Ho Salama Tsara ny Rehetra—Tsy ho Ela!
“MALAZA izao ilay hevitra hoe tsy harary intsony mihitsy”, araka ny lazain’ilay gazety alemà hoe Focus. Tsy vaovao anefa izany hevitra izany, satria rehefa noforonina ny olombelona, dia tsy nokasain’ilay Mpamorona harary mihitsy izy ireo. Tsy hoe hanana “fahasalamana antoniny” fotsiny no nikasan’ny Mpamorona ny mponina rehetra eto an-tany, fa fahasalamana tonga lafatra mihitsy!—Izahay no manao sora-mandry.
Nahoana àry isika no marary? Milaza amintsika ny Baiboly, fa lavorary i Adama sy i Eva, ray aman-drenin’ny olombelona rehetra, rehefa noforonin’i Jehovah Andriamanitra. Taorian’ny namoronany, dia “hitan’Andriamanitra izay rehetra nataony, ary, indro, tsara indrindra izany”. Tsy fikasan’ilay Mpamorona antsika be fitiavana mihitsy ny hoe harary sy ho faty ny olona. Nanjary nanota anefa i Adama sy i Eva rehefa nifidy ny tsy hanaraka ny fomba fiaina nasaina narahiny. Noho izany, dia maty izy ireo, ary namindra ny fahafatesana tamin’ny olombelona rehetra.—Genesisy 1:31; Romana 5:12.
Tsy narian’i Jehovah tanteraka anefa ny olona, ary tsy nohadinoiny ilay fikasany ho azy ireo sy ho an’ny tany. Nampahafantariny manerana ny Baiboly fa mbola mikasa ny hamerina ny olona mankatò ho amin’ny fahasalamana tsara toy ny tany am-boalohany izy. Nampiseho ny heriny manasitrana i Jesosy Kristy Zanak’Andriamanitra, fony tetỳ an-tany. Nositraniny, ohatra, ny jamba, ny marenina, ny olona voan’ny manirano sy androbe ary nalemy.—Matio 4:23, 24; Lioka 5:12, 13; 7:22; 14:1-4; Jaona 9:1-7.
Tsy ho ela Andriamanitra dia hilaza amin’i Jesosy Kristy Zanany Mpanjaka, mba handray an-tanana ny raharahan’ny tany. Amin’izay dia ho tanteraka ilay faminanian’i Isaia hoe: “Tsy hisy amin’ny mponina ao hilaza hoe: Marary aho; ny olona izay mitoetra ao dia voavela heloka.” (Isaia 33:24) Ahoana no hahatanterahan’izany?
Milaza ilay mpaminany fa hisy olona ho “voavela heloka”. Araka izany dia hesorina ilay zavatra miteraka ny aretina, dia ny fahotana nolovan’ny olombelona. Amin’ny fomba ahoana? Hampiharina amin’ny olombelona mankatò ny sorom-panavotan’i Jesosy, ka noho izany dia hiala ny fototry ny aretina sy ny fahafatesana. Hiaina ao anatin’ny paradisa ny olona maneran-tany. Hoy i Jaona apostoly kristianina: “Hofafany [Andriamanitra] ny ranomaso rehetra amin’ny masony; ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” Ho tanteraka tsy ho ela izany!—Apokalypsy 21:3, 4; Matio toko 24; 2 Timoty 3:1-5.
Mahaiza mandanjalanja
Tsy misaraka amin’ny fiainan’ny olona ny aretina, mandra-pahatongan’izany. Ara-dalàna àry raha miahy ny fahasalamany sy ny an’ny fianakaviany izy.
Mankasitraka lalina ny ezaka ataon’ny mpitsabo ny Kristianina amin’izao andro izao, ary mikarakara araka ny tokony ho izy ny fahasalamany. Manampy antsika handanjalanja amin’io lafiny io anefa ny fampanantenan’ny Baiboly momba ny tsy hisian’ny aretina amin’ny hoavy. Tsy hety hisy mihitsy ny fahasalamana tonga lafatra, raha tsy rehefa mandray an-tanana ny raharahan’ny tany ilay Mesia Mpanjaka. Araka ny efa hitantsika, na dia ireo fandrosoana nampitolagaga vita aza dia tsy nahatonga ny fitsaboana ho afaka hanakatra ilay paiso mamy indrindra teo an-tampon’ilay hazo, dia ny fahasalamana tsara ho an’ny rehetra.
Tsy ho ela dia hanana “fahasalamana antoniny ny mponina rehetra eto an-tany”. Tsy ny ONU, na ny Fikambanana Iraisam-pirenena Momba ny Fahasalamana, na ny mpiaro ny tontolo iainana, na ny mpitondra fanavaozana eo amin’ny fiaraha-monina, na ny mpitsabo anefa no hitondra izany. I Jesosy Kristy kosa no voatokana hitondra izany. Ho faly tokoa ny olombelona rehefa ela ny ela ka “hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra”!—Romana 8:21.
[Sary, pejy 10]
Ho salama tsara ny rehetra ao amin’ny tontolo vaovaon’Andriamanitra