Diniho Akaiky Kokoa ny Volonao

“TAMIN’NY vanim-potoana sy ny kolontsaina rehetra”, hoy ny loharanon-kevitra iray, “ny volo dia mampiseho sombin’ny toetran’ny olona iray.” Tsy mahagaga àry raha kojakojain’ny ankamaroan’ny olona tsara ny volony mba ho salama sy hanintona ny maso hatrany.

Nanontany mpanao volo za-draharaha efatra momba ny toetoetran’ny volo sy ny fikarakarana azy, ny Mifohaza! Ho hitanao fa tsy tsotsotra ohatra ny ahitanao azy akory ny volonao.

Fanirin’ny volo sy fihintsanany

F: Inona avy no ao anatin’ ny volo?

V: Misy tsiratsiraka prôteinina ao amin’ny volo. Avy ao anatin’ny paosy kely iray ao amin’ny hodi-doha izay antsoina hoe fihary volo, no maniry ny volo tsirairay. Misy kitapo kely iray misy tahirin-dra be dia be any amin’ny fototry ny fihary volo tsirairay. Io kitapo kely io no mamokatra ny selan’ny volo izay mitombo tsikelikely ao anatin’ilay fihary volo, sy mihamafy ary mitambatambatra ka lasa volo.

F: Lazaina fa maniry haingana kokoa ny volo rehefa tapahina. Marina ve izany?

V: Tsia. Misy mihevitra fa mitovy amin’ny fomba ameloman’ny hazo ny rantsany ny fomba ameloman’ny vatana ny volo. Raha vantany vao mitombo anefa ny volo, ka tafavoaka ny hodi-doha, dia efa maty izy amin’izay. Tsy misy fiantraikany eo amin’ny fanirin’ny volo mihitsy, noho izany, ny fanapahana azy.

F: Nahoana no mihafotsy ny volo?

V: Misy tahirin-doko izay manome ny lokon’ny volo ao amin’ny sosona anatiny amin’ny volo. Mihafotsy ny volo rehefa maty ny sela mahaforona io tahirin-doko io. Vokatry ny fandrosoan’ny taona izany. Mety ho manaranaka na aretina ny volo fotsin’ny tanora. Tsy marim-pototra anefa ilay hoe mihafotsy tampoka eo ny volo. Mihanaka amin’ny volo amin’izy mbola ao ambanin’ny hodi-doha mantsy ilay tahirin-doko. Midika izany fa mila fotoana ny volo fotsy mba haniriana (1,25 santimetatra eo ho eo isam-bolana) sy hipoirana eo amin’ny loha.

F: Inona no mahatonga ny volo hihintsana?

V: Anisan’ny tsingerina voajanaharin’ny volo izany. Tokony ho 50 ka hatramin’ny 80 ny salanisan’ny volon’ny olona iray mihintsana isan’andro. Manaranaka anefa ny fahasolan’ny lehilahy, ary toa vokatry ny tsy fifandanjan’ny hormônina izany, ka mahatonga ny volo hihintsana foana. Aretina ny fahasolana tsy araka ny tokony ho izy.a

F: Misy milaza fa ahitana taratry ny fahasalaman’ny olona iray ny volony. Voamarikareo ve izany?

V: Voamarikay tokoa. Misy ra manome sakafo ny volo ao ambanin’ny hodi-doha. Noho izany, ny volo salama dia ahafantarana fa ampy sakafo tsara ny tahirin-dra. Malemy sy mora tapatapaka anefa ny volon’ny olona tsy misakafo tsara na misotro zavatra misy alkaola tafahoatra, satria tsy afaka mamelona araka ny tokony ho izy ny volony ny tahirin-dra ao aminy. Mety ho famantarana mialoha ny aretina na fananana anaka, ny volo mihintsana na tapatapaka.

Tandrovy ny fahasalaman’ny hodi-dohanao sy ny volonao

F: Ahoana no fomba fanasana ny volo sy ny hodi-doha?

