Manontany ny Tanora Hoe...

Ahoana no Ahafahako ho Tonga Sakaizan’Andriamanitra?

“TSY FIVADIHANA”. “Fifikiran’ny tena manokana.” Ireo no teny ampiasain’ny olona matetika mba hilazalazana ny fifikirany amin’ny namany akaiky azy indrindra. Fantatrao ve fa ireo teny ireo dia azo ilazalazana koa ny fifikirana amin’ilay Mpamorona Lehibe Indrindra an’izao rehetra izao mahatahotra — fa afaka ny ho sakaizanao manokana Andriamanitra? Eny, miresaka ny amin’ny fananana fifikirana amin’Andriamanitra ny Baiboly, ary tsy ny fankatoavana ihany no tafiditra amin’io fitenenana io fa eo koa ny fifikiran’ny tena amin’Andriamanitra. Izany dia ny fitoerana ho akaiky azy izay mipoitra avy amin’ny fo mankasitraka.

Nasehon’ny lahatsoratra teo aloha tato amin’itỳ fitohitohizan-dahatsoratra itỳ fa sady azo atao no mahasoa ny fifikirana toy izany.a Ahoana marina anefa no ahazoanao izany fisakaizana manokana amin’Andriamanitra izany? Tsy zavatra azo hatrany am-bohoka na nolovana ho azy avy tamin’ny ray aman-dreny tia an’Andriamanitra izany. Zavatra tsy azo afa-tsy avy amin’ny ezaka marina kosa izany. Nilaza tamin’i Timoty tovolahy ny apostoly Paoly mba ‘hampiasa ny tenany amin’ny [fanaovana ny fifikirana amin’Andriamanitra ho zava-kendreny, NW ]’. Eny, tsy maintsy nanao ilay karazana ezaka ataon’ny atleta amin’ny fampiasan-tena izy! (1 Timoty 4:7, 8, 10). Tsy maintsy manao toy izany koa ianao raha tianao ho tonga sakaizanao Andriamanitra. Ahoana anefa no azonao anombohana ny fampiasan-tena amin’io lafiny io?

Fahalalan’ny tena manokana an’Andriamanitra

Koa satria mipoitra avy amin’ny fo ny fifikirana amin’Andriamanitra, dia tsy maintsy mameno ny fonao amin’ny fahalalana an’Andriamanitra ianao. Mampalahelo fa rehefa nisy tanora maherin’ny 500 nanontaniana hoe: “Impiry ianao no mamaky irery ny Baiboly?”, dia 87 isan-jato no nilaza hoe “tsindraindray”, na “mahalana”, na “tsy mamaky mihitsy”. Miharihary fa ny ankamaroan’ny tanora dia mihevitra fa tsy mahaliana sy mankaleo ny mamaky ny Baiboly. Tsy voatery ho toy izany anefa! Diniho izao: Nahoana ny tanora sasany no mahay tsy an-jery ny antontan’isa rehetra momba ny spaoro na mianatra ny tonon’ireo hira tiany indrindra? Satria mahaliana azy ireny zavatra ireny. Toy izany koa fa manjary mahaliana ny fianarana ny Baiboly, raha toa ka mikely aina fatratra amin’izany ianao. (1 Timoty 4:15). Nampirisika mafy toy izao ny apostoly Petera: “Mampitomboa faniriana mafy ny ronono tsy misy fangarony izay an’ny teny”. (1 Petera 2:2, NW ). Eny, tsy maintsy mampitombo fahalianana toy izany amin’ny Soratra Masina ianao. Mety hitaky ezaka izany, kanefa mendrika ny hanaovana izany ireo valisoa.b

Voalohany aloha, dia hampiharihary ny “fahasoavan’i Jehovah” ny famakiana sy ny fianarana ny Tenin’Andriamanitra sy ireo zavatra vita an-tsoratra miorina amin’ny Baiboly. (Salamo 27:4). Nataon’ny Kristiana tanora iray antsoina hoe Amber ho zava-kendreny ny hamaky ny Baiboly manontolo. Nila efa ho herintaona izy vao nahavita izany. “Tsy matoky aho hoe hisy zavatra maro eo amin’ny fiainako hitaky fotoana sy ezaka be toy izany, kanefa hitondra valisoa maro aoka izany”, hoy ny fanazavan’i Amber. “Rehefa namaky azy io aho, dia tsapako toy ny hoe nametraka ahy teo am-pofoany i Jehovah toy ny ataon’ny ray anankiray, ka nampianatra ahy. Nianatra zavatra betsaka aoka izany momba an’i Jehovah aho — zavatra izay nahatonga ahy ho akaiky kokoa azy ka haniry ny hatahotra azy amim-panajana amin’ny andro sisa hiainako.”

