Ny Fomba Iatrehako ny Fiakanakanam-piteny

Notantarain’i Sven Sievers

NIAKANAKAM-PITENY hatramin’ny fahazazako aho. Rehefa manao jery todika aho, dia mankasitraka ny fomba fihetsik’ireo ray aman-dreniko teo anoloan’ilay olana. Rehefa niakanakana aho, dia niezaka foana izy ireo hifantoka tamin’ny fihainoana izay tiako holazaina, fa tsy tamin’ny fanitsiana ny fomba fiteniko kosa. Mety hampitombo ilay tsy metimety ny fisarihan’ny ray aman-dreny tsy an-kijanona ny saina ho amin’ilay fiakanakanan’ny zanany, araka ny tenin’ireo mpitsabo momba ny fahaiza-miteny.a

Tonga Vavolombelon’i Jehovah ny reniko fony aho telo taona. Nanapa-kevitra ny hanaraka ny ohatra nomeny aho fony aho zatovo, ary nampiana mba hianatra ny Baiboly tamin’ny fomba feno. Natao batisa amin’ny maha-mpanompon’Andriamanitra nanolo-tena aho tamin’ny 24 Jolay 1982, tamin’ny fivoriamben’ny distrika iray natao tany Neumünster, any Alemaina. Nifindra nanketo Afrika Atsimo aho tatỳ aoriana ary teto, dia nanohy nandray anjara tamin’ny asa fitoriana ampahibemaso izay nandidiana ny Kristiana marina rehetra mba handraisany anjara. (Matio 28:19, 20). Mety hanontany tena ianao hoe ahoana no ataoko, dia izaho izay miakanakam-piteny?

Valisoa noho ny fatokian-tena

Tsy maintsy miaiky aho fa sarotra amiko indraindray ny mihazona toe-tsaina feno fatokian-tena, nefa hitako fa tena manampy be tokoa izy io. Ny zava-misy dia hoe afaka mampita hevitra amin’ny hafa foana ihany aho. Raha tsy amin’ny alalan’ny teny, dia amin’ny alalan’ny fanoratana teny fohy na ny fampisehoana fotsiny zavatra vita an-tsoratra ara-baiboly amin’ny hafa, no ampitako hevitra. Manampy ahy handresy ny fahasarotan’ny fanombohan-dresaka ny fatokian-tena. Miezaka aho hihazona ny fampidiran-dresako ho tena tsotra. Eo am-panombohan’ny resadresaka iray, dia avelako hiresaka betsaka araka izay azo atao ny tompon-trano. Tia miresaka moa ny olona, ary manome ahy ny fahafahana hahalala ny fomba fisainan’izy ireo izany. Manohy ny resadresaka amin-javatra izay mahaliana azy ireo aho avy eo, amin’ny fanasongadinana ny hafatra ao amin’ny Baiboly. Manampy ahy hanadino ny olana momba ny fiteny mahazo ahy ny fifantohana amin’izay lazainy, ary dia tsy miakanakana firy aho.

Manampy ahy ho sahy hanome valin-teny any amin’ireo fivoriana kristiana koa ny fatokian-tena. Hitako fa arakaraka ny andraisako anjara amin’ny fiaraha-midinika ara-baiboly no mahatonga ny mpanatrika sy ny mpitarika fivoriana ho zatra kokoa amin’ny fomba fiteniko, ka ihainoany izay lazaiko, fa tsy ny fomba ilazako izany kosa.

Mba hahatsapana ny fifaliana azo avy amin’ny fahombiazana, dia tsy maintsy miezaka hatrany aho. Misakana ahy tsy ho resin’ny fitseran-tena ka hanjary tsy hisokatra amin’ny hafa, izany. Tolona mitohy ny fandresena ny fitseran-tena. Voalaza fa raha azeran’ny soavaly ny olona iray nitaingina azy, dia zava-dehibe ny hiakaran’ilay olona indray eo ambonin’ilay soavaly mba tsy hamoizany fatokian-tena. Koa raha voatery mijanona mihitsy aho mandritra ny valin-teny iray satria miraikitra tanteraka ny lelako, dia miezaka hiakatra eo ambonin’ilay soavaly indray aho, raha lazaina amin’ny teny hafa, amin’ny fahasahiana manome valin-teny raha vao misy fahafahana manaraka.

