Manontany ny Tanora Hoe...

Hitoetra ho Namako ve Andriamanitra?

I DAVIDA Mpanjaka dia lehilahy iray nanana fisakaizana tamin’Andriamanitra. Kanefa, tamin’ny fotoana iray, dia hoy izy: “Ny fahorian’ny foko efa mihalehibe”. Nijaly i Davida, tsy noho ny fitondran’ny hafa azy tamin’ny fomba ratsy fotsiny, fa noho ny fahadisoana nataon’ny tenany koa. Nanomboka nieritreritra izy fa nanda azy na dia Andriamanitra aza, ka nivavaka toy izao izy: “Todiho aho, ka amindrao fo, fa irery aho ka mahantra.” — Salamo 25:11, 16-19.

Angamba ny tenanao koa dia ory. Mety ho ao anatin’ny tarehin-javatra tsy mahafinaritra izay tena mampiferinaina anao tokoa ianao any an-trano na any an-tsekoly. Etsy an-danin’izany koa, dia mety hanan-java-manahirana ara-pahasalamana lehibe ianao na ho kivy noho ny fahalemena iray izay toherinao. Na inona na inona toe-javatra, dia tsy voatery hijaly irery ianao; manolotra amim-pahalalahan-tanana ny fisakaizany sy ny fanohanany Andriamanitra.a Raha efa nanomboka nampifamatotra fifandraisana taminy ianao, dia hahita fampiononana mahafantatra fa tsy mandao ny namany izy rehefa tojo fotoan-tsarotra izy ireo. Na dia izany aza, dia mety hahatsapa ianao fa lavitra Andriamanitra rehefa tafihin’ny zava-tsarotra ianao. Aminao, dia mety ho toa tsy manampy anao mihitsy akory aza izy. Kanefa, tena izany tokoa ve no izy?

“Tsilo tamin’ny nofo”

Voalohany indrindra, dia vakio, aza fady, ny 2 Korintiana 12:7-10. Eo ny apostoly Paoly dia miresaka ny amin’ny fomba nijaliany noho izay antsoina hoe “tsilo tamin’ny nofo”. Azo inoana fa ilay “tsilo” dia karazana kilema ara-batana, angamba nahakasika ny fahitany. Na inona na inona izy io, dia ‘namely’ azy hatrany ara-pihetseham-po izany. Na dia teo aza ny fangatahana mafy intelo nataony tamin’Andriamanitra mba hanesorana azy io, dia nitoetra ilay “tsilo”.

Tsy niraharaha ny vavaka nataon’i Paoly ve i Jehovah? Tsy izany velively! Hoy Andriamanitra taminy: “Ampy ho anao ny fahasoavako; fa ny heriko dia tanterahina amin’ny fahalemena.” Na dia nanapa-kevitra ny tsy hanala izany “tsilo” izany aza i Jehovah, dia tsy nandao an’i Paoly izy. Noho ny fahasoavan’Andriamanitra, dia nanana fisakaizana akaiky taminy i Paoly. Izany dia “ampy” mba hanampiana an’i Paoly hahazaka ny kilemany. Teo am-piadiana mafy mba hanaovana izany, dia hanjary ho tsapany amin’ny fomba vaovao sy manokana koa ny hery manohana avy amin’Andriamanitra.

Fanampiana mba hahazakana zava-tsarotra

Tahaka an’i Paoly, dia mety hanana “tsilo” na zava-manahirana izay mampahory anao ianao, ka mahatonga fijerena lafy ratsin-javatra sy fahakiviana. Toy ny nahazo an’i Paoly, dia mety havelan’Andriamanitra hitohy tokoa ilay zava-tsarotra. Tsy midika izany fa tsy Namanao intsony izy. Niteny toy izao tamin’ny apostoly Paoly Andriamanitra: “Ny heriko dia tanterahina amin’ny fahalemena.” (Izahay no manao sora-mandry.) Raha miantehitra amin’ny herin’Andriamanitra ianao fa tsy amin’ny anao, dia ho afaka ny hiaritra. Mety ho hitanao mihitsy aza fa hahavita hanao zavatra izay tsy noheverinao velively ho azo atao ianao noho ny fanampian’ny fanahin’Andriamanitra. Hoy i Paoly: “Finaritra aho amin’ny fahalemena, (...) fa ny fahalemeko no fahatanjahako.”

Hitan’ny tovovavy iray atao hoe Robineb fa marina izany. Fony izy 14 taona, dia namoy ny fahitany izy noho ny glaucome. Tamin’io taona io koa dia maty tampoka ny reniny. “Tsy manana afa-tsy i Jehovah aho ankehitriny”, hoy i Robine, teo am-panombohana niatrika ireo “tsilo” nampanaintaina ireo. “Fantatro fa raha ta hahatanty azy itỳ aho, dia tsy maintsy mifikitra akaiky aminy.” Izany indrindra no nataon’i Robine, ka tamin’ny farany izy dia nanompo tamin’ny naha-evanjelisitra manontolo andro. Hoy izy: “Nangataka tamin’i Jehovah mba hanampy ahy amin’ny zavatra rehetra aho. Tena nanampy ahy izy.”

