Manontany ny Tanora Hoe...

Ahoana no Ahafahako Mankafy Fotoana Mahafinaritra?

“Heveriko fa tena mahavita manao zavatra mahafalifaly maro izahay. Ao amin’ny kongregasionanay, dia tena manao ezaka izahay mba hiaraha-mikorana. Mahavita manao izay mahafalifaly sady mahasoa izahay. Tsy afaka milaza toy izany ny ankamaroan’ireo ankizy eo amin’izao tontolo izao.” — Jennifer.

FIALAM-BOLY — mila azy io ny rehetra indraindray. Milaza ny The World Book Encyclopedia fa ny fialam-boly dia mety “handray anjara lehibe amin’ny fahasalaman’ny olona iray ara-tsaina sy ara-batana” mihitsy aza. Ny Baiboly mihitsy no milaza fa “ao ny andro ihomehezana”, izany hoe fotoana hampifaliana ny tena! — Mpitoriteny 3:1, 4.a

Ny teny hoe “fialam-boly” dia mifandray amin’ny teny latina iray izay midika hoe “mamorona indray, mamerina amin’ny laoniny, mamelombelona”. (Webster’s New Collegiate Dictionary). Mampalahelo fa maro amin’ireo zavatra ataon’ny tanora mba ‘hampifalifaliana ny tenany’ — toy ny fikoranana tsy voafehy na ny fidorohana zava-mahadomelina sy ny fibobohana alkaola na ny fanaovana firaisana andrarana — no tsy mamelombelona velively, fa manimba. Noho izany, dia mety ho tena zava-tsarotra ny mahita fanaovan-javatra mampiala voly izay sady mahafaly no mahasoa. Araka ny voalazan’i Jennifer, voatonona teo am-piandohana, anefa, dia azo atao izany!

Fanaovan-javatra miaraka

Vao haingana izay, ny Mifohaza! dia nanadinadina tanora maromaro momba io foto-kevitra io. Nilaza ny ankamaroany fa mankafy ny fiarahana amin’ny tanora hafa izy ireo. Mahatsapa toy izany koa ve ianao — kanefa matetika no tsy misy manasa? Koa nahoana àry no tsy manao ny dingana voalohany? Milaza toy izao, ohatra, ny zazavavy afrikana tatsimo iray antsoina hoe Leigh: “Raha te hijery mafy sarimihetsika iray aho, dia miantso an-telefaonina ny iray amin’ireo namako, ary mampahafantatra izany amin’ireo namanay hafa izahay.” Mazàna dia mijery ny fampisehoana ilay sarimihetsika alefa aloha be izy ireo. Aorian’izay, dia maka azy ireo amin’ny fiara ny ray aman-dreniny, ary miara-misakafo any amin’ny hotely fisakafoana iray eo an-toerana izy ireo.

Manolotra fahafahana ho amin’ny fampiasan-tena mahasalama sy ny fifaneraserana mahasoa koa ny fanaovana fanatanjahan-tena. (1 Timoty 4:8). Hoy i Roelien tanora: “Voalohany, dia miara-midinika amin’ny fianakaviako ny amin’ny toerana tiako haleha aho, ary avy eo dia manasa antokon’olom-bitsy hiaraka aminay izahay.” Eny tokoa, ireo tanora kristiana dia nahita fanatanjahan-tena mahasoa misy karazana mahavariana, izay azon’izy ireo iarahana mandray anjara amin’ny hafa: fisosana amin’ny skateboard, fitaingenana bisikilety, fanaovana jogging, sy filalaovana tenisy, base-ball, baolina kitra, sy vole, raha tsy manonona afa-tsy vitsivitsy monja aza.

Tsia, tsy mila mandany vola be na mampiasa vola amin’ny fitaovana faran’izay ary fomba ianao mba hankafizana fotoana mahafinaritra. “Izaho sy ny ray aman-dreniko ary ireo namako dia nandany ora maro nahafinaritra nandehanana an-tongotra teny amin’ireo tendrombohitra sy faritra ngazana eny akaikinay”, hoy ny tovovavy kristiana iray. “Ny fivoahana mifoka rivotra madio fotsiny, miaraka amin’ireo namana mahafinaritra dia mahafaly aoka izany!”

