Avy Amin’ny Mpamaky

Andro Fampakaram-bady Tena tiako be ilay andian-dahatsoratra hoe “Ataovy Fiandohana Mahafinaritra ny Andro Fampakaram-bady.” (8 Febroary 2002) Tanora aho, ka manomana ny saiko amin’ilay dingana lehibe, dia ny fanambadiana. Nanampy ahy iny lahatsoratra iny hahafantatra hoe inona no atao mba tsy handreraka sy hanahiran-tsaina toy ny an’ny tanora maro ny fanomanana mariazy, ary inona no atao raha te ho sambatra foana ny mpivady. Miangavy aho mba tsy hohadinoinareo mihitsy ireo miezaka mafy manao izay takin’i Jehovah amin’ny mpanompony.

F. C., Italia

Gaga foana aho satria amin’ny fotoana tena ilako izany no manome tari-dalana i Jehovah. Toy izany mihitsy ny Mifohaza! 8 Febroary 2002. Efa volana vitsivitsy izao, izahay sy ny fofombadiko no mikarakara ny mariazinay, ka samy manomboka ho kizitina izahay. Nampahatsiahy anay ilay andian-dahatsoratra hoe tena tsara ny fanomanana am-bolana mialoha. Mankarary fo fotsiny koa ny fanahiana.

H. M., Aostralia

Te hilaza ianareo ao amin’ny pejy faha-10 amin’iny andian-dahatsoratra iny, fa mahazo misintaka ny lehilahy raha heveriny fa manana antony marim-pototra izy. Izahay mivady anefa mahita fa tsy miresaka an’izany ny Baiboly. Toa ny mifanohitra amin’izany kosa aza no lazainy, dia hoe ny vehivavy no mahazo misintaka, fa tsy ny lehilahy. Milaza ny Genesisy 2:24 fa tokony “hikambana amin’ny vadiny” ny lehilahy. Milaza koa ny 1 Korintiana 7:11 fa na dia efa niala aza ny vavy, dia ‘ny lahy kosa aoka tsy hiala amin’ny vavy.’

K. L., Aostralia

Mamaly ny “Mifohaza!” hoe: Tsy maintsy dinihina ny teny manodidina rehefa mamaky ny Genesisy 2:24. Tsy natao ampiharina raha sendra misy fisarahana akory io toromarik’Andriamanitra io. Mampiseho mazava tsara ny taratasin’i Paoly ho an’ny Korintianina fa sarobidy amin’i Jehovah ny fanambadiana, ary tokony hiezaka mafy hiaro ny fanambadiany ny mpivady. Toa tsy nieritreritra ny hamorona fitsipika roa samy hafa anefa i Paoly ao, izany hoe iray ho an’ny vehivavy ary iray hafa ho an’ny lehilahy. Eo amin’ny andininy faha-10 sy 11, dia samy ampirisihina mba tsy hisintaka na ny lehilahy na ny vehivavy, raha mbola azo atao koa. Mazava àry, fa izay fitsipika mihatra amin’ny vehivavy dia ho azo ampiharina amin’ny lehilahy koa.