Tsy Hisy Intsony ny Tahotra Vokatry ny Zavatra Nanjo!
MIARAMILA nandeha tany an’ady angamba ianao, ka manonofy ratsy sy mahatsiaro zavatra, hany ka toy ny hoe mbola any an’ady ihany no fahatsapanao ny tenanao. Mety ho nanaovana herisetra tsy nisy indrafo toy ny fametavetana angamba ianao, ka mahatsapa fa toa maty tao anatin’ny tahotra vokatr’ilay zava-nitranga ny tapany taminao. Maty tamin’ny hetraketraky ny natiora na loza hafa angamba ny havan-tianao, ka tena malahelo mafy azy ianao.
Mety hiala ve izany fihetseham-po izany? Tena azontsika atao ny mamaly hoe eny! Mandra-pahatongan’izay, dia afaka mahita fampiononana avy ao amin’ny Baiboly ianao.
Fanampiana mba hiatrehana ny tahotra
Nandia zavatra nampahatahotra sy nahatandindomin-doza ny ainy ny apostoly Paoly, efa ho 2 000 taona lasa izay. Misy fomba filazalazany azy, voatahiry ao amin’ny Baiboly. “Tsy tianay tsy ho fantatrareo”, hoy i Paoly, “ny amin’ny fahoriana izay nanjo anay tany Asia, fa novesarana indrindra mihoatra noho ny zakanay izahay, ka dia efa nafoinay na dia ny ainay aza; eny, tsy nanampo izay ho velona intsony izahay.”—2 Korintiana 1:8, 9.
Tena azo inoana fa nampahatahotra ny zava-nitranga taminy, na dia tsy tena fantatra mazava aza. (2 Korintiana 11:23-27) Ahoana no niatrehan’i Paoly izany?
Izao no nolazainy momba ny fijaliany tany Azia: “Isaorana anie Andriamanitra, Rain’i Jesosy Kristy Tompontsika, Rain’ny famindrampo sady Andriamanitry ny fampiononana rehetra, Izay mampionona anay amin’ny fahorianay rehetra mba hahaizanay mampionona izay rehetra mitondra fahoriana kosa, amin’ny fampiononana izay ampiononan’Andriamanitra anay.”—2 Korintiana 1:3, 4.
Misy tokoa ny fanampiana avy amin’ilay “Rain’ny famindrampo sady Andriamanitry ny fampiononana rehetra.” Ahoana no ahazoanao fampiononana toy izany?
Fomba ahazoana fanampiana
Voalohany: Mangataha fanampiana. Tadidio fa tsy ianao irery no rera-po. Matetika no faly hanampy olon-kafa ny olona nandresy an’izany zava-manahirana izany. Toy ny apostoly Paoly izy ireo, ka mahatsapa fa tokony hozaraina amin’ireo mandalo karazana ‘fahoriana rehetra’ ny fampiononana avy amin’Andriamanitra. Aza misalasala manatona Vavolombelon’i Jehovah, na iza na iza hitanao ho mora hatonina, ary mangataha fanampiana mba hahazoana fampiononana avy amin’i Jehovah, “Andriamanitry ny fampiononana rehetra.”
Mahareta amin’ny fivavahana. Mangataha olona mahafeno fepetra mba hiara-mivavaka aminao, raha sarotra aminao ny mivavaka satria mbola tezitra ianao. (Jakoba 5:14-16) Aza hadinoina ny ‘mametraka amin’i Jehovah ny fanahianao rehetra, fa Izy no miahy anao.’ (1 Petera 5:7) Imbetsaka ny Soratra Masina no manamafy fa miahy ny mpanompony tsirairay Andriamanitra.
Mety ho nandalo zavatra tena nampahatahotra ny mpanoratra ny Salamo 94 matoa nilaza toy izao: “Raha tsy Jehovah no Mpamonjy ahy, dia efa saiky nalaky nitoetra tao amin’ny mangingina ny fanahiko. Fony aho nanao hoe: Mangozohozo ny tongotro, dia ny famindramponao, Jehovah ô, no nanohana ahy. Raha be ny ahiahy ato anatiko, dia mampifaly ny fanahiko ny fampiononanao.”—Salamo 94:17-19.
Misy tena ampijalin’ny “ahiahy” ireo mararin’ny tahotra vokatry ny zavatra nanjo azy. Mety ho lasa tahotra mampivadi-po na hatezerana mafy izany indraindray. ‘Hanohana’ anao anefa ny vavaka, mandra-pidifin’izany tahotra na hatezerana izany. Hevero ho toy ny ray be fitiavana i Jehovah, ary hevero ho toy ny zazakely tiany sy arovany ianao. Tadidio ny fampanantenan’ny Baiboly hoe “ny fiadanan’Andriamanitra, izay mihoatra noho ny fahalalana rehetra, hiaro ny fonareo sy ny hevitrareo ao amin’i Kristy Jesosy.”—Filipiana 4:7.
Mandeha tsikelikely ny fahasitranana, na ara-batana na ara-tsaina na ara-panahy. Tsy mety àry ny manantena fa hanjary hanana fiadanana tampotampoka eo ny olona voa mafy vokatry ny tahotra ny zavatra nanjo azy, rehefa mivavaka. Tena ilaina kosa ny mivavaka tsy tapaka. Hanampy ilay marary mba tsy ho resy sy hanjary hamoy fo izany.