Ny fomba ahafahan’ny hafa manampy

Rehefa voatery hiantso an-telefaonina aho na hanontany fanazavana amin’olon-tsy fantatra, dia tena ankasitrahako ny fanampiana amim-pahaiza-mandanjalanja. Feno hafanam-po loatra anefa ny olona sasany eo amin’ny faniriany hanampy, ka mitondra ahy toy ny zazakely tsy afaka manao fanapahan-kevitra, izy ireo.

Ankasitrahako koa ny fanampian’i Tracy, vadiko be fitiavana. Alohan’ny hisoloany ‘vava’ ahy, dia miara-mandinika ilay tarehin-javatra amin’ny an-tsipiriany izahay ka fantany izay ho tiako hotanterahina. (Ampitahao amin’ny Eksodosy 4:10, 14, 15.) Amin’izany fomba izany, dia mampiseho fanajana ahy vadiny izy, ary mamela ahy hahatsapa fa mbola manana fahefana eo amin’ny fiainako manokana ihany aho.

Fanampiana lehibe iray hafa ny Sekolin’ny Fanompoana Teokratika. Amin’io fivoriana isan-kerinandro io, dia misy mpianatra mandray anjara amin’ny famakiana Baiboly ampahibemaso sy amin’ny fanaovana lahateny fohy mahakasika foto-kevitra ara-baiboly. Gaga aho nahita fa matetika aho no afaka mamaky teny sy miteny tsara tokoa, eo anoloan’ny mpanatrika. Raha tsy nisoratra anarana tamin’ilay sekoly aho, dia angamba tsy ho nanjary nahalala na oviana na oviana fa mahay manao izany aho.

Rehefa nanana anjara tamin’ny Sekolin’ny Fanompoana Teokratika aho, dia nampahery ahy indrindra rehefa nifantoka tamin’izay nolazaiko ilay mpampianatra, fa tsy tamin’ny fomba nilazako izany. Nandray soa betsaka avy tamin’ny Boky ho An’ny Sekolin’ny Fanompoana Teokratikab aho, na dia zava-tsarotra lehibe kokoa ho an’ireo miakanakam-piteny noho ny ho an’ireo miteny ara-dalàna aza ny lafin-javatra sasany asehon’io boky io. Ohatra, tsy afaka mamita ny lahateniko ao anatin’ny fotoana natokana ho ahy aho indraindray, noho ny habetsahan’ny fiakanakanako. Tena mampahery ahy anefa, rehefa manasongadina lafin-javatra izay azoko tandremana ilay mpampianatra.

Tombontsoam-panompoana lehibe kokoa

Tamin’ny lasa, dia nanana ny tombontsoa nanao famakian-teny ampahibemaso nalaina avy tao amin’ny zavatra vita an-tsoratra kristiana izay ianaranay any amin’ireo fivorianay aho. Nanana ny tombontsoa nitarika ny fianarana koa aho rehefa tsy nisy mpitory nahafeno fepetra nanatrika teo, ary manao izany tsy tapaka aho amin’izao andro izao. Na dia hendratrendratra aza aho teo am-panombohana, dia nahazo ny fanampian’Andriamanitra aho teo amin’ny fanatanterahana asa nanendrena toy izany.

Nandritra ny taona maro anefa, dia voafetra ny fahafahako hamaky teny na hampianatra ny kongregasiona avy teny ambony lampihazo. Mora takatra izany satria nisy fotoana naha-ela loatra ahy vao nahatafavoaka hevitra azon’ny hafa. Koa nampiasa ny heriko manontolo tamin’ny fanaovana asa nanendrena hafa, aho. Mpanampy ny mpikarakara ny tahirin-gazety Ny Tilikambo Fiambenana sy Mifohaza! tao amin’ny kongregasiona aho, tamin’ny voalohany. Avy eo, taorian’ny naha-voatendry ahy ho mpanampy amin’ny fanompoana, dia nikarakara ny tahirina Baiboly sy boky ary zavatra vita an-tsoratra hafa aho. Notendrena hanara-maso ireo sarin’ny faritany izay nampiasainay teo amin’ny fitorianay ampahibemaso aho, tatỳ aoriana. Nitondra fifaliana betsaka ho ahy ny fifantohana tamin’ireny asa nanendrena ireny, ary niezaka hanao asa tsara aho tamin’izany.

