Manontany ny Tanora Hoe . . .

Afaka Manampy Ahy ve ny Vavaka?

“Ny vavaka no nanampy ahy hiverina amin’ny lala-mahitsy.”—Eric.a

TANORA maro no mivavaka—ary imbetsaka kokoa noho ny iheveran’ny hafa azy aza angamba. Hita tamin’ny fanadihadiana iray natao tamin’ny tanora amerikanina 13 ka hatramin’ny 17 taona fa ny 56 isan-jaton’izy ireo dia mivavaka alohan’ny sakafo. Nasehon’ny fanadihadiana iray natao tamin’ny tanora zokiny kokoa fa ny 62 isan-jaton’izy ireo dia mivavaka isan’andro.

Na izany aza, ho an’ny tanora maro, dia fombafomba tsy misy dikany na fahazarana fotsiny ny vavaka. Vitsy ny tanora manana ilay antsoin’ny Baiboly hoe “fahalalana tsara an’Andriamanitra.” (Kolosiana 1:9, 10) Noho izany, dia tsy mitana toerana lehibe eo amin’ny fiainan’izy ireo Andriamanitra. Nanontaniana ny zatovo sasany raha mba efa nitodika tany amin’Andriamanitra izy ireo rehefa handray fanapahan-kevitra lehibe. Namaly toy izao ny ankizivavy iray: “Mitodika any amin’Andriamanitra amin’ny alalan’ny vavaka foana aho, mba hitarika ahy hifidy ny lalana tsara eo amin’ny fiainana.” Kanefa niaiky koa izy hoe: “Tsy mahatadidy fanapahan-kevitra iray voafaritra tsara aho, raha izao.” Tsy mahagaga àry raha tanora maro no tsy matoky hoe manan-kery ny vavaka, na hoe hisy vokany eo aminy!

Na izany aza, dia tanora an’arivony maro, sahala amin’i Eric, voalaza tetsy am-piandohana, no nahita, tamin’ny zavatra niainany manokana, fa manan-kery ny vavaka. Afaka mahita izany koa ianao! Nisy lahatsoratra iray teo aloha nampiseho hoe nahoana isika no afaka matoky fa mihaino ny vavaka ataontsika Andriamanitra.b Ny fanontaniana izao dia hoe: Afaka manampy anao ve ny vavaka? Andeha aloha hodinihintsika ny fomba amalian’Andriamanitra ny vavaka ataontsika.

Fomba amalian’Andriamanitra ny vavaka

Nisy lehilahy nanam-pinoana sasany, tamin’ny andron’ny Baiboly, nahazo valim-bavaka nivantana, na tamin’ny alalan’ny fahagagana mihitsy aza. Nony fantatr’i Hezekia Mpanjaka, ohatra, fa voan’ny aretina nahafaty ny tenany, dia nitalaho famonjena tamin’Andriamanitra izy. Namaly Andriamanitra hoe: “Efa nohenoiko ny fitarainanao, ary efa hitako ny ranomasonao; indro, hahasitrana anao Aho.” (2 Mpanjaka 20:1-6) Nanao zavatra nivantana toy izany koa Andriamanitra ho an’ny lehilahy sy vehivavy hafa natahotra azy.—1 Samoela 1:1-20; Daniela 10:2-12; Asan’ny Apostoly 4:24-31; 10:1-7.

Na dia tamin’ny andron’ny Baiboly aza anefa, dia tsy hoe nanao zavatra nivantana foana akory Andriamanitra. Tamin’ny ankapobeny, Andriamanitra dia namaly ny vavaky ny mpanompony, tsy tamin’ny fanaovana fahagagana akory, fa tamin’ny fanampiana azy ireo ‘ho feno fahalalana tsara ny sitrapony amin’ny fahendrena sy ny fahazavan-tsaina rehetra avy amin’ny Fanahy.’ (Kolosiana 1:9, 10) Eny, nanampy ny vahoakany Andriamanitra, tamin’ny fanomezana azy tanjaka ara-panahy sy ara-tsaina, ka nanome azy ilay fahendrena sy ilay fahalalana nilainy mba handraisana fanapahan-kevitra tsara. Tsy hoe nanala ilay fisedrana foana akory Andriamanitra, rehefa tao anatin’ny toe-javatra sarotra ny Kristianina. Nanome azy ireo ‘hery lehibe’ kosa izy, mba hahafahan’izy ireo hiaritra!—2 Korintiana 4:7; 2 Timoty 4:17.

