Mandalo Fahasahiranana ny Fonja

“Toy ny manao fasana maro kokoa mba hiadiana amin’ny aretina mahafaty iray ny manao fonja maro kokoa mba hiadiana amin’ny heloka bevava.”—ROBERT GANGI, MANAM-PAHAIZANA MOMBA NY FIGADRANA.

MANARONTSARONA ny lafy ratsin’ny tena zava-misy ny tontolo anjakan’ny politika mpanao teny mahafinaritra. Noho izany, dia nitady teny malefaka kokoa noho ilay teny mahakivy hoe “figadrana” isika. Tiantsika kokoa ny hoe “fonja” na “trano fitaizana” anomezana “fampiofanana amin’ny asa iray”, na “asa sosialy”. Tiantsika kokoa aza ny teny hoe “voafonja” noho ilay teny manaisotra fahamendrehana hoe “gadra”. Jereo anefa ny ao ambadik’ireo teny an-kosotra ireo, dia ho hitanao fa mandalo fahasahiranana lehibe ny fonja amin’izao fotoana izao. Anisan’izany ny vola tsy toko tsy forohana lany amin’ny fihazonana ireo mpigadra sy ny vokatry ny fampidirana am-ponja izay hita fa mihamifanohitra hatrany amin’ny zava-kendren’izany.

Misy tsy tena mino loatra ny fahombiazan’ny fonja. Voamarik’izy ireo fa na dia nitombo ho maherin’ny valo tapitrisa aza ny gadra maneran-tany, dia tsy mihena firy ny heloka bevava any amin’ny tany maro. Ankoatra izany, na dia maro be aza no migadra noho ny heloka mifandray amin’ny zava-mahadomelina, dia mbola zava-manahirana lehibe ihany ny fisian’izy io etsy sy eroa.

Na izany aza, dia tian’ny maro kokoa ny fanasaziana amin’ny alalan’ny fanagadrana. Heverin’izy ireo fa nampiharina ny rariny rehefa migadra ny olo-meloka. Nolazain’ny mpanao gazety iray ho toy ny fitiavana hampiditra am-ponja olona ny zotom-po managadra mpanao heloka bevava.

Misy antony lehibe efatra hampidirana am-ponja ny mpandika lalàna: 1) hanasaziana ireo olo-meloka, 2) hiarovana ny fiaraha-monina, 3) hisorohana ny mety hisian’ny heloka bevava hafa, ary 4) hanovana ireo mpanao heloka bevava, ka hampianarana azy ireny hanara-dalàna sy hiasa rehefa mivoaka ny fonja. Andeha hojerentsika raha tratran’ny fonja ireo zava-kendrena ireo.