Tongava Hihaino Ilay Lahateny hoe:

“Eo Am-piovana ny Sehatr’ity Tontolo Ity”

MIKORONTANA IZAO NY FIAINANA. Toa misy fisehoan-javatra lehibe mitranga tsy an-kijanona maneran-tany. Efa mba nahatsiaro ho very hevitra ve ianao satria miova haingana be mihitsy ny zava-drehetra manodidina anao?

Manao fanamarihana tena tsara momba ny toe-javatra iainan’ny olombelona ny Baiboly ka milaza hoe: “Mandalo ny fanaon’izao fiainana izao”, na araka ny dikan-teny tany am-boalohany, dia hoe: “Eo am-piovana ny sehatr’ity tontolo ity.” (1 Korintiana 7:31) Ny apostoly Paoly no nanoratra ireo teny ireo. Nampitahainy tamin’ireo fampisehoana miovaova eo ambony sehatry ny teatra, ny zava-miseho maneran-tany. Niovaova hatrany ny mpitondra sy ny olona nitondra zava-baovao teo amin’ny sehatr’izao tontolo izao, nandritra ny tantara manontolo. Toa mihafaingana anefa izany fiovana izany ankehitriny, indrindra nanomboka tamin’ny 1914, izay taona tena niavaka.

Fantatrao ve anefa fa midika ho vaovao tsara ho an’ny olombelona koa ireny korontana maneran-tany ireny, eny fa na dia ireo niseho vao haingana aza? Porofoin’izy ireny tokoa fa hihatsara tsy ho ela ny sehatr’ity tontolo ity. Efa ela ny Baiboly no nilaza fa hisy korontana be ankehitriny. Hazavainy koa fa vao fiandohana fotsiny izy ireny, fa mbola hisy fiovana tena lehibe hisy fiantraikany eo amin’ny olombelona rehetra. Mety hampahatahotra ilay izy, nefa tena vaovao faran’izay tsara ho an’ny olona tsara fanahy maneran-tany. Hiova ny sehatr’ity tontolo ity ka hilamina sy ho sambatra ny olombelona.

Tianao ve ny hahalala bebe kokoa momba ireo fiovana ireo sy ny fanazavan’ny Baiboly azy ireo? Asaina amim-pitiavana ianao hanatrika ilay lahateny ho an’ny besinimaro hoe “Eo Am-piovana ny Sehatr’ity Tontolo Ity.” Atao any amin’ny fivoriamben’ny vondrom-paritry ny Vavolombelon’i Jehovah manomboka amin’ity volana ity, izy io. Atao any amin’ny toerana an-jato maneran-tany io fivoriambe io. Raha te hahafantatra ny toerana anaovana ny fivoriambe akaiky anao indrindra ianao, dia anontanio, aza fady, ny Vavolombelon’i Jehovah any amin’ny manodidina anao na jereo ny gazety Ny Tilikambo Fiambenana 15 Febroary 2002, naman’ity gazety ity.

[Sary, pejy 32]

Ravan’ny baomba ataomika i Hiroshima tamin’ny 1945

[Sary nahazoan-dalana]

USAF photo

[Sary, pejy 32]

Nianjera ny Rindrin’i Berlin tamin’ny 1989

[Sary nahazoan-dalana]

AP Photo/Lionel Cironneau

[Sary, pejy 32]

Notafihin’ny mpampihorohoro ny Foibe Ara-barotra Iraisam-pirenena tany New York tamin’ny 2001