Manontany ny Tanora Hoe...

Tokony Hiaiky ny Heloko ve Aho?

“Menatra be aho, tsy fantatro izay hatao. Te ho any amin’ny ray aman-dreniko aho, nefa menatra loatra aho.” — Lisa.a

IZANY teny izany no nosoratan’ny tovovavy sahiran-tsaina iray. Nifankatia tamin’ny olona tsy mpino iray nandritra ny taona vitsivitsy izy ary, indray andro, teo ambany herin’ny alkaola dia nanana firaisana ara-nofo taminy.

Mampalahelo fa mitranga ny zavatra toy izany indraindray, na dia eo anivon’ireo tanora kristiana aza. Arakaraka ny maha-tanora sy tsy ampy fanandraman-javatra antsika no azo inoana fa anaovantsika fahadisoana. Kanefa, zavatra iray ny hoe manao fahadisoana madinika, fa zavatra hafa tanteraka kosa ny hoe manao ratsy lehibe, toy ny fahalotoam-pitondran-tena eo amin’ny lahy sy ny vavy. (1 Korintiana 6:9, 10). Rehefa mitranga izany, dia mila mangataka fanampiana ny tanora iray. Ny zava-manahirana dia izao: tsy mora ny miaiky heloka.

Nanao firaisana talohan’ny fanambadiana ny zazavavy kristiana iray. Nanapa-kevitra ny hiaiky heloka tamin’ireo loholon’ny kongregasionany izy, ka nametra daty iray hanaovana izany mihitsy aza. Nampihemotra ilay daty anefa izy. Tatỳ aoriana, dia nampihemotra ilay daty indray izy. Tsy ela, dia taona iray manontolo no lasa!

“Tsy misy takona”

Raha latsaka tao amin’ny fahotana lehibe ianao, dia mila ny mahatakatra fa tsy fahendrena ny fanginana. Voalohany aloha dia satria mipoitra foana ny marina na ahoana na ahoana. Fony izy ankizy kely, dia namaky haingon-drindrina seramika iray i Mark. “Niezaka nanambatra azy io indray tamim-pitandremana tamin’ny dity aho”, hoy izy nahatsiaro, “nefa tsy ela dia hitan’ny ray aman-dreniko ireo triatra.” Marina aloha fa tsy zaza intsony ianao. Kanefa, ny ankamaroan’ny ray aman-dreny mazàna dia afaka mahatsapa rehefa misy zavatra tsy mety amin’ny zanany.

“Nanandrana nanafina ny zava-nanahirana ahy tamin’ny lainga aho”, hoy ny fieken’i Ann, 15 taona, “nefa vao mainka nanaratsy kokoa ny tarehin-javatra izany.” Matetika ny lainga no voala sarona. Ary rehefa hitan’ny ray aman-dreninao fa nandainga ianao, dia azo inoana fa ho sosotra izy ireo — ho sosotra kokoa noho ny raha avy hatrany dia nitsotra ianao.

Mbola lehibe kokoa noho izany aza, ny Baiboly dia milaza hoe: “Tsy misy takona izay tsy ho hita, na miafina izay tsy ho fantatra sy tsy haseho.” (Lioka 8:17). Mahalala izay nataontsika sy izay ataontsika i Jehovah. Tsy afaka miafina eo anatrehany toy ny tsy nahafahan’i Adama nanao izany, ianao. (Genesisy 3:8-11). Rehefa mandeha ny fotoana, ireo fahotanao dia mety halana sarona eo anatrehan’ny hafa koa. — 1 Timoty 5:24.

Ny fanginana dia afaka manimba anao amin’ny fomba hafa koa. Nanoratra toy izao i Davida mpanao salamo: “Raha nangina aho, dia nihalany ny taolako rehetra noho ny fitarainako mandrakariva. Fa efa navesatra tamiko andro aman-alina ny tànanao”. (Salamo 32:3, 4). Eny, ny fihenjanana tsapa avy amin’ny fihazonana tsiambaratelo dia afaka miteraka vokany ratsy ara-pihetseham-po. Afaka mahatonga anao ho rera-po ny tebiteby sy ny fahatsiarovan-tena ho meloka, ary koa ny tahotra ny ho voala sarona. Mety hanomboka hihataka amin’ireo namanao sy ny fianakavianao ianao. Mety hahatsapa ho tafasaraka amin’Andriamanitra mihitsy ianao! “Nanameloka ahy ny feon’ny fieritreretako noho izaho nampalahelo an’i Jehovah”, hoy ny nosoratan’ny tanora iray antsoina hoe Andrew. “Nikiky ahy ilay izy.”

