Mety ho Fongana ve ny Orkide?
Mahay mifanaraka amin’ny toe-javatra misy azy ny orkide. Afaka maniry eo amin’ny nofon-tany, eny amin’ny hazo, ary na dia eo ambony vatolampy aza, izy. Mampitandrina anefa ny International Union for Conservation of Nature and Natural Resources (IUCN) (fikambanana iraisam-pirenena miahy ny natiora) fa raha mitohy ny fanimbana ny tontolo misy azy, dia mety ho faty eny amin’ny natiora aniriany eny ny karazany maro amin’ity zavamaniry kanto indrindra ity. “Vokatry ny fanimbana ny toerana anirian’ny orkide dia manjary lany tamingana, na mifindra any an-toeran-kafa, ireo bibikely tena ilaina tokoa, satria mpamindra vovobony”, hoy i Wendi Strahm, avy ao amin’ny IUCN. “Rehefa mitranga izany”, hoy ihany izy, “dia tsy afaka mitombo isa intsony ny orkide.”
Tombanana ho ny 20 isan-jaton’ireo orkide dimy tapitrisa namidy maneran-tany, isan-taona, no nalaina teny amin’ny natiora. Manakantsakana ny fitsimbinana an’io zavamaniry kanto io izany, araka ny fanamarihan’ny IUCN. Araka izany, ireo izay maniry hahazo orkide, dia ampirisihin’ny IUCN hividy ireo izay nambolena tany amin’ny tranom-boly fitaratra, fa tsy hanongotra azy ireny eny amin’ny toerana voajanahary aniriany eny.
Misy karazany 20 000, fara fahakeliny, ny orkide fantatry ny olombelona. Zara raha mirefy 0,6 santimetatra ny haavon’ny sasany; ny hafa dia zavamaniry mandady izay mitombo ka mahatratra 30 metatra ny halavany. Maniry tsara ny ankamaroan’ny orkide, raha ao amin’ny faritra mafana tropikaly, be rotsakorana, no misy azy. Miankina amin’ny fifandanjana marefo eo amin’ny natiora anefa izy ireo, mba tsy ho faty.
Mampalahelo fa manohy manimba ny tontolo iainana ny tsy fahalalan’ny olombelona sy ny tsy firaharahany, ka mihamitombo isa hatrany ny zavamaniry mety ho fongana, anisan’izany ny orkide. Tsy haharitra ela intsony anefa izany. Ao amin’ilay tontolo vaovao nampanantenain’Andriamanitra, dia tsy hanimba ny natiora ny olombelona. Ho tanteraka amin’izany fotoana izany ireto tenin’ny mpanao salamo ireto: “Aoka ho faly ny saha sy izay rehetra eo aminy; dia hihoby amin’izay ny hazo rehetra any an-ala”. — Salamo 96:12.
[Sary nahazoan-dalana, pejy 31]
Jardinería Juan Bourguignon
[Sary nahazoan-dalana, pejy 31]
Jardinería Juan Bourguignon