Toy izany koa ankehitriny, mety tsy ho zavatra manaitra be ny valim-bavaka azonao. Toy ny nataony tamin’ny lasa anefa, Andriamanitra dia afaka manome anao ny fanahiny masina sy manatanjaka anao mba hahay hiatrika izay zava-tsarotra mety ho hitanao. (Galatiana 5:22, 23) Andeha isika hijery ohatra efatra, mba hampisehoana fa afaka manampy anao ny vavaka.

Fandraisana fanapahan-kevitra

Niaraka tamin’ny tovolahy iray niseho ho nanana tanjona ara-panahy ambony i Karen. Hoy izy: “Nilaza tamiko foana izy hoe te ho tonga anti-panahy, hono, izy.” Toa tena tsara tokoa izany. Kanefa, “niresaka foana momba ilay raharaham-barotra vao natombony koa izy, sy ireo zavatra maro be ho azony vidina ho ahy. Nanjary nampisalasala ahy ny teniny.” Nivavaka momba izany i Karen. “Nitalaho tamin’i Jehovah aho mba hanampy ahy hahita ny marina sy hanoro ahy izay tokony ho fantatro momba ilay ankizilahy.”

Indraindray, ilay mivavaka fotsiny dia efa manampy. Hahatonga anao hieritreritra tsara izany, sy hijery zavatra araka ny fomba fijerin’i Jehovah. Kanefa nila nanao zavatra koa i Karen. Fahagagana ve no namaliana azy? Diniho ny fitantarana iray ao amin’ny Baiboly momba an’i Davida Mpanjaka. Rehefa fantatr’i Davida fa niray tetika tamin’i Absaloma zanany namadika azy i Ahitofela namany akaiky, dia nivavaka toy izao izy: “Jehovah ô, ampodio ho fahadalana ny hevitra ataon’i Ahitofela.” (2 Samoela 15:31) Nanao zavatra nifanaraka tamin’ilay vavaka koa anefa i Davida. Naniraka an’i Hosay sakaizany izy, nanao hoe: “Hofoananao hahasoa ahy ny hevitra ataon’i Ahitofela.” (2 Samoela 15:34) I Karen koa dia nanao zavatra nifanaraka tamin’ny vavaka nataony. Niresaka tamin’ny anti-panahy matotra iray, izay nahalala tsara ilay ankizilahy, izy. Ary nitombina tokoa ny ahiahiny: Tena zara raha nanao fandrosoana ara-panahy tokoa ilay ankizilahy.

Hoy i Karen: “Iny zava-nitranga iny dia nahitako fa manan-kery ny vavaka.” Nampalahelo fa naleon’ilay ankizilahy nikatsaka harena, toy izay hanohy hanompo an’i Jehovah. “Raha nanambady azy aho”, hoy i Karen, “dia angamba ho nandeha irery tany am-pivoriana ankehitriny.” Nanampy an’i Karen handray fanapahan-kevitra tsara ny vavaka.

Fahaizana manindry fo

“Ny fahatezeran’ny adala dia avoakany avokoa”, hoy ny Baiboly ao amin’ny Ohabolana 29:11, “fa ny hendry kosa manindry fo.” Olona maro ankehitriny no ao anatin’ny fahorian-tsaina mafy, ka matetika no tsy mahafehy tena intsony. Zavatra mahatsiravina no vokatr’izany indraindray. Izao no tsaroan’ny tanora iray antsoina hoe Jimmy: “Nisy olana teo amiko sy ny mpiara-miasa tamiko iray. Indray andro, dia namoaka antsy mihitsy izy.” Inona no ho nataonao? Nivavaka i Jimmy. Hoy izy: “Nanampy ahy mba ho tony i Jehovah, ka afaka niresaka tamin’ilay mpiara-miasa tamiko aho mba hamela ilay antsy. Nalatsany ilay izy, ary lasa izy nandeha.” Nahatsindry ny fony i Jimmy, ka tsy resin’ny fahatezerana, ary dia namonjy ny ainy izany.

Angamba aloha tsy hisy hanambana antsy anao matetika. Kanefa, tsy maintsy hisy toe-javatra maro hilanao hanindriana ny fonao. Afaka manampy anao ho tony ny vavaka.

Fandresena Tebiteby

Tsaroan’i Barbara fa “nandia fotoana tena sarotra” izy, taona maro lasa izay. Hoy izy: “Toa tsy nisy nandeha tamin’ny laoniny, na ny asa, na ny fianakaviana, na ny namana. Tsy hitako izay hatao tamin’izay.” Avy hatrany dia nivavaka i Barbara. Nisy olana iray anefa. “Tsy hitako izay hangatahina tamin’i Jehovah”, hoy izy. “Tamin’ny farany, dia nangataka fiadanan-tsaina aho. Nivavaka isan’alina aho mba hanampiany ahy tsy hitebiteby noho izao zavatra rehetra izao.”