Rehefa mamaky ny Baiboly ianao, dia ho fantatrao ny amin’ny toe-javatra maro nanehoan’Andriamanitra tsy fivadihana tamin’ny fanohanana ireo sakaizany. (Salamo 18:25, NW; 27:10). Ho hitanao fa tsara indrindra foana ireo fari-pitsipiny ary natao hahasoa antsika maharitra. (Isaia 48:17). Manosika anao haniry hanahaka an’Andriamanitra ny famakiana momba ireo toetrany tsy manan-tsahala, toy ny fitiavany sy ny fahendreny. (Efesiana 5:1). Mba hanentanan’ny fanazavana toy izany ny fonao anefa, dia tsy maintsy misaintsaina koa ianao. Eo am-pamakianao ny Baiboly, dia manontania tena hoe: ‘Inona no lazain’izany amiko momba an’i Jehovah? Ahoana no ahafahako mampihatra izany eo amin’ny fisainako sy ny ataoko? Ahoana no ampisehoan’izany fa Andriamanitra no namana tsara indrindra mety hananako?’

Hanampy anao ho akaiky kokoa an’Andriamanitra amin’ny fomba hafa ny fahalalana azonao momba azy amin’ny alalan’ny fianarana manokana sy ny fianaran’ny kongregasiona. Hoy ny ohabolana frantsay iray: “Ny tena mpinamana dia iray saina.” Ahoana anefa no ahafahanao ho “iray saina” amin’Andriamanitra? Hoy ny fanazavan’i Denise tanora: “Arakaraka ny ianaranao sy anaovanao fikarohana momba ny foto-kevitra iray no ahitanao bebe kokoa ny fomba fijerin’i Jehovah azy io. Manampy anao ny fahafantarana ny fomba fiheviny momba ny zavatra iray.”

Tena zava-dehibe ny fitondran-tena mahitsy

Ireo izay manaja ny fari-pitsipiny ara-pitondran-tena ihany no fidin’Andriamanitra ho sakaizany. “Ao amin’ny marina (...) ny fisakaizany”, hoy ny Ohabolana 3:32. Ny tanora iray miezaka mafy ny ho marina dia ‘hitandrina mba handeha amin’ny lalàn’i Jehovah’. (2 Mpanjaka 10:31). Hanao ahoana ny fifandraisana akaiky ananan’ny olona iray amin’Andriamanitra raha manana fitondran-tena maneho fankatoavana toy izany izy? Hoy i Jesosy Kristy: “Ny Raiko ho tia azy, ary hankao aminy Izahay ka honina ao aminy.” (Jaona 14:21-24). Filazalazana manafana ny fo re izany! Alao sary an-tsaina ireo persona roa lehibe indrindra eo amin’izao rehetra izao maneho fiheverana sy mikarakara tsy an-kijanona olona iray! Izany no hitranga aminao raha mitandrina mba handeha amin’ny lalàn’i Jehovah ianao.

Moa ve ny hoe marina midika fa tsy maintsy ho lavorary ianao? Tsy izany velively! Ny fanaovana fahadisoana noho ny fahalemena dia tsy midika hoe nandao ‘ny lalan’ny didin’Andriamanitra’ ianao. (Salamo 119:35). Diniho izay lazain’ny Baiboly amintsika momba an’i Davida Mpanjaka. Na dia sakaizan’Andriamanitra tsy nivadika taminy aza izy, dia nanao fahadisoana lehibe noho ny fahalemena. Na dia izany aza, dia nilaza i Jehovah fa nandeha “tamin’ny fahitsian’ny fo sy ny fahamarinana” izy. (1 Mpanjaka 9:4). Nampiseho fibebahana tamim-pahatsorana foana noho ny zava-dratsy nataony i Davida Mpanjaka, na inona izany na inona, ka niezaka mafy hanao izay hampifaly an’Andriamanitra. — Salamo 51:1-4.

Na dia tia an’Andriamanitra aza i Davida, dia fantany fa mety ho sarotra indraindray ny manao zavatra mahitsy. Izany no antony nitalahoany tamin’Andriamanitra hoe: “Tariho amin’ny fahamarinanao aho”. Eny, namboly tahotra tamim-pahatsorana sao hampahatezitra an’Andriamanitra izy. Noho izany, dia afaka nilaza toy izao i Davida: “Ny fisainan’i Jehovah asehony amin’izay matahotra Azy”. (Salamo 25:5, 14). Tsy tahotra mampihorohoro izany fa fanajana ara-pivavahana tsapa lalina amin’ny Mpamorona sy tahotra mahasoa sao tsy hampifaly azy. Io tahotra araka an’Andriamanitra io no fototra iorenan’ny fitondran-tena mety. Mba hanazavana izany, dia diniho ny ohatra nomen’ny tanora kristiana iray antsoina hoe Joshua.

