Tsy Maty Tamin’ny Asan’ny Mpampihorohoro tao Mumbai

AVY AMIN’NY MPANORATRA NY MIFOHAZA! ANY INDE

MISY mponina 18 tapitrisa mahery ao amin’ny tanànan’i Mumbai (Bombay taloha), ary tsy mitsaha-mitombo io isa io. Ny enina na fito tapitrisa amin’izy ireo no mandeha lamasinina isan’andro, rehefa hiasa, na hianatra, na hiantsena, na hijerijery tanàna. Betsaka ny lamasinina mivezivezy mampitohy an’i Mumbai amin’ny manodidina azy, ary mandeha mafy izy ireny. Misy vagao sivy ny lamasinina iray, ary olona 1 710 no tokony ho zakany. Manao taingim-be anefa izy ireny amin’ny fotoana maha be ny mpandeha, ka mahatratra 5 000 ny olona entiny. Tamin’ny fotoana toy izany indrindra no nanafihan’ny mpampihorohoro ny lamasinina tao Mumbai, tamin’ny 11 Jolay 2006. Tsy ampy fahefatr’adiny akory, dia baomba fito no nipoaka tao anatin’ny lamasinina samy hafa, teo amin’ny lalamby mampitohy ny faritra andrefana. Maherin’ny 200 no maty ary mihoatra ny 800 no naratra.

Misy fiangonan’ny Vavolombelon’i Jehovah 22 ao Mumbai sy ny manodidina azy. Mpandeha lamasinina ny maro aminy, ary sendra tao anatin’ireo lamasinina nisy nanafika. Soa ihany fa tsy nisy namoy ny ainy izy ireo, saingy maromaro kosa no naratra. Handeha hody avy niasa i Anita tamin’izay. Feno hipoka ilay lamasinina nandehanany, ka nijoro teo akaikin’ny varavaran’ny vagao ho an’ny mpandeha sokajy voalohany izy, amin’izay mba mora miala. Tampoka teo dia nisy zavatra nipoaka be, raha mbola nandeha mafy be iny ilay lamasinina. Feno setroka mainty ilay vagao nisy an’i Anita. Nitsirika teo am-baravarana izy, ka nitodika niankavanana. Hitany fa nikipaka ny rindrin’ilay vagao tao ambadika, sady nikirazorazo. Tsiravina izy nahita fatin’olona sy rantsambatana nipitika teny ivelany sy nilatsaka teo amin’ny lalamby. Vetivety dia nijanona ilay lamasinina, nefa toy ny 100 taona izany tamin’i Anita. Nitsambikina teny amin’ny lalamby izy sy ny mpandeha hafa, ary nihazakazaka lavitra an’ilay lamasinina. Nitelefaonina an’i John vadiny tamin’ny finday i Anita avy eo, ary soa ihany fa nahazo azy. Vetivety taorian’izay mantsy dia tototra ny zotram-pifandraisana tao Mumbai noho ny antso nataon’ireo olona nitebiteby. Tony ihany i Anita, fa raha vao nahazo ny vadiny izy, dia nitomany. Notantarainy taminy ny zava-nitranga, ary nasainy naka azy izy. Nirotsaka ny orana raha mbola teo am-piandrasana izy, hany ka voafafa ny ankamaroan’ny porofo mety ho nanampy ny mpanao fanadihadiana.

Niala aloha tany am-piasana i Claudius, Vavolombelon’i Jehovah hafa iray, tamin’io andro io. Nandray ny lamasinina miainga amin’ny dimy sy fahatelony tao amin’ny Garan’i Churchgate izy. Ao no faran’ny zotra mampitohy ny faritra andrefana. Niditra tao amin’ny vagao ho an’ny mpandeha sokajy voalohany i Claudius. Nitady toerana izy, satria adiny iray eo ho eo vao ho tonga any amin’ny garan’i Bhayandar. Tamin’izay izy no nahita an’i Joseph, izay anisan’ny fiangonana tsy lavitra teo. Nifanontany vaovao teo izy mirahalahy, ka nandeha haingana ny fotoana. Natory i Joseph avy eo, fa reraky ny asa. Feno be ilay lamasinina, ka nitsangana hamonjy varavarana i Claudius, teo amin’ny fijanonana alohan’ilay tena tokony hialany. Nifoha i Joseph tamin’izay, ary nitodika hanao veloma azy. Sady nihazona ny vy tamin’ilay seza i Claudius, no niondrika namaly an’i Joseph. Izay angamba no tsy nahafaty azy. Tampoka teo mantsy dia nisy nidridroka be. Nihozongozona mafy ilay vagao ary lasa feno setroka, ka tsy nifankahitana tao anatiny. Nidaraboka teo amin’ny lalantsara i Claudius. Naneno be ny sofiny ka toa tsy nahare na inona na inona intsony izy. Lavaka be sisa no teo amin’ilay toerana nijoroany. Nipitika teny amin’ny lalamby ny olona nijoro teo akaikiny, na maty nitsitra teo amin’ny lalantsara. Velona soa aman-tsara kosa i Claudius, na dia tao amin’ny lamasinina nisy azy aza ny fahadimy tamin’ireo baomba fito nipoaka tamin’io talata nahitan-doza io.

Nentina tany amin’ny hopitaly i Claudius. Feno ra ny akanjony. Ran’olon-kafa tsy mba avotra toa azy anefa ny ankabeazany. Tsy dia voa mafy izy: vaky ny ampongantsofiny, ary nisy may ny tanany ilany sy ny volony. Nifankahita tamin’i Joseph sy Angela mivady izy tany amin’ny hopitaly. Tao amin’ny vagao natokana ho an’ny vehivavy, teo anilan’ilay nisy azy roa lahy, no nisy an’i Angela, saingy mba tsy naninona izy. Ny an’i Joseph kosa, ny masony havanana no mangana ary tsy nandre intsony izy. Nisaotra an’i Jehovah ireo Vavolombelona telo ireo, noho izy ireo tsy maty fo aman’aina. Nilaza i Claudius fa raha vao nahatsiaro tena izy, dia nieritreritra hoe: ‘Tena tsy misy dikany tokoa ny fikatsahana vola aman-karena, rehefa eritreretina hoe ao anatin’ny indray mipy maso dia mety hafoinao ny ainao!’ Faly izy fa ny fifandraisany amin’i Jehovah Andriamaniny no nataony ho zava-dehibe indrindra teo amin’ny fiainany!

Nisesisesy tao Mumbai ny tondra-drano sy ny rotaka ary ny baomba nipoaka. Mbola be zotom-po foana anefa ireo Vavolombelona 1 700 mahery ao amin’io tanàna io. Mitory tsy tapaka izy ireo, mba hampahafantarana amin’ny mpiara-monina aminy fa ho avy ny tontolo vaovao tena tsara, izay tsy hisian’ny herisetra intsony.—Apokalypsy 21:1-4.

[Teny notsongaina, pejy 23]

Lavaka be sisa no teo amin’ilay toerana nijoroany

[Sary, pejy 23]

Anita

[Sary, pejy 23]

Claudius

[Sary, pejy 23]

Joseph sy Angela

[Sary nahazoan-dalana, pejy 22]

Sebastian D’Souza/AFP/Getty Images