Tanora maro no nahita fa nanampy azy ireo hifanakaiky kokoa amin’Andriamanitra ny fisedrana. Diniho i Jeff tanora. Nandao ny fianakaviany ny rainy, ka namela ny renin’i Jeff hikarakara ankizy fito. Niaiky toy izao i Jeff, izay 12 taona monja tamin’izay: “Tsapako mafy ny tsy fisian-dray.” “Naniry mafy ny hisian’ny olona hameno ny banga tsapako isan’andro aho.” Inona no nataon’i Jeff? “Nivavaka tamin’i Jehovah aho mba hanampy ahy hameno izany zavatra ilaina izany.” Nanao zavatra nifanaraka tamin’ny vavaka nataony i Jeff, ary nanjary revo tamin’ireo asa ara-panahy. Tamin’ny farany dia afaka nahatsapa ny tanan’i Jehovah nanohana azy izy — nomena tamin’ny alalan’ny fanahiny masina manatanjaka sy tamin’ny alalan’ny kongregasiona kristiana. (Ampitahao amin’ny Salamo 27:10.) Milaza ny heviny toy izao i Jeff, izay 27 taona ankehitriny: “Tsy nisy olona azoko nitodihana mba hahazoana filaminan-tsaina, koa nanatona an’i Jehovah akaiky dia akaiky aho.” Niantso izany fifandraisana akaiky izany ho “fitahiana tsy hay tombanana izay avy tamin’io fisedrana io” izy.

Ny fomba ahazoana ny fanampian’Andriamanitra

Hanampy anao ao anatin’ny zava-tsarotra hitanao tahaka izany koa ilay Namanao any an-danitra. Kanefa, inona no tsy maintsy hataonao? Mba hiroboroboan’ny fisakaizana na inona na inona, dia tsy maintsy misy fifampiresahana. Ny vavaka no fomba ifampiresahantsika amin’Andriamanitra. Amin’ny alalan’izy io no ampahafantarantsika aminy fa mila ny fanampiany isika. Tsy misy vidiny anefa ny vavaka raha toa ka tsy misy hafanam-po na hatao amim-pahazarana fotsiny. Tahaka ireo tanora voalaza tetsy ambony, dia tsy maintsy ‘mandoatra ny fonao’ eo anatrehan’Andriamanitra ianao! (Salamo 62:8). Mety hila hanolotra fitalahoana mihitsy aza ianao. (Filipiana 4:6). Ny fitalahoana dia vavaka atao amim-piangaviana sy amim-pahatsorana.

Aoka hatao hoe manan-java-manahirana mitana ny sainao ianao na mahita fahasahiranana mandresy fahazaran-dratsy iray. Aoka ianao hitalaho amin’i Jehovah! Mangataha fanampiana aminy mandritra ny fotoana isian’ny fakam-panahy. Mety tsy ho mora foana izany. Niaiky toy izao i Gary: “Rehefa manana faniriana mafy hanao zava-dratsy aho, dia manery tena hivavaka.” “Indraindray dia hoy aho anakampo: ‘Ahoana no ahasahiako manatona an’i Jehovah?’ Kanefa dia mbola miangavy fanampiana aminy ihany aho. Manome ahy ny hery ilaiko mba hikirizana izy.” Na dia sarotra aza izany amin’ny voalohany, dia aza mitsahatra mamboraka ny ao am-ponao amin’Andriamanitra.

Ahoana anefa raha toa ka toy ny hoe tsy valiana ny vavaka ataonao? I Lora, ohatra, dia niady mba handresena ny fahazaran-dratsy manao masturbation (fikasikasihan’ny tena ny filahiana na ny fivaviana mba hahazoana fahafinaretana). “Niresaka tamim-pahamarinana ilay zava-nanahirana tamin’i Jehovah aho”, hoy izy nanazava, “kanefa toa tsy afaka nitsahatra tsotra izao aho.” Indraindray dia mety havelan’Andriamanitra isika hampiseho hoe hatraiza no andraisantsika ho zava-dehibe ny fangatahana ataontsika. (Ampitahao amin’ny Salamo 88:13, 14.) Noho izany, dia tsy maintsy maharitra amin’ny vavaka isika! (Matio 7:7, NW; Romana 12:12). Izany indrindra no nataon’i Lora. Tetsy an-danin’izany, dia nanomboka nampihatra ireo fanoloran-kevitra nivoaka tao amin’ireo zavatra vita an-tsoratry ny Fikambanana Watch Tower momba ilay foto-kevitra, izy.c Nanomboka nahita vokatra izy tamin’ny farany. Mahatsiaro toy izao izy: “Isaky ny nahatohitra fakam-panahy tamim-pahombiazana aho dia nisaotra an’i Jehovah satria fantatro fa nomba ahy izy.” Marina fa indraindray dia mety ho lavo ianao rehefa miady mba handresena ny zava-manahirana anao. Kanefa, raha mbola miady koa ianao ka tsy manaiky ho resin’ny fahalemenao, dia hampifaly an’Andriamanitra ny “ezaka amim-pahatsorana” ataonao ary hitoetra ho Namanao izy. — 2 Petera 1:5, NW.