Fiaraha-mikorana izay mampandroso

Ho an’ny tanora maro anefa, ny hoe fampifalifaliana ny tena dia midika hoe fankanesana any amin’ny fiaraha-mikorana. “Mankafy ny fanasana namana mba hisakafo sy mba hihaino mozika izahay”, hoy i Aveda tanora. Manana ny toerany eo amin’ny Kristiana ny fiaraha-mikorana. Ny tenan’i Jesosy Kristy mihitsy dia nanatrika sakafo manokana, fampakaram-bady, sy fiaraha-mikorana hafa. (Lioka 5:27-29; Jaona 2:1-10). Toy izany koa, ireo Kristiana tany am-boalohany dia nankafy ireo fotoana niarahan’izy ireo ho amin’ny sakafo sy ny fifaneraserana mampandroso. — Ampitahao amin’ny Joda 12.

Raha mamela anao hampiantrano olona hiaraha-mikorana ny ray aman-dreninao, inona no azonao atao mba hisorohana olana sy mba hahazoana antoka fa hankafy fotoana mahafinaritra ny rehetra? Ny fandaharana mialoha amim-pitandremana no fanalahidiny. (Ohabolana 21:5, NW ). Indro misy ohatra: Fahendrena ny tsy hanasana namana be dia be afa-tsy izay azo arahi-maso araka ny tokony ho izy. Tsy azo inoana firy hoe hivadika ho “korana anaranam-po”, na “fikoranana tsy voafehy”, ny fiaraha-mikorana kely kokoa. — Galatiana 5:21, NW; Byington.

Nampitandremana ireo Kristiana tamin’ny taonjato voalohany mba hanalavitra ny fifaneraserana tamin’ireo izay ‘tsy nitoetra tsara’. (2 Tesaloniana 3:11-15). Ny fomba iray azo antoka fa hanimba fiaraha-mikorana amin’izao andro izao dia ny fanasana tanora fantatra fa tia tabataba sy tsy voafehy. Na dia tianao aza ny hitandrina ny amin’ny olona asainao, dia aza ferana ho ireo namanao ihany izy ireo. “Mihalalaha”, ary ataovy izay hahalalana ny hafa sasany, anisan’izany ireo be taona, ao amin’ny kongregasiona. — 2 Korintiana 6:13.

Hanolotra sakafo maivana ve ianao? Raha izany no izy, dia tsy voatery ho tondraka na andaniam-bola be izany mba hankafizan’ireo vahininao fotoana mahafinaritra. (Lioka 10:38-42). “Indraindray izahay dia miara-mihinana pizza amin’ny alina”, hoy i Sanchia, zazavavy avy atsy Afrika Atsimo. Matetika ireo vahiny no hanolo-tena an-tsitrapo hitondra sakafo vitsivitsy.

Inona avy ireo zavatra sasany azonao atao ao amin’ny fiaraha-mikorana iray — ankoatra ny fijerena televiziona, fihainoana mozika, na fifampiresahana fotsiny? “Mazàna izahay no mandahatra mialoha an’ilay takariva”, hoy i Sanchia. “Nanao kilalao izahay na nangataka olona iray hitendry piano, mba hahafahanay hiara-mihira.” Hoy ny tovolahy afrikana iray antsoina hoe Masene: “Indraindray izahay dia milalao karatra sy dames ary eseky.”

Nilaza toy izao tamin’ny Mifohaza! i Jennifer, voatonona terỳ aloha kokoa: “Manana loholona iray manasa anay hanao kilalao ara-baiboly, izahay, ao amin’ny kongregasionanay. Mila manana fahalalana tsara ny Baiboly ianao raha te hilalao tsara.” Nanontany tanora hafa toy izao ny solontenan’ny Mifohaza!: “Tsy heverinareo ve fa hafahafa ny manao kilalao ara-baiboly?” Saika nihiaka izy ireo namaly hoe: “Tsia!”

“Mahaliana ilay izy”, hoy ny tovovavy iray. “Mahafalifaly ilay izy!”, hoy ny iray hafa. Rehefa atao mba hampifalifalian-tena ny kilalao ara-baiboly, ary voafehy ny toe-tsaina tia fifaninanana, dia afaka ny hahafinaritra sy hanome fanabeazana izy ireny! — Jereo ilay hoe “Des réunions joyeuses et édifiantes”, ao amin’ny Mifohaza! (frantsay) tamin’ny 22 Oktobra 1972.

Fifalifalian’ny fianakaviana

Tamin’ny andron’ny Baiboly, dia tsy hoe tsy nahazatra ny niarahan’ny fianakaviana nankafy endri-pialam-boly sasany. (Lioka 15:25). Kanefa, ireo mpanoratra tanora ny The Kids’ Book About Parents (Ny Bokin’ny Ankizy Momba ny Ray Aman-dreny) dia manamarika fa “be atao aoka izany ny ray aman-dreny sy ny ankizy amin’izao andro izao, hany ka tsy misy manana fotoana andaharana mialoha fanaovan-javatra. (...) Heverinay fa zava-dehibe ho an’ny ray aman-dreny sy ny ankizy ny manao izay hahazoana antoka fa miara-mandany fotoana isan-kerinandro anaovan-javatra izay mahafalifaly ranofotsiny [izy ireo]”.

