Avy Amin’ny Mpamaky
Fileferana Roa amby roapolo taona aho, ary maniry ny hisaotra anareo noho ilay fitohitohizan-dahatsoratra hoe “Fileferana — Lasa Lavitra Loatra ve Izao Tontolo Izao?” (8 Febroary 1997). Tsy maintsy miatrika fihaikana maro ireo tanora kristiana. Ireo lahatsoratra ireo dia nampirisika ahy tsy hanao zavatra tafahoatra, sy nanatanjaka ny fahatapahan-kevitro hanompo an’i Jehovah, na dia eo aza ny faneren’izao tontolo izao.
M. B., Italia
Lakozia Mahafinaritra Misaotra anareo noho ilay lahatsoratra hoe “Afaka ny ho Toerana Mahafinaritra ny Lakozia”. (8 Janoary 1997). Izaho koa dia nandray soa tamin’ny resadresaka natao tao an-dakozia. Teo am-pamoasana tongolo sy ovy, ny reniko dia nampianatra ahy ho tia an’i Jehovah sy nampirisika ahy hanompo azy amin’ny fomba feno. Ireny resadresaka tao an-dakozia ireny dia hita ho nisy vidiny indrindra, nandritra ny vanim-potoana sarotra nanoheran’ny raiko anay teo amin’ny ara-pivavahana. Ankehitriny izaho sy ny reniko dia mahatsiaro fifaliana mahita ny raiko tonga mpanompon’i Jehovah. Fanampin’izany, dia nianatra fomba fahandro sakafo matsiro maro aho!
A. M. M., Italia
Miasa amin’ny maha-mpahandro ao amin’ny tranon’ny mpampiasa iray, izay ao amin’ny indostrian’ny fialam-boly aho. Noho izany, dia nahita fahafahana maro hizara sakafo ara-panahy tamin’ireo mpitsidika, aho — anisan’izany ny olo-malaza sasany — eo am-piasana ao an-dakozia. Mitahiry zavatra vita an-tsoratra vitsivitsy momba ny Baiboly ao amin’ny vatasarihana ao an-dakozia aho. Tamin’ny tarehin-javatra iray, dia nanao fiaraha-midinika ny Baiboly tamin’ny mpitsidika iray aho. Tatỳ aoriana dia niverina tao an-dakozia izy mba hanaovana fiaraha-midinika bebe kokoa. Raha mbola sahirana nanendy akoho aho, dia namaky tamin’ny feo avo avy amin’ny bokiko hoe Ny Fanambarana — Akaiky ny Fiafarany Malaza! izy. Eny, marina ny teninareo. Afaka ny ho toerana mahafinaritra ny lakozia!
A. R., Etazonia
Fiekena ny Heloka Manompo amin’ny maha-loholon’ny kongregasiona aho, ary maniry haneho ny fankasitrahako ilay lahatsoratra hoe “Manontany ny Tanora Hoe... Tokony Hiaiky ny Heloko ve Aho?” (8 Febroary 1997). Io lahatsoratra io dia nanosika tanora maro hiaiky ny heloka lehibe nataony fotoana vitsivitsy lasa izay. Fifaliana ny nahita fa taorian’ny nandraisan’izy ireo fanampiana feno fitiavana, ireo tanora ireo dia namerina indray ny fifandraisany tamin’i Jehovah. Tapa-kevitra ny hihazona ny tenany ho madio izy ireo.
O. B., Italia
Ilay lahatsoratra dia nanampy ahy hahatakatra fa ny fanginana dia mety hanimba tokoa. Mety hiteraka henatra sy hahatonga ho sadaikatra ny fiekena, nefa rehefa miaiky ny helokao amin’i Jehovah sy amin’ireo ray aman-dreninao ianao, dia mahita fifandraisana matanjaka kokoa sy akaiky kokoa amin’izy ireo.
B. K., Guyana
Tonga tamin’ny fotoana nilako azy indrindra ilay lahatsoratra. Nanampy ahy izy io hahita fa tsy maintsy milaza izay nataoko amin’ireo ray aman-dreniko sy ireo loholon’ny kongregasiona aho. Nihevitra aho hoe nosoratana ho ahy mihitsy ilay lahatsoratra. Rehefa nilaza ny zava-nanahirana ahy tamin’izy ireo aho tamin’ny farany, dia nahatsapa ho netinety kokoa erỳ!
A. A., Etazonia