Mitenena amin’izay

Misy fomba hahazoana fanamaivanana avy amin’io fisafotofotoana ara-pihetseham-po io ve? Eny tokoa! Hoy ilay mpanao salamo: “Ny fahotako nambarako taminao, ary ny heloko tsy mba nafeniko. (...) Ary Hianao dia namela ny heloky ny fahotako.” (Salamo 32:5; ampitahao amin’ny 1 Jaona 1:9.) Nahita tena fanamaivanana nitovy tamin’izany i Andrew tamin’ny fiekena ny heloka nataony. Hoy ny tsaroany: “Nanatona an’i Jehovah aho ary nivavaka taminy tamin’ny foko manontolo mba hahazoana ny famelany.”

Afaka manao toy izany koa ianao. Mivavaha amin’i Jehovah. Mahalala izay nataonao izy, nefa tsory aminy amim-panetren-tena ao amin’ny vavaka ilay izy. Mangataha famelana, aza miahotra satria hoe mahatsiaro tena ho ratsy loatra ianao ka tsy mendrika ny hahazo fanampiana. Maty i Jesosy mba hahafahantsika hanana toerana tsara eo anatrehan’Andriamanitra na dia eo aza ny tsy fahatanterahantsika. (1 Jaona 2:1, 2). Afaka mangataka ny hery hanaovana ny fiovana ilaina koa ianao. Ny famakiana ny Salamo faha-51 dia mety hanampy anao manokana mba hanatona an’Andriamanitra.

Ny filazana amin’ny ray aman-dreninao

Mihoatra noho ny fiekena heloka amin’Andriamanitra fotsiny anefa no ilaina. Tsy maintsy milaza amin’ny ray aman-dreninao koa ianao. Nomen’Andriamanitra baiko hitaiza anao “amin’ny famaizana sy ny fananaran’ny Tompo” izy ireo. (Efesiana 6:4). Tsy afaka manao izany izy ireo, raha tsy mahalala an’ireo zava-manahirana anao. Eto koa, dia mety tsy ho mora na hahafinaritra ny hilaza amin’ny ray aman-dreninao. Aorian’ny fihetsiny voalohany anefa, dia azo inoana fa hahafehy ny fihetseham-pony izy ireo. Mety ho faly mihitsy aza izy ireo noho ianao ampy fatokiana azy ireo, matoa namboraka ny zava-nanahirana anao taminy. Ny fanoharan’i Jesosy momba ilay zanaka adala dia milaza ny amin’ny tovolahy iray latsaka tao amin’ny fahalotoam-pitondran-tena teo amin’ny lahy sy ny vavy. Rehefa niaiky heloka anefa izy tamin’ny farany, dia nandray azy an-tanan-droa ny rainy! (Lioka 15:11-24). Tsy misy isalasalana fa hanampy anao toy izany koa ny ray aman-dreninao. Rehefa dinihina tokoa, dia mbola tia anao ihany izy ireo.

Marina aloha fa mety hatahotra ny hampalahelo ny ray aman-dreninao ianao. Tsy ny fiekenao ilay heloka anefa no mampalahelo ny ray aman-dreninao; ny nanaovanao an’ilay heloka no mampalahelo azy! Ny fieken-keloka no dingana voalohany ho amin’ny fampitonena an’izany alahelo izany. I Ann, voalaza tetsy aloha, dia nilaza tamin’ny ray aman-dreniny, ary taorian’izany, dia nahatsapa fanamaivanana tsy nisy toy izany.b

Kanefa, ny vato misakana iray hafa amin’ny fieken-keloka dia ny henatra sy ny fahatsapana ho sanganehana. Tsy nanao fahotana ny tenan’i Ezra, mpanora-dalàna nahatoky, nefa rehefa niaiky ny fahotan’ireo Jiosy namany izy, dia nilaza hoe: “Menatra sy [sanganehana, NW ] aho, raha miandrandra aminao, ry Andriamanitro ô”. (Ezra 9:6). Marina tokoa fa ara-dalàna ny hahatsapanao henatra rehefa nanao zavatra ratsy ianao. Izany dia mampiseho fa mbola miasa ny feon’ny fieritreretanao. Ary rehefa mandeha ny fotoana, dia hihena izany fahatsapana henatra izany. Nilaza izany tamin’izao fomba izao i Andrew: “Tena faran’izay sarotra sy mahasanganehana ny miaiky heloka. Ny fahalalana anefa fa mamela heloka dia mamela heloka i Jehovah dia mitondra fanamaivanana.”

