Tena Afaka Hiova ve ny Voafonja?

“Tsy misy afaka manery olon-kafa hiova. Tsy maintsy ho avy ao anatin’ny olona iray sady ataony an-tsitrapo ny fiovana.”—VIVIEN STERN, FANETRIBEN’NY HOAVY NY FAMPIDIRANA AM-PONJA MANERAN-TANY (ANGLISY).

ANISAN’NY fanalahidin’ny tena fiovan’ny voafonja ny fanabeazana sy ny fiovan’ny zavatra heverina ho sarobidy ary ny fomba fijery zavatra. Azo antoka fa misy olona tso-po miezaka hanabe sy hanampy ny voafonja. Ankasitrahan’ny voafonja maro tokoa ny asa tsara dia tsara sy tsy misy fitiavan-tena ataon’ireny olona ireny.

Mety hisy hilaza fa tsy avotra intsony ny fandaharana manontolo momba ny figadrana, ary tsy dia azo inoana loatra ny hiovan’ny voafonja ao anatin’ny tarehin-javatra toy izany. Na dia mety ho marina aza fa tsy hampiditra zavatra vaovao heverina ho sarobidy ny fampidirana am-ponja fotsiny, dia tena nanampy ny sasany hanova ny fiainany kosa ny fampianarana Baiboly. Milaza izany fa azon’ny tsirairay atao ny miova.

Ankehitriny, dia misy voafonja manova ny toe-tsainy sy ny fitondran-tenany, noho ny fanampian’ny Baiboly. Amin’ny fomba ahoana? Amin’ny fanarahany izao torohevitry ny Baiboly izao: “Aza manaraka ny fanaon’izao tontolo izao; fa miovà amin’ny fanavaozana ny saina, hamantaranareo ny sitrapon’Andriamanitra, dia izay tsara sady ankasitrahana no marina.” (Romana 12:2) Ahoana no ahatanterahan’izany?

Ny anjara asan’ny Baiboly

Maro no mihevitra fa afaka manana anjara lehibe amin’ny fanampiana ny voafonja hibebaka tamin’ny zava-dratsy nataony ny fivavahana. Mazava ho azy fa ny olana lehibe amin’izany dia ny hoe mety tsy ho hita intsony ny fiovana natao tao am-ponja, raha vantany vao tafavoaka ilay voafonja. Izao no fomba nilazan’ny voafonja iray izany: “Olona maro no mahita an’i Kristy eto amin’ity toerana ity, kanefa rehefa miala eto izy, dia avelany eto i Kristy!”

Hita fa tsy maintsy ho avy ao anaty ny tena fiovana, dia avy ao an-tsaina sy ao am-pon’ilay mpanao heloka bevava. Ny fibebahana amim-pahatsorana noho ny ratsy natao no tsy maintsy ho fototr’izany. Afaka manampy ny olona hianatra momba ny maha ratsy ny faharatsiana sy ny fiheveran’Andriamanitra izany ny fandaharam-pampianarana Baiboly. Mety hahatonga azy tsy haniry hanao ratsy intsony izany.

Mitarika fandaharam-pampianarana Baiboly toy izany ny Vavolombelon’i Jehovah, any amin’ny fonja maro maneran-tany, ary mahita vokatra mahafinaritra. (Jereo ny pejy 10.) “Nampiana izahay mba hahafantatra izay lazain’ny Baiboly momba ny zava-kendren’ny fiainana sy ny fitahiana tahirizin’ny hoavy ho an’ny taranak’olombelona”, hoy ny voafonja iray. Hoy ihany izy: “Tena hafakely ilay fampianarana!” Nilaza toy izao ny voafonja hafa iray: “Mandray fanapahan-kevitra miorina amin’ny torohevitr’Andriamanitra izahay. ... Hitanay ny fiovanay. Fantatray ny laharam-pahamehana eo amin’ny fiainana.”

Mazava ho azy fa tsy tapitra ao am-ponja ny fanaovana fiovana. Miorina amin’ny fanafoanana ny antony ilana fonja ny tena vahaolana amin’ny fahasahiranana diaviny. Voarakitra ao amin’ny fampanantenan’Andriamanitra toy izao ny iray amin’ireo fahamarinana ara-baiboly nanohina ny fon’ny voafonja maro: “Ny mpanao ratsy hofongorana ... Ny marina handova ny tany ka honina eo aminy mandrakizay.”—Salamo 37:9, 29.

Rehefa hitranga izany, ny fari-pitsipika ambonin’Andriamanitra dia hampiharin’ny fitondram-panjakana marina iray izay sady be fitiavana no hentitra, dia ny Fanjakan’Andriamanitra any an-danitra hoentin’i Kristy. Izy io ilay fanjakana nasaina angatahin’ny Kristianina amin’ny vavaka. (Matio 6:10) Hiova ny mponina rehetra ao amin’io tontolo vaovao io, noho ny fianarana ny lalàna ambonin’Andriamanitra. Amin’izay dia ho marina kokoa noho ny hatramin’izay ny hoe “ny tany ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina”. (Isaia 11:9) Inona no ho vokatr’izany? “Hiravoravo amin’ny haben’ny fiadanana” ireo mponina mpanara-dalàna ao amin’ilay tontolo vaovao.—Salamo 37:11.

