Tranombakoka Malaza Niova Endrika
AVY AMIN’NY MPANORATRA NY MIFOHAZA! ANY GRANDE-BRETAGNE
Ny British Museum any Londres no tranombakoka malaza resahina eto. Efa ho enina tapitrisa ny olona mitsidika azy io isan-taona. Nitombo avo roa heny teo ho eo ny haben’ny toerana misy azy io, tokony ho herintaona izay, mba handraisana izany vahoaka be izany. Ahoana no netezan’izany?
Tamin’ny 1759 no nisokatra ho an’ny besinimaro ny British Museum sy ny fitahirizam-bokiny. Vita tamin’ny 1852 ilay trano misy azy roa ireo. Nafindra tao amin’ny trano vaovao tsy lavitra teo anefa ilay fitahirizam-boky, antsoina hoe Tranomboky Britanika, tamin’ny 1997. Nafindra tany koa àry ny boky 12 tapitrisa sy ny sora-tanana ary ny antontan-taratasy an’aliny maro voamarin’ny fitomboky ny fanjakana na ny tompony. Io fifindran-toerana io no nahafahana nanitatra ny British Museum, satria nosokafana ho an’ny besinimaro amin’izay ilay efitrano malalaka tsy azo nidirana nandritra ny 150 taona!
Ny Efitra Famakiam-boky no tena nahasarika ny olona tao amin’io efitra malalaka antsoina hoe Efitrano Lehibe, manana valindrihana boribory io. Toerana nety tsara ho an’ny mpikaroka io efitra io hatramin’ny nisokafany tamin’ny 1857, satria sady nangina no nilamina. Niasa tao amin’io tranomboky manan-tantara io, ohatra, ny olo-malaza toa an-dry Mohandas Gandhi sy Charles Darwin ary Karl Marx. Sambany vao azon’ny besinimaro nidirana io efitra io. Voatahiry ao ankehitriny ny bokin’ilay tranombakoka miisa 25 000.
Nohavaozina ilay valindrihana boriborin’io efitra manan-tantara io. Tena kanto dia kanto izao ny valindrihana 800 taonina, manarona ilay Efitrano Lehibe misy ny Efitra Famakiam-boky. Fitaratra telozoro 3 312 napetaka tamin’ny vy no nanaovana azy io, ary nampitovina tsara tamin’ny ordinatera ny refin’ny telozoro tsirairay.
Misy ordinatera izao ao amin’io Efitra Famakiam-bokin’ny British Museum io, mba hijerena ireo boky sarobidy an’arivony maro. Tena sangan’asa ireo trano nohavaozina ireo, hoy ny gazety Ny Fotoana. Tena miombon-kevitra amin’izany ny mpitsidika!
[Sary nahazoan-dalana, pejy 27]
Ambony afovoany sy ambany: Copyright The British Museum Ny hafa: Copyright Nigel Young/The British Museum