Vakio sy saintsaino ny Tenin’Andriamanitra. Mangataha olona hamaky tantara mampahery ao amin’ny Baiboly ho anao, raha sarotra aminao ny mifantoka. Mety ho azonao vakina ireo andininy mampiseho ny fitiavana sy fiahian’i Jehovah ny mpanompony tsy mivadika, na dia ketraka sy malahelo mafy toy inona aza izy ireo.
Maro ny andininy ao amin’ireo Salamo, nampahery an’i Jane, voatonona teo amin’ireo lahatsoratra teo aloha. Anisan’izany ny Salamo 3:1-8; 6:6-8; 9:9, 10; 11:1-7; 18:5, 6; 23:1-6; 27:7-9; 30:11, 12; 31:12, 19-22; 32:7, 8; 34:18, 19; 36:7-10; 55:5-9, 22; 56:8-11; 63:6-8; 84:8-10; 130:1-6. Aza manandrana mamaky andinin-teny be dia be indray mandeha. Makà kosa fotoana isaintsainana izay vakinao sy ivavahana.
Fahoriana mbola tsy nisy toy izany
Mampalahelo fa tsy tokony hahagaga ny fisian’ny fametavetana, famonoana olona, ady sy herisetra hafa. Nahoana? Satria nolazain’i Jesosy Kristy fa ho anisan’ny mampiavaka ny androntsika ny “haben’ny tsi-fankatoavan-dalàna.” Nilaza koa izy fa “hihamangatsiaka ny fitiavan’ny maro.”—Matio 24:7, 12.
Fahita tato anatin’ny taona vitsivitsy farany ny tahotra vokatry ny zavatra nanjo, ary matetika no vokatr’ireo antony efa nolazain’i Jesosy indrindra. Nolazain’i Jesosy ao amin’ny Matio 24 sy Marka 13 ary Lioka 21 fa hisy ady iraisam-pirenena sy hetraketraky ny natiora sy tsy fankatoavan-dalàna ary tsy fahampiam-pitiavana, amin’ny fotoana faran’ity tontolo ity. Nilaza koa anefa izy fa hisy tsy ho ela ny vahaolana.
Noresahin’i Jesosy aloha ireo zavatra mampahatahotra hitranga maneran-tany sy ny “fahoriana lehibe” hanaraka izany. Mariho anefa izay nolazainy fa tokony hatao: “Miandrandrà, ka asandrato ny lohanareo; fa manakaiky ny fanavotana anareo.” (Matio 24:21-31; Lioka 21:28) Na dia miharatsy aza ny toe-javatra eo amin’izao tontolo izao, dia azontsika antoka ny fiafaran’ny fahoriana lehibe sy ny tontolo miteraka fahoriana ankehitriny. Ho avy aorian’izay ny faran’ny faharatsiana rehetra, ary ho tonga ny tontolo vaovao sy marina.—1 Jaona 2:17; Apokalypsy 21:3, 4.
Tsy tokony ho gaga isika raha efa eo amin’ny fara tampony ny faharatsiana sy ny herisetra vao ho avy ny famonjena antsika. Toy izany koa mantsy ny fitsaran’Andriamanitra ny tontolo tamin’ny andron’i Noa sy ny mponina ratsy toetra tany Sodoma sy Gomora. Mampiseho izay mbola hitranga ireny didim-pitsaran’Andriamanitra taloha ireny.—2 Petera 2:5, 6.
Tsy hisy intsony ny tahotra vokatry ny zavatra nanjo
Mety hanontany tena ianao raha ho afaka ihany ny fahatsiarovana ratsy noho ny tahotra vokatry ny zavatra nanjo anao. Tena azo antoka fa ho afaka izany! Hoy i Jehovah Andriamanitra ao amin’ny Isaia 65:17: “Izaho mahary lanitra vaovao sy tany vaovao, ka dia tsy hotsarovana intsony ny taloha, na ho mby ao an-tsaina akory aza.” Manome toky antsika io andininy io fa tsy ho afaka hanelingelina antsika intsony ny voka-dratsin’ny zavatra nampahatahotra niainantsika, indray andro any, na dia toa tsy mety miala aza izany izao.
Mpisava lalana (Vavolombelon’i Jehovah mitory manontolo andro) izao i Jane, herintaona mahery taorian’ilay nisy saika hametaveta azy. “Efa vita ny fitsarana ary voaheloka ilay nanafika ahy, valo volana mahery tatỳ aoriana, izay vao niverina tamin’ny laoniny ny fiainako”, hoy izy vao haingana. “Tsy azoko an-tsaina akory tamin’ny herintaona ny filaminana sy fahasambarana hitako izao. Misaotra an’i Jehovah aho noho ny fanantenana mahafinaritra ny hisian’ny fiainana mandrakizay sy ny fahafahana hampahafantatra izany fanantenana izany amin’ny olon-kafa.”—Salamo 27:14.
Mety hanampy anao koa izany fanantenana izany, raha kivy sy simba ara-pihetseham-po noho ny tahotra vokatry ny zavatra nanjo anao ianao.
[Sary, pejy 8]
Manampy anao ny fanatrehana fivoriana kristianina
[Sary, pejy 9]
Manatanjaka anao ny famakiana ny Tenin’Andriamanitra sy ny vavaka
[Sary, pejy 10]
Efa ho anisan’ny lasa ny tahotra rehetra