Avy Amin’ny Mpamaky

Fahatahorana An’Andriamanitra hoe E? Voatosika aho haneho ny hafaliako noho ilay lahatsoratra hoe “Ny Fiheveran’ny Baiboly: Ahoana no Atahoranao Andriamanitra Fitiavana Iray?” (8 Janoary 1998). Nisy fotoana nisaintsainako momba io fanontaniana io indrindra. Efa noheveriko ihany fa ny fananana tahotra mahasoa ny tsy hampifaly an’Andriamanitra no atao hoe fahatahorana azy. Na izany aza, dia tsapako fa mbola nila nahatakatra io loha hevitra io amin’ny fomba feno kokoa aho. Novakiko àry ilay lahatsoratra. Ela ny ela ka nisy famelabelarana tena mahafa-po momba ny dikan’ny hoe matahotra an’Andriamanitra!

M. J. T., Etazonia

Voahitsy ny Tsy Rariny Misaotra noho ilay lahatsoratra hoe “Manitsy Zavatra Tsy Ara-drariny ny Fitsarana Eoropeana Iray”. (8 Janoary 1998). Ny fandrenesana momba ireo rahalahintsika mankany amin’ny fitsarana mangataka ny tsy hanerena azy hanao raharaha miaramila dia mampahatsiahy ahy ny fomba nahazoan’ireo rahalahintsika ny zo hitory isam-baravarana isan’alahady. Manampy ahy tsy hanamaivana na oviana na oviana an’io tombontsoa hitory isan-trano io ny fitantarana toy ireny.

S. V., Etazonia

Incas Rehefa avy namaky ilay lahatsoratra hoe “Ny Fomba Namoizan’ireo Incas ny Empira Volamenany Niroborobo” (8 Janoary 1998) aho, dia tsy maintsy maneho ny fankasitrahako lalina noho ny tantara voaravaka sary tsara sy tena mampalahelo toy ireny. Tsy isalasalana fa hitondra fampiononana be dia be ho an’ny taranak’ireo Incas ny ezaka ataonareo Vavolombelona mba hitondrana ny hafatrareo mampionona any aminy. Misaotra anao, ry Mifohaza! noho ny nilazanao ny fahamarinana.

S. B., Nizeria

Zanaka Mandao ny Tokantrano Tena velom-pankasitrahana aho noho ilay fitohitohizan-dahatsoratra hoe “Rehefa Mandao ny Tokantrano ny Zanaka” (8 Febroary 1998). Niteraka alahelo, izay ela vao nihena, ny namelako ny handehanan’ny zanako malalako. Marina anefa ny anareo. Ny fotoana sy ny fahaiza-mipetraka eo amin’ny toeran’ny hafa tokoa no manamora kokoa ny fiainana ao amin’ilay akany foana. Afaka manavao indray ny fatoram-panambadiana amin’ny vadintsika isika ray aman-dreny.

A. E., Kanada

Valim-bavako ireo lahatsoratra ireo. Mety ho loharanom-pahakiviana sy ady ny fandaozan’ny zanaka ny tokantranon-dray aman-dreniny. Afaka mandresy ihany anefa ny fiadanana sy ny fitiavana, noho ny torohevitra tsara ao amin’io lahatsoratra io.

P. N., Frantsa