Ny Fiheveran’ny Baiboly
Iza moa i Mikaela Arikanjely?
MILAZA ny Baiboly fa misy anjely an-tapitrisa any amin’ny tsy hita maso any. (Daniela 7:9, 10; Apokalypsy 5:11) Misy andinin-teny an-jato ao amin’ny Soratra Masina iray manontolo, miresaka momba ny anjely tsy nivadika tamin’Andriamanitra. Roa amin’ireo zavaboary ara-panahy ireo monja anefa no voatonona anarana. Ny anjely Gabriela ny iray. Nitondra hafatra avy tamin’Andriamanitra ho an’ny olona telo samy hafa izy, tao anatin’ny 600 taona teo ho eo. (Daniela 9:20-22; Lioka 1:8-19, 26-28) I Mikaela no anjely hafa voatonona anarana ao amin’ny Baiboly.
Miharihary fa anjely miavaka i Mikaela. Voalazan’ny bokin’i Daniela, ohatra, fa niady tamin’ny demonia i Mikaela, mba hiarovana ny vahoakan’i Jehovah. (Daniela 10:13; 12:1) Milaza ny taratasy ara-tsindrimandry nosoratan’i Joda fa, niady tamin’i Satana i Mikaela, rehefa nifanditra momba ny fatin’i Mosesy izy ireo. (Joda 9) Asehon’ny bokin’ny Apokalypsy fa niady tamin’i Satana sy ireo demoniany i Mikaela, ary nanjera azy ireo avy tany an-danitra. (Apokalypsy 12:7-9) Tsy misy anjely hafa voalaza fa manana hery sy fahefana lehibe toy izany eo amin’ny fahavalon’Andriamanitra. Tsy mahagaga àry raha antsoin’ny Baiboly hoe “arikanjely” i Mikaela, satria midika hoe “lehibe” ilay tovona grika nadika hoe “arik.”
Ilay adihevitra momba an’i Mikaela
Tsy mitovy hevitra ireo fivavahana ao amin’ny Kristianisma Anarana sy ny Jodaisma ary ny Silamo raha mahakasika ny anjely. Tsy mazava tsara ny fanazavana sasany. Nilaza toy izao, ohatra, ny Rakibolana Vatofantsika Momba ny Baiboly (anglisy): “Mety hisy anjely ambony indrindra iray monja sy/na antokona arikanjely vitsivitsy (mazàna efatra na fito).” Araka ny Rakibolam-panjakana Momba ny Baiboly (anglisy), ny hoe Mikaela dia “anarana zavaboary iray mahery noho ny olombelona. Nisy hevitra roa nifanohitra momba azy amin’ny ankapobeny: Ny iray dia hoe izy no Jesosy Kristy Tompo, Zanak’Andriamanitra, ary ny iray kosa dia hoe iray amin’ireo antsoina hoe arikanjely fito izy.”
I Gabriela, Jeremiela, Mikaela, Ragoela, Rafaela, Sariela ary Oriela ireo arikanjely fito ireo, araka ny lovantsofina jiosy. Ny Silamo kosa mino arikanjely efatra, dia i Jibrila, Mikala, Izraila ary Israfila. Mino arikanjely efatra koa ny Fivavahana Katolika, dia i Mikaela, Gabriela, Rafaela, ary Oriela. Inona no lazain’ny Baiboly? Misy arikanjely maromaro ve?
Ny valin-tenin’ny Baiboly
Tsy miresaka arikanjely hafa ankoatra an’i Mikaela ny Baiboly, ary tsy mampiasa ny teny hoe “arikanjely” amin’ny teny milaza maro koa. Nampiasa mpanoritra anarana voafaritra ny Soratra Grika tany am-boalohany, ao amin’ny Joda 9. Midika izany fa i Mikaela ihany no mitondra io anarana io. Mety àry ny hanatsoahana hevitra fa iray amin’ireo zavaboary any an-danitra, ary iray monja, no nomen’i Jehovah Andriamanitra fahefana feno eo amin’ny anjely hafa rehetra.
Olona mahatoky iray monja, ankoatra ny Mpamorona, no voalaza fa manana fahefana amin’ny anjely, dia i Jesosy Kristy. (Matio 13:41; 16:27; 24:31) Niresaka mazava tsara momba an’i “Jesosy Tompo” sy ny “anjelin’ny heriny” ny apostoly Paoly. (2 Tesaloniana 1:7) Hoy koa i Petera momba an’i Jesosy nitsangana tamin’ny maty: “Izay eo amin’ny tànana ankavanan’Andriamanitra; fa efa lasa ho any an-danitra Izy ka efa nampanekena Azy ny anjely sy ny fahefana ary ny hery.”—1 Petera 3:22.
Na dia tsy milaza mivantana aza ny Baiboly hoe i Jesosy no Mikaela arikanjely, dia misy andinin-teny iray mampiseho fa manao ny asan’ny arikanjely izy. Naminany toy izao ny apostoly Paoly, ao amin’ny taratasiny ho an’ny Tesalonianina: “Ny tenan’ny Tompo no hidina avy any an-danitra amin’ny fiantsoana sy ny feon’ny arikanjely ary ny trompetran’Andriamanitra, ka izay maty ao amin’i Kristy no hitsangana aloha.” (1 Tesaloniana 4:16) Asehon’io andinin-teny io fa nandray fahefana i Jesosy, ilay Mesia Mpanjakan’Andriamanitra. Manana “feon’arikanjely” anefa izy. Mariho koa fa manan-kery hanangana ny maty izy.
Nanangana olona maromaro tamin’ny maty i Jesosy, fony izy olombelona teto an-tany. Nampiasainy hanaovana fiantsoana ny feony tamin’izany. Izao, ohatra, no nolazainy rehefa natsangany tamin’ny maty ilay zanakalahin’ilay mpitondratena tany Naina: “Ry zatovo, hoy Izaho aminao: Miarena.” (Lioka 7:14, 15) Tatỳ aoriana, talohan’ny nananganan’i Jesosy an’i Lazarosy sakaizany, dia “niantso tamin’ny feo mahery [izy] hoe: Ry Lazarosy, mivoaha!” (Jaona 11:43) Feon’olombelona lavorary anefa no nananan’i Jesosy tamin’ireny fotoana ireny.
‘Nasandratra’ ho zavaboary ara-panahy tany an-danitra i Jesosy, taorian’ny nitsanganany tamin’ny maty. (Filipiana 2:9) Manana feon’arikanjely izy satria tsy olombelona intsony. Rehefa naneno àry ny trompetran’Andriamanitra, ka niantso an’ireo “izay maty ao amin’i Kristy” mba hiakaran’izy ireo any an-danitra, dia “feon’arikanjely” indray no nanaovan’ i Jesosy “fiantsoana.” Mety àry ny hanatsoahana hevitra fa arikanjely ihany no afaka miantso amin’ny “feon’ny arikanjely.”
Eny, misy anjely hafa ambony, toy ny serafima sy ny kerobima. (Genesisy 3:24; Isaia 6:2) Milaza anefa ny Soratra Masina fa i Jesosy Kristy nitsangana tamin’ny maty no lehiben’ny anjely rehetra. Izy no Mikaela arikanjely.