Inona no Fanantenana Entin’ny Hoavy Raha ny Amin’ny SIDA?
ANKOATRA ny tsy fisiam-panafody hitsaboana na hisorohana ny fifindran’ny VIH, dia misy anton-javatra hafa koa tsy ahafahana mandresy ilay aretina. Anisan’ireny anton-javatra ireny ny tsy fahavononan’ny maro hanova ny fomba fiainany, fa aleony aza misetra ilay loza. Any Etazonia, ohatra, dia tsy niova firy ny taham-pifindran’ilay aretina, na dia nihena aza ny isan’ny olona voan’ny SIDA efa vaky tanteraka. Ny antony naroson’ny Associated Press, dia satria “olona maro no tsy manaraka ny fampitandremana momba ny fisorohana”.
Misy olana fanampiny eo amin’ny ady amin’ilay aretina, atỳ amin’ireo firenena an-dalam-pandrosoana, izay misy ny 93 isan-jato eo ho eo amin’ireo olona tratran’ny VIH, araka ny tatitra. Maro amin’ireny tany ireny no mahantra loatra ka tsy afaka manome na dia ny fikarakaram-pahasalamana fototra aza. Na dia misy ireo fanafody vaovao aza any amin’ireo tany ireo, ny vidin’ny fitsaboana mandritra ny herintaona dia hihoatra ny vola azon’ny olona maro mandritra ny androm-piainany! Amin’ny ankapobeny anefa, dia tsy misy any akory izany fanafody vaovao izany.
Kanefa, aoka hatao hoe misy fanafody vaovao sy mora vidy izay tena hanasitrana ilay aretina tokoa. Ho tonga hatrany amin’izay rehetra mila azy ve izany fanafody izany? Angamba tsia. Isan-taona, araka ny voalazan’ny Sampan-draharahan’ny Firenena Mikambana Mikarakara ny Reny sy ny Zaza, dia ankizy tokony ho efatra tapitrisa no matin’ny aretina dimy izay azo sorohina tsara amin’ny alalan’ny vaksiny mora vidy sady efa misy.
Ahoana ny amin’ny olona mitondra otrikaretina, any amin’ireo tany tsy afaka mahazo fanafody hitsaboan-tena ireo? Nanampy teo amin’ny fandaminana fandaharam-pisorohana VIH sy fandaharam-pikarakarana olona voa tany amin’ny tany an-dalam-pandrosoana maro i Ruth Mota, avy ao amin’ny International Health Programs (fandaharan’asa iraisam-pirenena momba ny fahasalamana), any Santa Cruz, Kalifornia. Hoy izy: “Hitako fa zava-dehibe, mitovy amin’ny fahazoana fanafody, ny fananana toe-tsaina tsara. Mahafantatra olona mitondra VIH efa hatramin’ny 10 ka hatramin’ny 15 taona, izay tsy nihinam-panafody mihitsy, aho. Mahasoa ny fanafody, nefa tsy hoe fampidirana zavatra simika ao amin’ny vatana ihany akory no voafaoka amin’ny fitsaboana. Voafaoka amin’izany koa ny toe-tsaina, ny fanohanan’ny fiaraha-monina, ny fahasalamana ara-panahy, ary ny sakafo mahavelona.”
Hisy ny vahaolana
Misy antony tokony hinoana ve fa ho resy ny SIDA indray andro any? Eny. Voarakitra ao amin’ilay antsoin’ny maro hoe Vavaka Nampianarin’ny Tompo, na ny Rainay Izay any An-danitra, ny fanantenana tsara indrindra. Ao amin’io vavaka io, voarakitra ao amin’ny bokin’ny Matio ao amin’ny Baiboly, dia mangataka ny hanaovana ny sitrapon’Andriamanitra eto an-tany, tahaka ny anaovana azy any an-danitra, isika. (Matio 6:9, 10). Tsy sitrapon’Andriamanitra ny hamelezan’ny aretina ny olombelona tsy hisy farany. Hamaly io vavaka io Andriamanitra. Amin’ny fanaovana izany, dia hamarana, tsy ny SIDA ihany, fa ny aretina hafa rehetra koa izay mamely ny olombelona, izy. Amin’izay fotoana izay, dia “tsy hisy amin’ny mponina ao hilaza hoe: Marary aho”. — Isaia 33:24.
Mandra-pahatongan’izany, ny tetik’ady tsara indrindra dia ny fisorohana. Ho an’ny aretina maro, dia misy safidy: Afaka misoroka azy ianao, na angamba mitsabo azy. Amin’ny VIH anefa, dia tsy misy izany safidy izany. Azo sorohina izy io, nefa tsy azo tsaboina, amin’izao fotoana izao aloha. Nahoana no hisetra loza ho an’ny ainao? Aleo tokoa misoroka, toy izay tsy ho afaka hitsabo mihitsy.
[Teny notsongaina, pejy 9]
“Tsy hoe fampidirana zavatra simika ao amin’ny vatana ihany akory no voafaoka amin’ny fitsaboana. Voafaoka koa ny toe-tsaina, ny fanohanan’ny fiaraha-monina, ny fahasalamana ara-panahy, ary ny sakafo mahavelona.” — Ruth Mota
[Efajoro/Sary, pejy 9]
“Nahatalanjona ny Nataon’ny Kôngregasiôna”
Nampirisika ny Kristianina namany toy izao ny apostoly Paoly: “Aoka isika hanao soa amin’ny olona rehetra, indrindra fa amin’ny mpianakavin’ny finoana.” (Galatiana 6:10). Ny renin’i Karen, voalaza tao amin’ny lahatsoratra voalohany, dia mitantara ny fihetsiky ny kôngregasiônan’ny Vavolombelon’i Jehovah teo an-toerana, rehefa ren’izy ireo fa tratran’ny VIH i Karen sy i Bill. Hoy ny fitantarany: “Nahatalanjona ny nataon’ny kôngregasiôna. Rehefa voan’ny pnemonia i Bill, dia niezaka mafy i Karen, na dia narary koa aza, mba hikarakara azy sy ny ankizy. Ireo anadahy dia nanadio ny tranon’izy mianakavy, sy nanamboatra ny simba tamin’ny fiarakodiany, ary nanasa ny lambany. Nanampy azy hikarakara raharaha ara-panjakana sy hifindra trano koa izy ireo. Ireo anadahy dia nividy sy nahandro sakafo ho azy ireo. Tena be dia be ny fanohanana ara-pihetseham-po sy ara-panahy ary ara-nofo.”
[Sary, pejy 8]
Mety hisoroka ny fahazoana VIH ny tsy fivadihana amin’ny vadin’ny tena