. Ny fitantanana io karazana toeram-pisakafoana io dia midika ho fiasana manana fandaharam-potoana henjana, kanefa izany dia mamela ireo tia miasa hahazo vola ivelomana.
Eo koa ny fahafahana hivarotra tsakitsaky. Misy vehivavy sasany mahita toerana be olona eny akaikin’ny tsena, dia manendy voanjo izy. Misy mividy mora foana koa ireo fatayas, mofo kely misy hena izay aroso miaraka amin’ny saosy masiaka. Toy izany koa ireo mofo nosesehina hena misy saosin-kena be zava-manitra. Ireny dia zavatra mora amidy any amin’ireo tany afrikana toa an’i Gambie sy i Mali.
Any Guinée-Bissau sy Sénégal, dia tanora maromaro ihany, izay Vavolombelon’i Jehovah ao amin’ny fanompoana manontolo andro, no mamelon-tena amin’ny fandrahoana sy fivarotana zavatra be mpitia hafa iray: mofomamy madinika. Manazava toy izao i Moses izay mponina ao Dakar, renivohitr’i Sénégal: “Nanompo tamin’ny naha-mpisava lalana manokana [mpitory ny Filazantsara manontolo andro] izahay mivady rehefa nanomboka nanan-janaka. Izao aho dia tsy maintsy mitady fomba hamelomana azy ireo, ka dia tonga tato an-tsaiko ilay hevitra hoe hanao sy hivarotra mofomamy madinika.
“Kely dia kely ny vola nananako mba hanombohana, koa dia tsy maintsy nitandrina aho mba hanavaka ny vola azoko notanana ho toy ny tombony sy ny vola nilaiko haverina tao amin’ilay raharaham-barotra mba hamenoana indray ireo tahiry, toy ny lafarinina sy atody. Ankehitriny aho dia afaka mivarotra mofomamy ampy mba hisahanana ny ankamaroan’izay ilain’ny fianakaviako kely.
“Mba hanampiana, dia manjaitra ato an-trano i Esther vadiko. Izany dia mamela azy ho ato an-trano miaraka amin’ireo zanakay roa lahy kely. Koa izahay roa àry dia samy afaka mikarakara tsara ihany ny fianakavianay, na dia eo aza ny hoe miaina amin’ny fotoan-tsarotra isika.”
Indro misy hevitra hafa iray ho an’ny fandraharahana madinika iray: Koa satria sahirana ny olona miasa ary matetika tsy manam-potoana hanaovana dia lavitra any an-tsena, dia hankany amin’ireo tsenakely eo an-toerana, izay mivarotra voankazo sy legioma, izy ireo. Misy aza tompon’ny tsenakely sasany manatitra entana mihitsy, manatitra legioma vaovao hatrany an-tranon’ireo mpividy. Mety hiely haingana ny hoe manao ny marina sy mivarotra entana tsara ianao. Mitandrema anefa mba tsy hanao lafo loatra, satria hiverina fotsiny any amin’ny tsena mahazatra ny olona raha izany.
Indostria miasa ho an’ny mpanjifa
Raha tsy manintona anao ny fivarotana entana, dia hevero ny hanao asa isan-karazany ho an’ny hafa. Be mpitady foana ny asa an-trano toy ny fanadiovana, ny fandrahoan-tsakafo, ny fanasan-damba sy ny fipasohana. Ary misy fahafahana hafa maro be.
Ohatra, moa ve ianao mipetraka akaikin’ny ranomasina na akaikin’ny tsena fivarotan-trondro? Nahoana raha manolotra ny hanadio ireo trondro — vetivety sady tsy lafo? Ny hany ilainao dia vatan-kazo tsara iray sy antsin-trondro maranitra iray. Ny fanasana fiara dia fanaovan-javatra hafa iray hahazoana tombony. Ny fitaovana ilaina ve? Siny, rano, savony kely, sy lamba tsara iray. Any Dakar, ireo tanora mahay mitady vola dia hita manao io asa io saiky eny amin’ny toeram-pitobian’ny fiara rehetra sy eny amin’ny arabe maro misy alokaloka.
Zara raha misy ve ireo trano manan-drano amin’ny raobine any amin’ny faritra misy anao eo amin’izao tontolo izao? Indraindray ireo vehivavy dia milahatra mandritra ny ora maro eo amin’ny paompin-drano iombonana iray mba hamenoana ny fasiany rano. Avy eo izy ireo dia voatery miloloha ireo koveta mavesatra hatrany an-trano. Maro, noho izany, no vonona ny hanakarama olona mba hanatitra rano ho azy ireny. Ny fomba ahombiazana dia ny fahatongavana eny amin’ny paompin-drano maraina be mba hahafahanao hameno ny fasian-dranonao sy hametrahanao izany eo ambonin’ny kalesy atosika na tarihin’ny ampondra iray. Izao ianao dia vonona ny hanatitra rano any amin’ireo trano na any amin’ny toerana anaovana fanorenana iray.
