Hevi-diso Miely Patrana Momba ny Bibilava

AVY AMIN’NY MASOIVOHON’NY MIFOHAZA! ANY INDE

Voasinton’ny fofon’ny voninkazo jasmina teo amin’ny volon’ilay ankizivavy ilay kôbrà madity, ka nikisaka nanatona azy. Toy ny onjan-dranomasina mivalombalona ny vatany lavalava. Nibanjina lalina an’ilay ankizivavy izy. Tamin’izay ilay ankizivavy dia tsy nahahetsika, ary nahita tselatra, toy ny vatosoa mamiratra, teo amin’ny handrin’ilay bibilava. Tampoka teo, dia niantsambotra ilay izy, ka nanatsatoka ny vanginy teo amin’ny sandrin’ilay ankizivavy.

DISO sa marina? Diso avokoa io filazalazana toa hitan’ny maso voalaza eo ambony io, ary miorina amin’ny hevi-diso ananan’ny besinimaro. Andeha hodinihintsika ny sasany amin’ireo hevi-diso ireo.

1. Manintona bibilava ny fofon’ny jasmina sy ny hazo santal ary ny fofona manitra hafa. DISO. Manintona bibikely ny fofona manitra, manintona sahona ny bibikely, ary manintona bibilava ny sahona, izay anisan’ny sakafony.

2. Manonja miakatra sy midina ny vatan’ny bibilava rehefa mikisaka izy. DISO. Toa toy izany no fijery azy rehefa mikisaka eo ambony vato lehibe ny bibilava. Raha ny ara-dalàna anefa, dia marin-drano sy manaraka zotra mahitsy ny fikisaky ny kôbrà sy ny bibilava an-tanety hafa. Na, manenjana ny tapany aloha amin’ny vatany hankany aloha izy ary misarika ny tapany aoriana na, mitady ny mivohitra kely eo amin’ny tany, sady miolikolika mandroso, ka toy ny litera S no fijery azy.

3. Misy vatosoa eo amin’ny lohan’ny bibilava sasany. DISO. Hevi-dravina izany, mbamin’ilay finoana fa ireo lehilahy ambony tany Inde fahizay dia narovan’ny kôbrà.

4. Manao izay tsy hahafahan’ny rembiny mihetsika ny kôbrà amin’ny fibanjinana azy. DISO. Mazàna ny bibilava no mibanjina rehefa matahotra, ka toa mijery mifantoka sy lalina no fahitan’ny olona mifanena aminy azy. Tsy fomba fisamborany remby akory anefa izany.

5. Miantsambotra eny amin’ny rembiny ny kôbrà. DISO. Mba hanafihana ny rembiny, dia miantoraka any aloha ny tapany anoloana amin’ny vatan’ny kôbrà, nefa mijanona amin’ny tany ihany ny ampahany lehibe aminy, mba hisy hamikirany. Fara fahalavany, dia ny ampahatelon’ny vatany no mitsangana sy mamely.

6. Madity sady mangatsiaka foana ny hoditry ny bibilava, anisan’izany ny an’ny kôbrà. DISO. Maina ny hoditry ny bibilava, misy kirany mifanindry, ary malefaka no fahatsapana azy. Zavaboary mangatsia-dra ny bibilava; miova arakaraka ny fiovan’ny maripana ivelany ny maripanan’ny vatany.

7. Marenina ny kôbrà. DISO. Hevi-diso ananan’ny maro io. Maro tokoa no mihevitra fa ny hany ren’ny bibilava dia ny fihovotrovotry ny tany izay tsapan’ny vatany manontolo. Milaza tsy mivantana ny Baiboly ao amin’ny Salamo 58:4, 5 fa tsy marenina ny kôbrà, ary marina izany. Nisy fikarohana vao haingana nampiseho fa afaka mandre feo entin’ny rivotra ny kôbrà, ary mihetsika izy rehefa mandre ny mozikan’ny mpibaiko bibilava. — Jereo koa ny Mifohaza! (frantsay) tamin’ny 22 Jolay 1993, pejy 31.

[Sary nahazoan-dalana, pejy 15]

Bibilava etsy ambony: Animals/Jim Harter/Dover Publications, Inc.