Manana ‘Tsilo Amin’ny Nofo’ ve Ianao?
1 Maniry fatratra ny hanatanteraka ilay asa nanirahana antsika, dia ny hitory ny vaovao tsara, araka izay tsara indrindra mety ho vitantsika isika. Kanefa, maro amin’ireo rahalahintsika sy anabavintsika malala no mahita fa sarotra ny mandray anjara amin’ny fomba feno amin’izy io, satria manembantsembana azy ny aretina lehibe na ny kilema ara-batana, ka manasarotra ny fanaovany betsaka araka izay iriny. Ho azy ireo, dia mety ho zava-tsarotra ny handresy ny fahakiviana, indrindra rehefa mahita ny hafa manodidina azy marisika aoka izany eo amin’ny fanompoana, izy ireo. — 1 Kor. 9:16.
2 Ohatra iray hotahafina: Ny apostoly Paoly dia voatery niady tamin’ny “tsilo tamin’ny nofo” iray. Nangataka tamin’i Jehovah intelo izy mba hanaisotra ilay vato nisakana nampahory, izay nolazalazainy ho “irak’i Satana” izay namely azy. Kanefa, na dia teo aza izany, dia niaritra sy nandroso teo amin’ny fanompoany i Paoly. Tsy nitsetra tena na nanjary mpitaraina lava izy. Nanao araka izay fara heriny izy. Ny fanalahidin’ny fahombiazany teo amin’ny fiezahany nandresy ilay zava-nanahirana, dia izao fanomezan-toky avy tamin’Andriamanitra izao: “Ampy ho anao ny fahasoavako; fa ny heriko dia tanterahina amin’ny fahalemena.” Nanjary tanjaka ny fahalemen’i Paoly, rehefa nianatra nanaiky ny tarehin-javatra nisy azy sy niantehitra tamin’i Jehovah sy ny fanahy masina izy mba hiaretana. — 2 Kor. 12:7-10.
3 Ny fomba ahafahanao miaritra: Manana aretina mametra ny fanompoanao an’Andriamanitra ve ianao? Raha izany no izy, dia manahafa ny fomba fijerin’i Paoly. Na dia tsy misy fanafodiny maharitra aza ny aretinao na ny kilemanao amin’izao fandehan-javatra izao, dia afaka mametraka ny fitokianao feno amin’i Jehovah, izay mahatakatra izay ilainao sy hanome anao ny “hery mihoatra noho ny mahazatra”, ianao. (2 Kor. 4:7, NW ). Hararaoty ny fanampiana azonao any amin’ny kongregasiona, ka aza mitokantokana. (Ohab. 18:1). Raha hitanao fa sarotra ny mandray anjara amin’ny fitoriana isam-baravarana, dia mitadiava fomba hanaovana fanambarana tsy ara-potoana sy an-telefaonina.
4 Na dia mety hametra izay vitanao eo amin’ny fanompoana aza ny tsilo iray amin’ny nofo, dia tsy mila ny mahatsiaro ho maty antoka ianao. Sahala amin’i Paoly, ianao koa dia afaka ‘manambara ny filazantsaran’ny fahasoavan’Andriamanitra’, ka hanao araka izay amelan’ny herinao sy ny toe-javatra misy anao anao. (Asa. 20:24). Eo am-panaovanao fiezahana mba hanatanterahana ny fanompoanao, dia aoka ho fantatrao fa faly tokoa i Jehovah. — Heb. 6:10.