Nahita fianarana sasany ve ianao? Angamba ianao afaka mampanao cours ankizy madinika mandritra ny faran’ny herinandro. Efa mihahipoka izao ireo lakilasy any amin’ny tany eo an-dalam-pandrosoana, ary misy ray aman-dreny mety ho vonona ny handoa vola mba hahazoan-janany fiheverana manokana.
Ny fahaizana manao zavatra hafa iray mety ho efa anananao koa dia fahaiza-mandrandram-bolo. Koa satria be mpitia tokoa eo amin’ireo vehivavy eto Afrika ny lamodin’ny volo mirandrana, dia misy fahafahana hahazo vola ho an’ny olona havanana amin’io taozavatra io.
Fampiasana fahaizana mahita hevitra
Tamin’ny andron’ny Baiboly, ny vehivavy mahay iray dia afaka nahita fomba feno hakingan-tsaina mba hampidiram-bola. Hoy ny Ohabolana 31:24: “Manao akanjo hariry madinika ravehivavy ka mivarotra izany, ary fehin-kibo no amidiny amin’ny mpandranto.” Mitovy amin’izany koa fa, any amin’ny tany eo an-dalam-pandrosoana, dia maro no mahita fahombiazana amin’ny asa ifarimbonan’ny mpianakavy, na fandraharahana madinika. Ny mpandrafitra iray, ohatra, dia mety hanangana fivarotana kely iray ary hanao akalana sy dabilio ary fanaka an-tokantrano hafa. Ireo fiasana fototra indrindra amin’ny fandrafetana ihany no ilaina. Raha manana fahaizana sasany eo amin’ny fiompiana ianao, dia angamba ianao ho afaka hanomboka fandraharahana amin’ny fiompiana akoho amam-borona ary hivarotra atody sy akoho.
Ny fahaizana mahita hevitra dia zava-dehibe takina mba hanombohana ireo fanaovan-taozavatra madinika. Ny olona sasany dia nanova ireo boaty vifotsy arian’ny olona ho tonga valizy sy vata maro loko. Nisy hafa nanamboatra kapa tamin’ny pne-na fiara. Mbola nisy hafa koa nanamboatra siny tamin’ny chambre à air efa tonta amin’ny fiara. Ny sainao mahay mamoron-javatra manokana ihany no mety hametra ireo zavatra azo atao.
Any amin’ny tany eo an-dalam-pandrosoana, dia sady ilaina ny fahaizana manao zavatra no ilaina ny saina mahay mamoron-javatra mba hahafahana hitoetra ho velona, kanefa dia ilainao koa ny faharetana sy ny toe-tsaina manorina. Aza mora manaiky ho resy. Aoka ianao hahay hampifanara-javatra, ho vonona ny hiova asa raha ilaina izany. Raha hanomboka fandraharahana ianao na hanao asa ho an’ny hafa, dia ataovy azo antoka ny fijerena ireo lalàna sy didy hitsivolana eo an-toerana. Takina amin’ny Kristiana ny fanajana ny lalàna ao amin’ilay tany. — Romana 13:1-7.
Alohan’ny hanandramana hanolotra entam-barotra na hanao asa ho an’ny hafa, dia manontania tena toy izao: ‘Inona avy ireo zavatra ilaina sy ireo fomba eto an-toerana? Manao ahoana ny toe-javatra ara-toe-karena eto an-toerana? Moa ve ireo mpividy ho afaka handoa ny vidin’izay atolotro? Firy ny hafa manolotra entam-barotra na asa atao ho an’ny hafa mitovy amin’izany? Moa ve aho tena manana tokoa ny fahaizana sy ny hery sy ny fanombohan-javatra sy ny fifehezan-tena ary ny fahaiza-mandamin-javatra ilaina mba hanatanterahana io fanaovan-javatra io? Ohatrinona ny vola harotsaka ho tafiditra amin’izany? Ho voatery hisambo-bola ve aho? Ho afaka hanefa ilay trosa ve aho?’
Mety tsara amin’izany ilay fanontanian’i Jesosy ao amin’ny Lioka 14:28 manao hoe: “Iza moa aminareo, raha ta-hanao tilikambo, no tsy mipetraka aloha mihevitra izay ho lany hanaovany izany, na misy hahavitany azy, na tsia?”
Marina fa tsy ny rehetra no manana ny fahaizana na ny toe-po mba hiasana ho an’ny tenany. I Jehovah anefa dia afaka mitahy ny fahavononanao hanombo-javatra sy ny fiezahanao amim-pahatsorana rehefa aroso noho ny antony manosika tsara izany. (Ampitahao amin’ny 2 Petera 1:5.) Koa ataovy izay farany azonao atao mba ahitana asa — na dia tsy maintsy mamorona izany aza ny tenanao!
[Sary, pejy 16, 17]
Ny fanjairana akanjo, ny fanasana fiara, ny fanaterana rano madio, sy ny fanadiovana trondro, dia fomba sasany ahazoan’ny olona fivelomana