“Ny zoma no andron’ny fianakavianay”, hoy ny tanora afrikana iray antsoina hoe Paki. “Mazàna izahay no miara-manao kilalao.” Ary aza hadinoina ireo mpiray tam-po aminao. Hoy i Bronwyn tanora: “Mankafy ny fiaraha-manao sary sy zavatra hafa ara-javakanto amin’ny zandriko vavy aho.” Afaka manao ny dingana voalohany ve ianao ka manolo-kevitra ny amin’ny fiaraha-manao zavatra mahafalifaly sasany amin’ny fianakavianao?

Rehefa irery tanteraka ianao

Ahoana raha irery ianao? Tsy midika akory izany hoe voatery ho sorisorena sy hahatsiaro tena ho manirery ianao. Misy fomba ahitam-bokatra sy mahafaly maro azo ampiasana ireny fe-potoana ireny. Ny fanarian-dia, ohatra. Nanomboka tamin’ny andron’ny Baiboly, dia nisy lehilahy sy vehivavy nahita ny fianarana mozika ho nanatsara ny fiainany. (Genesisy 4:21; 1 Samoela 16:16, 18). “Mitendry piano aho”, hoy i Rachel. “Zavatra azonao atao izany rehefa sorisorena ianao.” Raha tsy mirona ho amin’ny mozika ianao, dia mety hankafy ny fianarana manjaitra, manao zaridaina, manangona hajia, na mianatra fiteny vahiny. Ho tombony, ianao dia mety hampitombo fahaizana sasany izay ho hita ho mahasoa mihitsy aza, taona maro any aoriana.

Milaza amintsika ny Baiboly fa ireo olon’ny finoana, toa an’i Isaka, dia nitady fe-potoana hitokanana mba hisaintsainana. (Genesisy 24:63, NW ). Hoy ny tovolahy aotrisiana iray antsoina hoe Hans: “Indraindray aho dia mivoaka fotsiny mankeo amin’ny toerana milamina iray ao an-jaridaina ka mipetraka mba hijery ny masoandro mody. Mitondra fifaliana lehibe ho ahy izany ary manampy ahy hahatsiaro ho akaiky kokoa an’i Jehovah Andriamanitro.”

“Fifaliana” eo amin’ny fanompoana an’i Jehovah

Naminany ny Baiboly fa hahita “fifaliana” eo amin’ny fanompoana an’i Jehovah Andriamanitra i Kristy. (Isaia 11:3, NW ). Ary na dia tsy tena fialam-boly aza akory ny fanompoana masina an’Andriamanitra, dia afaka mamelombelona sy mitondra fahafinaretana izy io. — Matio 11:28-30, NW.

Mahatadidy fanandraman-javatra mahafaly hafa i Hans, voatonona teo aloha kokoa. Hoy izy: “Tianay sy ireo namako ny mitadidy ireny faran’ny herinandro nolaninay niasana teny amin’ny toeram-panorenana Efitrano Fivoriambe [hanaovana fanompoam-pivavahana] ireny. Nianatra ny fomba fiaraha-miasa izahay, ary nanjary nifankahalala be kokoa. Rehefa manao jery todika izahay, dia manana ny fahatsapana mahafa-po hoe nanao zavatra mendrika izay nahafalifaly koa.”

Asehon’ny teny fanamarinan’ireny tanora kristiana ireny mazava tsara ny zava-misy iray: Tsy voatery hamela handalo ny fahafahana hankafy fotoana mahafinaritra ianao. Araho ireo fotopoto-pitsipiky ny Baiboly. Mitadiava hevitra! Manaova dingana mahasoa! Ho hitanao fa afaka mampifaly ny tenanao amin’ny fomba izay hampahery anao sy tsy hampietry anao ianao.

[Fanamarihana ambany pejy]

[Teny notsongaina, pejy 23]

“Ny fivoahana mifoka rivotra madio fotsiny, miaraka amin’ireo namana mahafinaritra dia mahafaly aoka izany!”

[Sary, pejy 24]

Tsy voatery handany vola be ianao mba hiaraha-mankafy fotoana mahafinaritra amin’ireo namana