Nofinofy Fotsiny ve ny Fahasalamana Tonga Lafatra?
EFA mba narary mafy ve ianao, sa nanaovana fandidiana lehibe? Raha izany no izy, dia azo inoana fa vao mainka mankamamy ny fiainana ianao ankehitriny. Na manao ahoana na manao ahoana anefa ny toe-pahasalamanao ara-batana, inoanao ve fa ho azo atao ny hanana fahasalamana tonga lafatra? Mety ho toa tsy araka ny zava-misy izany, rehefa heverina ny aretina mahakely hery, toy ny kansera na ny aretim-po, izay miely dia miely. Eny tokoa, azon’aretina ny ankamaroantsika tsindraindray. Kanefa, tsy nofinofy fotsiny ny fahasalamana tanteraka.
Noforonina hanana fahasalamana tsara dia tsara ny olombelona, fa tsy noforonina hitolona amin’ny aretina sy ny fahafatesana. Noho izany, mba hanafoanana ny aretina sy ny fahafatesana, dia nanome ny fototra ho an’ny fahasalamana tonga lafatra sy ny fiainana mandrakizay i Jehovah, tamin’ny alalan’ny sorom-panavotan’i Kristy Jesosy. “Toy izao no nitiavan’Andriamanitra izao tontolo izao: nomeny ny Zanani-lahy Tokana, mba tsy ho very izay rehetra mino Azy, fa hanana fiainana mandrakizay.” (Jaona 3:16). Tsy hitolona amin’ny tsy fahasalamana na ny fahanterana ireo izay hiaina mandrakizay ao amin’ny tontolo vaovao nampanantenain’Andriamanitra. Koa satria izany no hitranga, dia hanao ahoana ny kilema?
Fanamaivanana amin’ny aretina
Manome santionany ny fomba nanasitranan’i Jesosy Kristy ny kilemaina. Momba ny fanasitranana toy izany, dia izao no voalaza: “Mahiratra ny jamba, ary afaka ny mandringa; diovina ny boka, ary malady ny marenina; atsangana ny maty, ary ny malahelo dia itoriana ny filazantsara.” (Matio 11:3-5). Eny, “sitrana tokoa” izay kilemaina rehetra nanatona an’i Jesosy. (Matio 14:36). Ho vokany, dia “talanjona ny vahoaka, raha nahita ny moana miteny, ny kilemaina sitrana, ny mandringa afaka, ary ny jamba mahiratra; dia nankalaza an’Andriamanitry ny Isiraely izy”. — Matio 15:31.
Tsy misy afaka manao fanasitranana tahaka ireo amin’izao andro izao. Na dia izany aza, dia afaka matoky tokoa isika fa hasandratra ho amin’ny fahatanterahana ny olombelona, ary hositranina amin’ny aretina rehetra mahakasika ny saina sy ny vatana, eo ambanin’ny fanapahan’Andriamanitra. Voarakitra ao amin’ny Apokalypsy 21:3, 4 ny fampanantenan’Andriamanitra manao hoe: “Indro, ny tabernakelin’Andriamanitra dia eo amin’ny olona, ary Izy hitoetra eo aminy, ary ireo ho olony, ary Andriamanitra no hitoetra eo aminy, dia ho Andriamaniny. Ary hofafany ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.”
Alao sary an-tsaina ange ny tontolo iray tsy hilana indostria fanamboaram-panafody na hôpitaly, fandidiana na fitsaboana e! Ankoatra izany, ao amin’ny Paradisa ho tafaverina amin’ny laoniny, dia ho anisan’ny zavatra efa lasa ny fahaketrahana sy ny aretin-tsaina. Ho tena fahafinaretana ny miaina; ary ho fihetseham-po maharitra ny fahasambarana. Eny tokoa, hamelona ny fahaizan’ny vatana hihavao indray ny hery tsy mety ritran’Andriamanitra, ary hanafoana ny vokatra manimban’ny fahotana ny soa avy amin’ny sorom-panavotana. “Tsy hisy amin’ny mponina ao hilaza hoe: Marary aho”. — Isaia 33:24.
Izany ka fanantenana mahatalanjona — ny hanana fahasalamana ara-batana sy ara-panahy tonga lafatra eo ambanin’ny Fanjakan’Andriamanitra! Eo am-pihazonanao fomba fiaina voalanjalanja sy mahasalama dieny ankehitriny, dia miandrandrà ny fitahiana hoentin’ny tontolo vaovaon’Andriamanitra. Enga anie i Jehovah ‘hahavoky soa ny vavanao, ary enga anie ny fahatanoranao hody indray toy ny an’ny voromahery’! — Salamo 103:5.