Hita ny Valin’ny Fanontaniana Saro-baliana Momba ny Fanidin’ny Bibikely
IREO mpahay siansa dia nanontany tena nandritra ny fotoana ela momba ny fomba ahafahan’ireo bibikely mitoetra ho mihevaheva eny amin’ny rivotra, kanefa mavesatra ny vatany ary marefo ny elany. Toa mihaika ny fitsipika ekena momba ny aérodynamique ireo zavaboary bitika ireo. Hitan’ireo mpanao fikarohana ao amin’ny Oniversiten’i Cambridge, any Angletera, ankehitriny ny fomba anaovan’ny bibikely izany zavatra mahatalanjona toa tsy azo tanterahina izany.
Mba handinihana ny fanidin’ny bibikely, ireo mpahay siansa dia namatotra kofehin-dandihazo nanodidina ny samoina iray ary nametraka azy io tao anatin’ny tionelina fitsofan-drivotra iray. Nampiditra setroka tsy nisy poizina tao anatin’ilay tionelina izy ireo ary nanamarika ny fomba nihetsehan’ilay setroka rehefa nikopaka elatra ilay samoina. Nanaraka izany izy ireo dia nanamboatra modely mekanika iray avo folo heny noho ny an’ilay samoina ny habeny. Ilay modely dia nanetsika ny elany miadana kokoa ampahazaton’ny an’ilay samoina. Ary dia nojereny ny vokany, izay mora hita izao. Hitan’izy ireo fa rehefa manomboka ny fihetsehany midina ny elatr’ilay samoina, dia misy rivotra mitambolimbolina miforona eo amin’ny fototr’ilay elatra. Ny tsindry kely aterak’izany eo ambonin’ilay elatra dia miteraka hery manainga, ka misarika ilay bibikely hiakatra. Raha mitsahatra ilay rivotra mitambolimbolina, dia tsy hiakatra ilay samoina fa hitsontsorika amin’ny tany. Tsy izany kosa anefa no mitranga fa mandeha manaraka ny sisin’ny elatra ilay rivotra mitambolimbolina ka mamonjy ny tendron’ilay elatra ary, noho izany, ilay hery manainga aterak’ilay fihetsehana midina, hery izay mira sanda amin’ny lanjan’ilay samoina ampitomboina iray sy sasany, dia mamela an’ilay bibikely hanidina tsy misy fahasahiranana.
Efa fantatr’ireo injeniera momba ny fiaramanidina fa ny fiaramanidina manana elatra delta (antsoina toy izany satria mitovy amin’ny litera grika Δ ny elany) dia miteraka rivotra mitambolimbolina eo amin’ireo tendron’ny elany, ka izany dia mampisy hery manainga. Kanefa amin’izao izy ireo mahalala ny fomba anomezan’ny rivotra mitambolimbolina hery manainga ny bibikely mikopaka elatra izao, dia maniry hianatra ny fomba hampiasana io zava-mahagaga io ao amin’ny famolavolana helisy sy helikoptera izy ireo.