Avy Amin’ny Mpamaky
Faran’ny Fahantrana Misaotra indrindra noho ilay fitohitohizan-dahatsoratra hoe “Akaiky ny Faran’ny Fahantrana”, tao amin’ny Mifohaza! tamin’ny 8 Jona 1998. Tena nahafahako nahita ny fipetraky ny toe-javatra izy io, ary nahatonga ahy hahatakatra fa, hay, be taraina aho. Tsy an’asa aho, nefa manam-bola kely ambiny. Nihevitra ny tenako ho nahantra aho. Tsy izany velively anefa! Asehon’io lahatsoratra io fa misy hafa ao anatin’ny tarehin-javatra ratsy kokoa noho ny ahy. Tokony ho velom-pankasitrahana aho, noho izay efa ananako: sakafo, fitafiana, fahasalamana ary, ny zava-dehibe indrindra, dia i Jehovah. Miandrandra mafy aoka izany ny faran’ny fahantrana aho. Ny fahatapahan-kevitro dia ny tsy hitsahatra hikatsaka ny Fanjakan’i Jehovah, sy ny tsy hitaraina intsony.
C. W., Nouvelle-Zélande
Ny Safidiko Nanoloana Ray Anankiroa Avy tamin’ny namana mpiara-mianatra no nahafantarako ny fahamarinana ao amin’ny Tenin’Andriamanitra, fony aho 14 taona. Nanohitra ny hianarako izany ny ray aman-dreniko, indrindra fa ny raiko. Soa ihany fa tsy notanterahiny mihitsy ny fandrahonany handroaka ahy hiala tao an-trano. Naneho fikirizana aho, ary vita batisa, dimy taona lasa izay. Toa an’ilay rahalahy ao amin’ilay lahatsoratra (8 Jona 1998), dia manantena aho fa indray andro any, dia mba hanantena ny hiaina ao amin’ny tontolo vaovao sy marin’i Jehovah, toa ahy koa, ny ray aman-dreniko.
W. S. L., Brezila
Nanganohano ny ranomasoko, rehefa namaky ilay lahatsoratra aho. Feno fahatapahan-kevitra hanohitra ny zavatra inoako ny raiko. Na dia afaka mifampiresaka ihany aza izahay mianaka indraindray, dia mipoaka ny fahatezerany isaky misy firesahana momba ny Baiboly, na momba ny Vavolombelon’i Jehovah, hany ka matahotra aho. Matetika izy no nikasi-tanana ahy. Ilay lahatsoratra anefa dia nampirisika ahy mafy mba hiorina tsara, na dia eo anoloan’ny fihenjanana toy izany aza.
I. H., Alemaina
Nampihetsi-po ahy lalina ilay lahatsoratra. Koa satria aho nihalehibe tao amin’ny fianakaviana misara-bazana ara-pivavahana, dia takatro tsara ny fahoriam-po nahazo an’ilay tovolahy, izay voatery nanao safidy sarotra toy izany.
A. M., Italia