Ny Fikatsahana Fanambinana Ara-nofo
AVY AMIN’NY MASOIVOHON’NY MIFOHAZA! ANY TAÏWAN
‘TSY mahavidy ny fahasambarana ny vola!’ Na dia saika miombon-kevitra amin’izany filazana izany aza ny ankamaroan’ny olona, dia maro amin’izy ireo no mbola mikatsaka tsy an-kijanona harena ara-nofo ihany ho toy ny fomba hahazoana fiainana mahasambatra kokoa. Ary maninona moa? Rehefa dinihina, dia toa miankina amin’ny fahombiazana sy ny fanambinana ara-nofo ny vahaolana amin’ny zava-manahirana ny olombelona maro aoka izany.
Alao sary an-tsaina fotsiny ange hoe ho hafa toy inona moa izao tontolo izao raha niaina tao amin’ny fanambinana ara-nofo ny lehilahy sy ny vehivavy ary ny ankizy rehetra! Ho efa lasa ny fanivaivana sy ny fijalian’ireo olona an-tapitrisany maro izay miaina ao amin’ny faritanàna feno mahantra eo amin’izao tontolo izao. Ho efa lasa koa ny zava-manahirana ny olona tsy manan-kialofana, zava-manahirana mamely ny firenena rehetra, na manankarena na mahantra, ankehitriny.
Ary ahoana ny amin’ny fahasalamana tsara, izay zava-dehibe tokoa amin’ny fahasambarana? Na dia mandroso manao dingan-dava aza ny siansa ara-pitsaboana, dia olona mihamaro hatrany no mahita fa tsy takatry ny volan’izy ireo ny saran’ny fitsaboana. Etsy an-danin’izany, dia mbola iainan’ny olona an-tapitrisany maro isan’andro ny hanoanana sy ny tsy fahampian-tsakafo. Raha toa ka nanjaka naneran-tany ny fanambinana ara-nofo, dia ho afaka nanana fiainana mahasalama kokoa, ary araka izany, dia mahasambatra kokoa ny rehetra — sa tsy izany?
Na dia ny tany mihitsy aza dia handray soa. Amin’ny fomba ahoana? Simban’ny loto mahafaty, izay ateraky ny fandoroana zavatra fitaina (toy ny kitay, ny arina) amin’ny ampahany, ny tontolo iainana eto an-tany ankehitriny. Kanefa, ny antony iray tononina amin’ny tsy fikarohana ny teknolojia ilaina mba hampiasana endrika angôvo madio kokoa, dia hoe an-daniam-bola be loatra izany teknolojia izany. Omen-tsiny koa ny fandripahana ireo alan’ny tany mafana sady mando, fandrahonana lehibe hafa koa ny tontolo iainana, indrindra fa noho ny anton-javatra ara-toe-karena.
Koa satria toa mety ho afaka handamina ny ankamaroan’ireo zava-manahirana antsika sady hanamaivana fijaliana maro tokoa ny fanambinana ara-nofo, dia tsy mahagaga raha nampifandraisin’ny olona hatramin’ny ela tamin’ny fahasambarana ny harena. Ohatra, raha zatra mifampiarahaba hoe “Mirary Taom-baovao Sambatra e!” ireo Tandrefana amin’ny Andron’ny Taom-baovao, ny Sinoa kosa, mandritra ny Taom-baovao araka ny fihodinan’ny volana, dia mifampilaza hoe “Kung hsi fa tsai”, araka ny fomban-drazana, mirary ny ‘hahazoan’izy ireo harena’! Eny, tsy azo lavina fa isika dia miaina eo amin’ny tontolo iray izay hanaovan’ny olona ho laharam-pahamehana ambony be, raha tsy faran’izay ambony indrindra aza, ny fikatsahana fanambinana ara-nofo. Faritana amin’ny habetsahan’ny harenan’ny olona iray matetika ny fahombiazana na ny tsy fahombiazana.
Na dia tsy voatery ho ratsy amin’ny maha-izy azy aza ny fahazoana sy ny fampiasana zavatra ara-nofo, moa ve afaka miantoka ny fahasambarana izy io? Tokony hoheverina ho zava-dehibe ve izy io? Tena fanalahidin’ny tontolo tsara kokoa iray ve ny fanambinana ara-nofo?