Nanampy azy ve izany vavaka izany? Hoy izy: “Rehefa afaka andro vitsivitsy, dia tsapako fa tsy nitebiteby intsony aho, na dia tsy afaka aza ireo zava-nanahirana ahy.” Mampanantena toy izao ny Baiboly: ‘Ambarao amin’Andriamanitra ny fangatahanareo amin’ny zavatra rehetra. Ary ny fiadanan’Andriamanitra, izay mihoatra noho ny fahalalana rehetra, hiaro ny fonareo sy ny hevitrareo ao amin’i Kristy Jesosy.’—Filipiana 4:6, 7.

Fanatonana akaiky an’Andriamanitra

Diniho ny zavatra niainan’ny tanora iray atao hoe Paul. “Vao nifindra trano aho mba hiara-mipetraka amin’ny havanay”, hoy izy. “Indray alina, dia tena kivy tanteraka aho. Vao nahavita ny fianarako tany amin’ny lise aho, ary nalahelo ny namako rehetra. Latsaka ny ranomasoko tamin’io alina io, rehefa tsaroako ireo fotoana nahafinaritra niarahanay.” Inona no azon’i Paul natao? Sambany izy vao mba nivavaka mafy. Hoy izy: “Namboraka ny tao am-poko aho, ary nangataka hery sy fiadanan-tsaina tamin’i Jehovah.”

Inona no vokany? Izao no tsaroan’i Paul: “Rehefa nifoha aho ny ampitson’iny, dia mbola tsy maivamaivana ohatra izany mihitsy teo amin’ny fiainako. Afaka tamin’ny fahorian-tsaina mafy aho, ary nahazo ‘ny fiadanan’Andriamanitra, izay mihoatra ny fahalalana rehetra.’ ” Nony efa tony i Paul, dia tsy nofehezin’ny fihetseham-pony loatra intsony izy. Ary tsy ela dia takany fa tsy tena nahafinaritra akory ireo andro noheveriny ho ‘fotoana mamy fahiny.’ (Mpitoriteny 7:10) Raha ny marina, ireo “namana” izay nalahelovany aoka izany, dia tsy dia tena namana tsara ho azy.

Ny zava-dehibe indrindra anefa, dia ny nahatsapan’i Paul fa niahy azy manokana i Jehovah. Tsapany ny fahamarinan’ny Jakoba 4:8, manao hoe: “Manatòna an’Andriamanitra, dia hanatona anareo Izy.” Nitondra fiovana lehibe teo amin’ny fiainan’i Paul iny zava-nitranga iny. Voatosika hametraka an’i Jehovah alohan’ny zavatra hafa rehetra sy hanolo-tena ho azy izy.

Miresaha amin’Andriamanitra!

Ireo tantara mampahery ireo dia manome antoka fa tena afaka manampy anao ny vavaka. Mazava ho azy aloha fa tsy hahazo izany fanampiana izany ianao, raha tsy vonona hahafantatra an’Andriamanitra, sy hamboly fisakaizana aminy. Mampalahelo fa tanora maro no mangataka andro amin’ny fanaovana izany. Notezaina tao anatin’ny fianakaviana kristianina i Carissa. Niaiky toy izao anefa izy: “Tato anatin’ireo taona faramparany angamba vao tena azoko tsara ny hevitr’ilay fifandraisantsika tsy manan-tsahala amin’i Jehovah.” Notezaina ho Kristianina koa i Eric, voalaza tetsy am-piandohana, saingy nisy taona maromaro nialany tamin’ny fivavahana marina. “Rehefa nahatsapa ilay zavatra nafoiko aho vao nitodika tany amin’i Jehovah”, hoy izy. “Hitako izao fa tsisy fitiavana sady poakaty ny fiainana raha tsy eo ny fifandraisana aminy.”

Kanefa, aza miandry ho tratran’ny fahorian-tsaina, vao hanatona an’Andriamanitra. Manomboha miresaka aminy dieny izao—tsy tapaka! (Lioka 11:9-13) ‘Loary eo anatrehany ny fonao.’ (Salamo 62:8) Tsy ho ela dia ho hitanao fa tena afaka manampy anao tokoa ny vavaka!

[Fanamarihana ambany pejy]

[Efajoro/Sary, pejy 15]

Afaka Manampy Anao ny Vavaka mba

● Handray fanapahan-kevitra tsara kokoa

● Ho tony ao anatin’ny fotoan-tsarotra

● Hahita fanamaivanana rehefa mitebiteby

● Hanatona akaiky an’Andriamanitra