Fiaraha-miasa amin’Andriamanitra

Ny fomba hafa iray andraisan-tsoa avy amin’ny fanampian’Andriamanitra dia ny fanekena ny fanasana ataony mba ho tonga “mpiara-miasa” aminy. (1 Korintiana 3:9). Izany dia mahafaoka ny fandraisana anjara amin’ny fanampiana ny hafa hahafantatra ny momba an’Andriamanitra. (Matio 28:19, 20). Rehefa mahatsiaro ho ory na kivy ianao, dia mety ho toa tsy manintona ny fanaovana asa, na karazany inona izany na karazany inona. Kanefa, afaka tena manampy anao ny ‘fananana zavatra be dia be hatao amin’ny asan’ny Tompo’. (1 Korintiana 15:58, NW ). Hitsahatra tsy hifantoka amin’ireo zava-manahirana anao manokana ianao fara fahakeliny. (Ampitahao amin’ny Ohabolana 18:1.) Milaza ny amin’ny fotoan-tsarotra natrehiny i Robine, izay voaresaka teo aloha, ka hoy izy: “Ny asa nataoko ho an’i Jehovah no zavatra nanampy ahy haharitra!”

Ny fiaraha-miasa amin’Andriamanitra koa dia afaka manampy anao handresy izay mety ho mbola fiheverana fa nahafoy anao Andriamanitra. Rehefa miara-miasa amin’ny maha-ekipa iray ny olon-droa mba hahatratrarana tanjona iray iombonana, moa ve tsy lasa mpinamana akaiky kokoa izy ireo matetika? Rehefa manao ny asa fitoriana ianao, dia hiatrika zava-tsarotra tsy an-kijanona. Hitodika amin’Andriamanitra ianao mba hahazo fanampiana. Ary rehefa mitahy ny ezaka ataonao Andriamanitra, dia vao mainka ho tena misy aminao ny fisakaizany. Manomboka takatrao ny fitokiana napetrak’Andriamanitra taminao amin’ny maha-mpiara-miasa aminy. Afaka ny ho tena hampitombo fatokian-tena izany.

I Carol, ohatra, dia tena tsy natoky tena. Namono tena ny reniny, ary nanambany azy tsy an-kijanona ilay rainy izay nampijaly azy. Kanefa, tonga Vavolombelon’i Jehovah izy rehefa 17 taona sady nanomboka ny asa fitoriana. Hoy izy ankehitriny, taorian’ny folo taona naha-evanjelisitra manontolo andro azy: “Nanampy ahy aoka izany io asa io satria nahatsapa ny fitahian’i Jehovah teo amiko aho. Hoy aho anakampo: ‘Raha tia ahy Andriamanitra, dia tsy hoe tsy misy vidiny aho.’ Ny nampiasan’i Jehovah ahy hanambara ny anarany dia nahatonga ahy hatoky tena kokoa.”

“Andramo ka izahao fa tsara Jehovah”

“Manafaka ahy amin’ny tahotro rehetra [Andriamanitra]”, hoy ny nosoratan’i Davida Mpanjaka, taorian’ny saika nahitany loza tao anatin’ny tarehin-javatra nahatandindomin-doza ny ainy. (Salamo 34:4, 6, teny fampidirana; 1 Samoela 21:10-13). Araka izany, dia afaka nilaza toy izao i Davida avy tamin’ny zavatra niainany: “Andramo ka izahao fa tsara Jehovah; sambatra izay olona mialoka aminy.” — Salamo 34:8.

Na dia mety tsy hotandindomin-doza mihitsy toy ny an’i Davida aza ny fiainanao, dia azo antoka fa hahita fihenjanana sy fahaterena ianao indraindray. Rehefa ‘mihalehibe ny fahorian’ny fonao’, dia italahoy Andriamanitra. (Salamo 25:17). Aza matahotra hoe hanaisotra aminao ny fisakaizany Andriamanitra. Rehefa miaritra amim-paharetana ianao ka mahatsapa mivantana ny fanohanana sy ny fiahian’i Jehovah, dia ny tenanao mihitsy no ‘hanandrana sy hahita fa tsara i Jehovah’. Ary hitoetra ho Namanao mandrakizay izy. — Jakoba 4:8.

[Fanamarihana ambany pejy]

[Sary, pejy 28]

Moa ve Andriamanitra mahafoy ny namany amin’ny fotoan-tsarotra?