[Efajoro/Sary, pejy 10]

Fampanantenana Masoandro Mihiratra

Efa 20 taona mahery izao no nanatontosa fandaharam-pianarana Baiboly mahomby tao amin’ny fonjan’ny fanjakan’i Atlanta, any Géorgie, Etazonia, ny mpitory an-tsitrapo Vavolombelon’i Jehovah. Noho izany, dia voafonja 40 mahery no nampiana ho tonga mpitory Vavolombelon’i Jehovah vita batisa, ary 90 mahery hafa kosa no nandray soa tamin’ny fianarana Baiboly tsy tapaka.

Vao haingana izay, ny Mifohaza! dia niresaka tamin’ny mpampianatra Baiboly vitsivitsy, izay efa niasa tamin’ny fony manontolo tao amin’io fonja io.

◼ Nahoana ny fampianarana Baiboly no tena mandaitra mba hanampiana voafonja sasany hanova ny fiainany?

David: Voafonja maro no tsy mba nanehoana fitiavana, na dia tamin’ny fahazazany aza. Noho izany, dia manjary tena misy amin’izy ireo Andriamanitra, rehefa fantany hoe tia azy. Toy izany koa rehefa mandoatra ny ao am-pony aminy amin’ny vavaka izy ireo, ka mahazo valim-bavaka. Voatosika ho tia an’Andriamanitra ny fon’izy ireo, ho setrin’izany.

Ray: Nosavihina ny iray tamin’ireo voafonja niara-nianatra Baiboly tamiko, fony izy mbola kely. Rehefa nanontaniako azy ny zavatra mahasarika azy amin’i Jehovah, dia namaly izy fa rehefa mianatra ny fahamarinana ara-baiboly ny olona iray, dia fantany fa tena mahatakatra tsara ny fomba fiheviny i Jehovah. Nanosika azy haniry hianatra bebe kokoa momba ny toetran’io Andriamanitra be fitiavana io izany.

◼ Misy milaza fa misy antony hafa mahatonga ny voafonja ho liana amin’ny fivavahana—mba hampihenana ny saziny na mba handaniam-potoana fotsiny. Inona no hitanareo tamin’io lafiny io?

Fred: Tsy manaitra ny fihetseham-pon’ny voafonja tonga eo amin’ny fampianarana ataonay izahay, fa miara-mianatra ny Baiboly aminy fotsiny. Tsy ela dia fantany fa hampianarina momba ny Baiboly izy, ary izay ihany no ataonay. Efa nanatona ahy izy ireo ary nangataka fanampiana tamiko hikarakara ny raharahany ara-pitsarana. Tsy hiresaka amin’izy ireo momba izany aho. Noho izany, dia izay tena maniry hianatra izay lazain’ny Baiboly ihany no tonga amin’ny fiaraha-mianatra ny Baiboly ataonay, ka maharitra eo.

Nick: Ny zavatra iray nomarihiko dia ny fiovana ataon’ireo voafonja sasany, raha mbola tao am-ponja izy ireo. Lasa mpitory vita batisa ny sasany amin’izy ireo ary nampijalin’ireo voafonja hafa. Tena mafy ho azy ireo izany. Raha tsy nanohina ny fon’izy ireo ny Baiboly, dia ho nivadika izy ireo tao anatin’izany tarehin-javatra izany.

Israel: Amin’ny ankapobeny, dia tena maniry hianatra momba an’i Jehovah izy ireo, ary asehony amin’ny fomba mampihetsi-po izany. Hitanao hoe avy any am-pony ilay izy.

Joe: Ireo tonga Kristianina marina dia nanjary nahafantatra ny zavatra tsy nety tamin’ny fiainany. Tsapany koa hoe afaka manantena fiovana izy—hisy masoandro mihiratra ho azy. Ankehitriny dia afaka miandry amim-pahatsoram-po ny fahatanterahan’ny fampanantenan’i Jehovah momba ny hoavy izy ireo.

◼ Nahoana no tsy afaka manova mpanao heloka bevava raha ny fampidirana am-ponja fotsiny?

Joe: Tsy ny hanarenana ny fomba fiainan’ilay mpanao heloka bevava no kendren’ilay fomba fanasaziana, fa ny hanesorana azy tsy ho eo amin’ny fiaraha-monina fotsiny. Izay no fototr’ilay olana—ny fomba fijerin’ny fonja an’ireo olona ireo.

Henry: Tsy afaka manova ny fon’ny mpanao heloka bevava ny fonja. Mbola hamerina ny heloka vitany ny ankabeazan’ireo olona ireo rehefa mivoaka ny fonja.

[Sary, pejy 8, 9]

Maro ny voafonja nampiana hianatra ny fahamarinana ao amin’ny Baiboly