V: Matetika no hita fa manjary maina ny hodi-dohan’ny ankamaroan’ny olona manasa loha matetika loatra. Mandray loto sy potipoti-javatra avy amin’ny hoditra ny menaka amin’ny volonao, ka mety hanentsina ny fantsona mitondra menaka mankany amin’ny fihary volo. Izany no ilana hanasana loha tsy tapaka. Sady miaro ny hoditra tsy ho voan’ny bakteria manimba anefa ireny menaka voajanahary ireny, no mihazona ny hamandoana ilainy. Hiala iny rakotra miaro azy iny raha manasa loha matetika loatra ianao, ary dia hanjary maina ny hodi-doha. Manoro hevitra ny ankamaroan’ireo mpanao volo za-draharaha fa tokony hosasana ny loha rehefa maloto ny hodi-doha na ny volo. Tokony hanasa loha matetika kokoa noho ireo manana volo ara-dalàna na maina, ny olona manana volo be menaka.

Otrory ny hodi-dohanao rehefa manasa loha. Manala ireo sela maty amin’ny hodi-doha izany ary manatsara ny fikorianan’ny ra, izay mamelona ny volonao. Ary aza hadinoina ny manakobana azy tsara e! Raha tsy kobaninao tsara, ohatra, ny tananao rehefa avy sasanao amin’ny savony, dia manjary maina be sy vakivaky ny hoditrao. Toy izany koa, hanjary ho maina sy hiempakempaka ny hodi-doha raha tsy afa-dranon-tsavony tsara ny loha rehefa sasana.

F: Ahoana no itsaboana ny hodi-doha maina?

V: Misotroa rano betsaka, ary mihinàna sakafo mahavelona. Mampitombo ny rano amin’ny hoditrao izany ary mamelona ny tahirin-dra. Mampiasà ranon-tsavony malefaka fanasana loha, ary otrory foana ny hodi-dohanao. Misy koa mampiasa zavatra fanosotra rehefa avy manasa loha sy ranon-javatra hihazonana ny hamandoan’ny hodi-doha.

Ny taovolonao

F: Inona no tokony hotadidina rehefa mankany amin’ny mpanao volo?

V: Mitondrà sarin’ny taovolo tianao na ny tsy tianao koa angamba, raha tianao hovana ny taovolonao. Tsory amin’ilay mpanao volo izay zavatra irinao hatao sy ny fotoana tianao holanina mba hikarakarana ny volonao isan’andro. Mitaky fikarakarana bebe kokoa mantsy ny taovolo sasany. Tadidio fa mazàna no mila mankany amin’ilay mpanao volo indroa na intelo ianao mba hahafantarany tsara ny volonao, sy hahaizany hiresaka tsara aminao. Koa aza mora miova mpanao volo àry!

Mampiharihary inona ny volonao?

Mampiseho ny maha izy ny olona iray ny taovolony sy ny fomba fikarakarany ny volony. Notapahina na nohalavaina ny volo, notsorina na natao olioly, nolokoana na nobangoina tamin’ny fomba isan-karazany, araka ny lamaody sy ny zavatra inoana ara-pivavahana, ary araka ny hevitra ara-tsosialy sy ara-politika mihitsy aza. Koa diniho akaiky kokoa àry ny volonao. Inona no ahariharin’izy io momba anao? Mahatsara tarehy ny tompony sady mahafinaritra ny mpitazana ny volo salama sy ny taovolo manendrika.

[Fanamarihana ambany pejy]

[Sary, pejy 26]

Mety hitsaboana hodi-doha maina ny fihinanana sakafo mahavelona sy ny fisotroana rano betsaka

[Sary, pejy 26]

Mety hanala ny menaka miaro ny hodi-dohanao ny fanasanao loha matetika loatra

[Sary, pejy 26]

Zavatra ara-dalàna vokatry ny fandrosoan’ny taona ny volo fotsy