Fanteno Tsara ny Fialam-boly

Inona no vokatry ny fialam-boly eo amin’ny ankizy? I Alvin Poussaint dia sady mpanabe no dokotera, ary efa 30 taona eo ho eo izao no nifaneraserany tamin’ankizy, teo amin’ny sehatry ny asany. Miaiky izy fa ny fijeren’ny tanora sarimihetsika momba ny mahalahy sy ny mahavavy sy feno herisetra dia mampianatra azy hoe ara-dalàna ny fitondran-tena toy izany. Manintona ny saina ho amin’ny loza hafa iray koa izy: “Nisy ankizy hitako fa lasa saro-tahotra na fatra-pila ady, rehefa mody avy nijery sarimihetsika toy izany. Hitako fa niverina nanao toy ny zazakely indray ny hafa, ka lasa namikitra mafy tamin’olona, na ninono tanana na nanditsaka am-pandriana indray.” Araka ny voalazan’io dokotera io, ny manam-pahaizana manokana dia nanome porofo marim-pototra fa misy fisehoan-javatra hafa izay mety hiteraka ireo fihetsika ireo koa, toy ny fampijaliana ara-batana na ny fametavetana, na ny fipetrahana ao amin’ny faritra misy ady, raha zavatra vitsivitsy monja aza no hotononina. Manazava toy izao izy: “Tsy hisy amintsika hinia hametraka zaza iray ao anatin’ny toe-javatra toy ireo, kanefa ny tenantsika tsy misakana azy tsy hijery sarimihetsika mampiseho zavatra izay hampihoron-koditra antsika raha ny tena izy aminy no hitany.”

Manana antony marim-pototra ny Kristianina raha mifantina tsara ny fialam-boliny sy manao izay ahazoana antoka fa tsy mandika ny foto-pitsipiky ny Baiboly ny fialam-boly fidiny. Milaza toy izao, ohatra, ny Salamo 11:5: “Jehovah mizaha toetra ny marina; fa ny ratsy fanahy sy ny mifaly hampidi-doza dia samy halan’ny fanahiny.” Ary nanoratra toy izao i Paoly, apostoly kristianina: “Koa vonoy ny momba ny tenanareo izay etỳ an-tany, dia fijangajangana, fahalotoana, firehetam-po, fanirian-dratsy ary fieremana (...). Esory koa izao rehetra izao, dia fahatezerana, fiafonafonana, lolompo, fitenenan-dratsy, teny mahamenatra avy amin’ny vavanareo.” — Kolosiana 3:5, 8.

Tokony hitandrina àry ny ray aman-dreny mba tsy hifidy fialam-boly mampandroso ny “asan’ny nofo”, na ho an’ny zanany na ho an’ny tenany. (Galatiana 5:19-21). Tokony hahay hifantina izy ireo, ka hanisy fiheverana ny karazam-pialam-boly fidiny, sy ny habetsahan’ny fotoana laniny amin’izany. — Efesiana 5:15-17.