Naharay taratasy avy tamin’ny mpiara-mianatra iray i Joshua, taratasy izay nilaza fa tia azy ilay tovovavy ka naniry “hiombom-pitia” taminy. Na dia nanintona azy aza ilay tovovavy, dia takatr’i Joshua fa mety hitarika ho amin’ny fahalotoam-pitondran-tena ny fifaneraserana amin’ny tsy mpino ka hanimba ny fisakaizany amin’i Jehovah. Koa nilazany tamin’ny teny tsy nisy hambahamba ilay tovovavy fa tsy nahaliana azy izany! Rehefa nolazainy tamin-dreniny tatỳ aoriana ny fomba niatrehany ilay tarehin-javatra, dia nihiaka tsy tamim-pieritreretana ilay reniny hoe: “Andre! Angamba nampahatezitra azy ianao, ry Joshua!” Hoy ny navalin’i Joshua: “Neny a, aleoko izy no tezitra toy izay i Jehovah.” Nanosika azy hihazona fitondran-tena mahitsy ny tahony an’Andriamanitra, dia tahotra sao tsy hampifaly an’ilay Sakaizany any an-danitra.

Mitadiava namana tsara

Mbola nitsofoka tao anatin’ny fahasahiranana anefa ny tanora iray antsoina hoe Lynn. Inona no olana? Niaraka tamin’ny naman-dratsy izy. (Eksodosy 23:2; 1 Korintiana 15:33). Inona no vahaolana? Fitadiavana namana vaovao! “Raha manana namana tia an’i Jehovah ianao manodidina anao”, hoy ny fanatsoahan-kevitr’i Lynn, “dia manampy anao hihazona feon’ny fieritreretana mora tohina izany ka hanalavitra fahasahiranana. Rehefa maneho ny rikorikony amin’ny fanaovan-dratsy izy ireo, dia manjary mahatsapa toy izany koa ianao.”

Raha ny marina, dia ny safidy ratsy mikasika ny namana no mety ho ny vato misakana lehibe indrindra tsy hahazoana fisakaizana amin’Andriamanitra. Niaiky toy izao i Ann 18 taona: “Manan-kery lehibe eo aminao ireo namanao. Na ho ela na ho haingana, dia ho tahaka azy ianao. Mamolavola anao hitovy fisainana aminy izy ireo. Mety ho momba ny firaisana indrindra indrindra ny resadresaka. Mety hahatonga anao ho liana ta hahafanta-javatra izany. Manontany tena ianao hoe manao ahoana izany.” Nahita faisana noho izany i Ann. Hoy izy: “Fantatro fa marina izany. Nanjary latsaka tao amin’ny fahalotoam-pitondran-tena aho ka bevohoka teo amin’ny faha-15 taonako.”

Tamin’ny farany, dia nanjary takatr’i Ann ny fahamarinan’ireto tenin’ny Baiboly ireto: “Koa na iza na iza te-ho sakaizan’izao tontolo izao, dia fahavalon’Andriamanitra izy.” (Jakoba 4:4). Eny, naniry — ary tapa-kevitra — ny ho sakaizan’izao tontolo izao i Ann. Tsy nitarika afa-tsy ho amin’ny ratram-po nifandimby anefa izany. Soa ihany fa nanjary tonga saina i Ann. Nahatsapa nenina mafy noho ny lalam-pitondran-tenany izy ka nitady fanampiana avy tamin’ny ray aman-dreniny sy ireo loholona tao amin’ny kongregasionany. Nitady namana vaovao koa izy. (Salamo 111:1). Noho ny ezaka be nataony, dia nanjary afaka ny ho sakaizan’Andriamanitra indray i Ann. Ankehitriny, taona maromaro atỳ aoriana, dia hoy izy: “Manana fifandraisana akaiky be kokoa amin’i Jehovah aho.”

Amin’ny alalan’ny fianarana manokana ny Baiboly sy ny fisaintsainana sy ny fitondran-tena mahitsy ary ny namana mahasoa, ianao koa dia afaka mamboly fisakaizana akaiky amin’Andriamanitra. Raharaha hafa anefa ny fihazonana izany fisakaizana izany. Ahoana no hetezan’izany na dia eo aza ny zava-tsarotra sy ny fahalemen’ny tena manokana? Handinika izany ny lahatsoratra iray amin’ny hoavy ao amin’itỳ fitohitohizan-dahatsoratra itỳ.

[Fanamarihana ambany pejy]

[Sary, pejy 22]

Hanampy ahy ho tonga sakaizan’Andriamanitra ve ireo namako?