Rahoviana ny Tantely Iray no Tsy Tena Tantely?

Somebiseby erỳ ny tantely, amin’ny fitetezana voninkazo an-jatony maro isan’andro sy amin’ny fitaterana mamimbony mankao amin’ny tohotra. Rehefa tonga ny lohataona, dia mitady vady ny tantelilahy. Miantehitra amin’ny fahitana sy ny fanamboloana izy ireo mba hanaovana izany. Misy hafa koa anefa tsy ampoizina mihitsy fa mitady fitia amin’ilay tantely tsy mahita lavitra — ny orkide.

Any atsimon’i Eoropa, dia misy orkide dia maromaro, izay miankina amin’ny fitoviany amin’ny tantelivavy mba hisian’ny fitsaihana. Mila mandefa “fonosan’entana” vovobony ho any amin’ny orkide hafa ireo orkide ireo. Mpitondra entana tonga lafatra ny tantely. Koa satria tsy manana mamimbony fy mba hanintonana tantely ireo orkide, dia azo lazaina hoe tsy maintsy mampiasa hafetsena izy ireo. Ary izao ilay fitaka: Mitovy endrika sy fofona tanteraka amin’ny tantelivavy ilay voninkazo, hany ka mitady hivady aminy ilay tantelilahy! Samy manana ny endrika isandohana sy ny hanitra azy manokana ny karazany tsirairay amin’ireo orkide ireo.

Mandra-pahatakatr’ilay tantely fa, hay, diso fiantefa izy, dia efa nametraka vovobony matevitevina madity teo amin’ny vatany, ilay orkide. Lasa manidina ilay tantely rehefa avy eo, kanefa mbola voafitaky ny orkide hafa iray indray, izay mandray ilay vovobony. Aorian’ny fahadisoam-panantenana maromaro toy izany vao takatr’ilay tantely fa tsy tokony hitokiana ireo orkide ireo. Amin’izay izy dia azo inoana fa efa namindra vovobony tamin’ny sasany amin’ireo voninkazo ireo.

Ahoana no nahazoan’ireo orkide tsy afa-misaina ireo ilay fofona sy fisehoana ivelany mety mba hamitahana ireo tantely? Manome porofon’ny fisian’ny Mpamolavola manan-tsaina iray ny teknika miavaka toy izany, ary tsy mitsahatra mampitolagaga sy mambabo antsika ny zavatra noforoniny.