Nandritra ireo valo taona lasa, dia nanompo tamin’ny naha-evanjelisitra manontolo andro niaraka tamin’i Tracy koa aho. Azo antoka fa nitahy ahy tamin’io lafiny io koa i Jehovah. Raha ny marina, indraindray aho dia manontany tena raha mampiasa ny fahalemeko, dia ny fiakanakanam-piteny, i Jehovah. Tamin’ireo olona dimy nampiako ho tonga Kristiana nanolo-tena, dia miakanakam-piteny ny roa.

Mbola tadidiko amim-pifaliana foana ny andro izay nanendrena ahy ho loholon’ny kongregasiona. Na dia tsy afaka mampianatra firy avy eny ambony lampihazo aza aho, dia miezaka hifantoka amin’ny fanampiana ny hafa isam-batan’olona. Tsy mametra ny fahafahako hanao fikarohana araka ny Soratra Masina mba hanampiana mpikambana ao amin’ny kongregasiona izay miatrika olana lehibe, ny fiakanakanam-piteny.

Nandritra ireo dimy taona lasa, dia nasaina hanao anjara betsaka kokoa hatrany, izay nilana ny itenenana aho. Ankoatra ny fanaovana lahateny tao amin’ny Sekolin’ny Fanompoana Teokratika, dia afaka nanao fampandrenesana fohy aho tamin’ireo fivoriana hafa. Nihanisosa tsara tsikelikely ny fiteniko. Niverina niakanakana be indray anefa aho avy eo. Nanahy mafy aho ary nieritreritra hoe: ‘Tsy hahazo anjara intsony aho.’ Akory anefa ny fahagagako, fa tao amin’ilay fandaharana nanaraka ny anarako! Nilaza ny mpiandraikitra mpitantan-draharahan’ny kongregasionanay fa raha manjary miraikitra be ny lelako ka tsy afa-manohy aho, dia afaka manopy maso any aminy fotsiny aho ary dia hiakatra eny amin’ny lampihazo izy ka hanohy ilay lahateny. Nampiasa an’io fanolorana feno fitiavana io indray mandeha na indroa aho, nefa tsy voatery nanao toy izany tato anatin’ireo volana faramparany. Arakaraka ny nihatsaran’ny fiteniko, dia notendrena hanao anjara lava kokoa aho, anisan’izany ny lahateny ampahibemaso. Tsy nahatakatra tamin’ny fomba feno ny fandrosoana vitako aho raha tsy rehefa nasaina handray anjara tamin’ny fampisehoana roa, tamin’ny fivoriamben’ny fizaran-tany iray nataon’ny Vavolombelon’i Jehovah, vao haingana.

Tsoriko fa tsy takatro amin’ny fomba feno ny nahatonga ny fiteniko hihatsara. Afa-tsy izany koa, dia mety hiharatsy indray izy io rahampitso. Raha ny marina, rehefa toa nanao fandrosoana voafaritra tsara teo amin’ny fitenenana avy teny ambony lampihazo aho, dia niverina niakanakana be indray rehefa niresaka tamin’ny isam-batan’olona. Koa itỳ dia tsy tantaram-pandresena amin’ny heviny hoe nandresy ny fiakanakanam-piteny aho. Rehefa miverina miakanakana indray aho, dia miezaka hampahatsiaro ny tenako fa mila manaiky ny fetran’ny mety ho vitako sy ‘mihevi-tena araka ny antonona eo amin’ny fiaraha-mandeha amin’Andriamanitra’, aho. — Mika 6:8, NW .

Na inona na inona mety hoentin’ny hoavy, dia tsy hitsahatra hiezaka aho, amin’ny fahalalana fa ho resy tanteraka ny fiakanakanam-piteny ao amin’ny tontolo vaovaon’Andriamanitra izay mihamanatona. “Ny lelan’izay mikodedidedy”, hoy ny Baiboly, “hahay miteny mahitsy.” Matoky aho fa ho marina amin’ny heviny ara-bakiteny sy ara-panahy izany, ary ‘hihoby na dia ny moana aza’. — Isaia 32:4; 35:6.

[Fanamarihana ambany pejy]

[Sary, pejy 15]

Miaraka amin’i Tracy, vadiko