Mihainoa ary Mianara

“NY ZAVATRA henontsika no nahazoantsika ny 85 isan-jaton’ny fahaizantsika”, hoy ny tatitra tao amin’ny gazety Ny Kintan’i Toronto (anglisy). Mandany ny ankamaroan’ny fotoanantsika hihainoana isika, nefa miriorio saina, na variana tanteraka amin’ny zavatra hafa, na manadino ny 75 isan-jaton’izay rentsika. Asongadin’ireo antontan’isa manaitra ireo fa mila manatsara ny fahaizantsika mihaino isika.

Hoy ilay tatitra: “Mahatonga ny maro amin’ireo olana eo amin’ny fiaraha-monina ny tsy fahaizana mihaino tsara.” Heverin’i Rebecca Shafir, manam-pahaizana momba ny fitenenana sy ny fampitan-kevitra, fa ny tsy fihainoana tsara matetika no anisan’ny mahatonga ny famonoan-tena, herisetra any an-tsekoly, faharavan’ny fianakaviana, ary fidorohana zava-mahadomelina.

Hitan’ny manam-pahaizana momba ny fiaraha-monina fa samy manana ny fomba fihainoany ny olona. Ny momba ny olona no mahaliana ny sasany, ka te hahafantatra ny tsipiriany rehetra tamin’ny zava-nitranga iray izy. Ilay zava-nitranga kosa no mahaliana ny hafa, ka ny votoatiny avy hatrany no tiany ho re. “Mety tsy hahay hifampiresaka tsara, noho izany, ny olona te hahafantatra momba ny olona sy ireo te hahafantatra izay nitranga”, hoy ny gazety Ny Kintan’i Toronto.

Misy antony tsara matoa i Jesosy nanamafy ny ilana ‘hitandremana ny [fomba] fihainoana.’ (Lioka 8:18) Fahalalam-pomba ny fihainoana tsara. Zava-dehibe izy io mba hampety tsara ny resaka. Anisan’ny fanoloran-kevitra mahasoa, rehefa mihaino olona miresaka, ny hoe: Tsy mampiriorio ny saina, aroso kely ny loha, aseho hoe mifantoka amin’izay lazain’ilay olona ka mijery azy tsara sady mihatokatoka. Tsy maintsy miezaka ny hihaino tsara hatrany isika rehetra, satria avy amin’izany no ahaizantsika ny ankamaroan’ny zavatra ianarantsika.