Avy Amin’ny Mpamaky
Evolisiona Ao amin’ilay lahatsoratra hoe “Lojika ve ny Evolisiona?” (8 Jona 2000), dia misy vato misakana ho amin’ny adihevitra amim-pahatsorana momba ny evolisiona. Hoy mantsy ianareo: “Azo eritreretina ve ny hoe ny hala no nampivoatra teknika be kojakojany aoka izany hoenti-manamboatra zavatra, dia teknika mbola tsy takatry ny sain’ny olombelona tsara akory?” Nahoana moa? Tsy voatery hahalala ny zava-drehetra ange ny mpahay siansa e!
C. W., Aostralia
Ny fanaovan’ny hala landy dia misy dingana maro sy sarotra be izay mbola tsy takatry ny mpahay siansa, na dia taorian’ireo am-polony taona maro nanaovana fikarohana aza. Mitana mafy ny heviny anefa izy ireo fa noho ny evolisiona no nampisy izany rehetra izany. Inoanay fa ny ohatra ny amin’ny landin-kala sy ny ohatra maro hafa dia mampiseho ny tena tsy maha lojika ny evolisiona ary milaza fa ny finoana izany teoria izany dia azo lazaina kokoa hoe finoana zavatra tsy ananana porofo fa tsy siansa. — MPAMPANONTA.
Misy hevitra iray noheveriko foana hoe tena manohitra mafy ny maha lojika ny evolisiona. Izao ilay izy: Ahoana no nahatonga ny razambentsika (na inona na inona iheveran’ny sasany azy) hizara ho roa ka hanjary ho lahy sy vavy? Mbola tsy namaky fanazavana momba izany hevitra izany mihitsy aho. Tsy valiny mahafa-po velively ny filazana fa nitranga nandritra ny an-tapitrisany taona maro izany fahatongavana ho lahy sy vavy izany, satria tsy misy vehivavy afaka ny ho bevohoka miandalana.
H. R., Etazonia
Nandroso hevitra marim-pototra io mpamaky io. Izay ihany no hevitra nohazavainay tao amin’ny lahatsoratray tamin’ny 8 May 1997 ( frantsay) hoe: “Misy Fototra Iorenany ve ny Evolisiona?” Izao no voalazanay: “Antenaina ny inoantsika fa noho ny kisendrasendra, ny evolisiona dia nampisy koa lehilahy sy vehivavy indray niaraka mba hisian’ny taranaka vaovao hifandimby. Vao mainka manasarotra ny toe-draharaha ny tsy maintsy inoantsika koa fa tsy vitan’ny hoe niara-nivoatra fotsiny ny lehilahy sy ny vehivavy, fa nivoatra teo amin’ny toerana iray koa! Satria raha tsy nihaona izy ireo, dia tsy afaka niteraka!” — MPAMPANONTA.