Fankanesana any amin’ireo loholona

Raha Kristiana ianao, ny raharaha dia tsy mifarana eo amin’ny filazana amin’ny ray aman-dreninao. Hoy i Andrew: “Fantatro fa tsy maintsy nitondra an’ilay zava-nanahirana ahy tany amin’ireo loholon’ny kongregasiona aho. Fanamaivanana toy inona moa ny nahalala fa teo izy ireo mba hanampy ahy!” Eny, afaka no sady tokony ho any amin’ireo loholon’ny kongregasiona ireo tanora eo anivon’ny Vavolombelon’i Jehovah, mba hahazoana fanampiana sy fampaherezana. Nahoana anefa ianao no tsy afaka mivavaka fotsiny amin’i Jehovah ary mijanona amin’izao? Satria i Jehovah dia nanankina tamin’ireo loholona ny andraikitra ‘hiambina ny fanahinao’. (Hebreo 13:17). Afaka manampy anao tsy ho lavo ao amin’ny fahotana indray izy ireo. — Ampitahao amin’ny Jakoba 5:14-16.

Aza mamita-tena amin’ny fisainana hoe afaka manampy ny tenanao ihany ianao. Raha tena ampy fahatanjahana mba hanaovana izany tokoa ianao, moa ve ianao ho lavo tao amin’ny fahotana? Mazava tsara fa mila mitady fanampiana avy any ivelany ianao. Nanao izany tamin-kerim-po i Andrew. Inona no toroheviny? “Mampirisika na iza na iza manao, na nanao fahotana lehibe aho, mba hanokatra ny fony amin’i Jehovah sy amin’ny iray amin’ireo mpiandriny.”

Ahoana anefa no hanatonana loholona? Mifidiana loholona iray izay tsy mahasanganehana loatra anao. Azonao atao ny manomboka amin’ny hoe: “Mila miresaka momba ny zavatra iray aho”, na hoe: “Manan-java-manahirana aho”, na koa hoe: “Manan-java-manahirana aho ary mila ny fanampianao”. Ny filazanao ny marina amim-pahatsorana dia hanampy be dia be mba hampisehoana ny fibebahanao sy ny fanirianao hiova.

‘Matahotra ny ho voaroaka aho’

Ahoana ny amin’ny mety hitrangan’izany? Marina fa ny fanaovana fahotana lehibe dia mety hahatonga ny olona iray ho voaroaka, nefa tsy voatery ho izany no hitranga. Ny fandroahana dia ho an’ireo izay tsy mety mibebaka — izay mikiry tsy mety hiova. Hoy ny Ohabolana 28:13: “Izay manafina ny fahotany tsy hambinina; fa izay mitsotra ka mahafoy azy no hahazo famindrampo.” Porofon’ny fanirianao hiova ny nanatonanao ireo loholona mba hahazoana fanampiana. Mpanasitrana voalohany indrindra ireo loholona, vao mpanasazy. Tsy maintsy mitondra ny vahoakan’Andriamanitra amim-pahalemem-panahy sy fahamendrehana izy ireo. Maniry hanampy anao hanao ‘lalana mahitsy halehan’ny tongotrao’ izy. — Hebreo 12:13.

Ekena aloha fa matoa misy famitahana na fahazarana manao zava-dratsy lehibe naharitra ela, dia nety ho tsy nisy “asa mendrika ny fibebahana” nampiaiky. (Asan’ny Apostoly 26:20). Indraindray dia tena fandroahana no vokany. Ary na dia mibebaka aza ny mpanao ratsy iray, ireo loholona dia tsy maintsy mampihatra fifehezana. Tokony hanjary ho tezitra na ho sosotra mafy ve ianao noho ny fanapahan-keviny? Ao amin’ny Hebreo 12:5, 6, i Paoly dia mampirisika mafy hoe: “Anaka, aza atao ho zavatra kely ny famaizana ataon’i Jehovah, ary aza reraka, raha resi-lahatry ny anatra ataony hianao; fa izay tian’i Jehovah no faizany, ary izay zanaka rehetra raisiny no kapohiny”. Na inona no inona famaizana azonao, dia hevero ho porofo izany fa tia anao Andriamanitra. Tadidio fa ny fibebahana marina dia hamerina indray ho amin’ny fifandraisana tsara amin’i Jehovah Andriamanitra, ilay Raintsika be famindram-po.

Mitaky herim-po ny fiekenao ny fahadisoanao. Amin’ny fanaovana izany anefa, dia afaka manitsy ny fifandraisanao ianao, tsy amin’ny ray aman-dreninao ihany fa amin’i Jehovah Andriamanitra mihitsy koa. Aza mamela ny tahotra, ny avonavona, na ny fahatsapana ho sanganehana hisakana anao tsy hangata-panampiana. Tadidio izao: “Hamela heloka dia hamela heloka” i Jehovah. — Isaia 55:7.

[Fanamarihana ambany pejy]

[Teny notsongaina, pejy 12]

‘Mampirisika ny rehetra izay nanota mba hanokatra ny fony amin’i Jehovah, aho.’ — Andrew

[Sary, pejy 11]

Ny fiekena heloka amin’ny ray aman-dreninao dia afaka mitarika ho amin’ny fahasitranana ara-panahy