Avotra Ilay Zaza Noho ny Mifohaza!

● Nanan-janaka telo i Anita,a any Meksika. Mbola bevohoka indray anefa izy. Nilaza tamin’ny vadiny izy fa tsy te hiteraka intsony, ka tsy maintsy hesoriny io zaza io. Nilaza mihitsy aza izy hoe hamono tena! Nianatra Baiboly tamin’ny Vavolombelon’i Jehovah izy tamin’izany, saingy tsy dia nivaky loha. Hoy izy: ‘Nohamaivaniko ny fianarako.’

Nohazavain’ilay Vavolombelona taminy ny toro lalan’ny Baiboly momba ny fanalana zaza. Noresahiny, ohatra, fa masina amin’Andriamanitra ny ain’ny zaza ao am-bohoka. Fahiny, dia meloka ho namono olona izay nandratra vehivavy bevohoka ka nahafaty ilay reny na ny zanany. (Eksodosy 21:22, 23)b Tsy niraharaha anefa i Anita, satria efa tapa-kevitra ny hanala zaza.

Hoy i Anita: “Nisy nanoro ahy tsindrona mahafa-jaza. Novidiko ilay izy ary nasaiko natsindron’ny namako tamiko. Tsy nisy vokany akory anefa ilay tsindrona. Hay nosoloany rano ilay izy, satria tsy te hiray tsikombakomba tamiko izy.”

Mbola nitady tetika ihany anefa i Anita. Nahita dokotera nanaiky hanala ilay zaza izy, rehefa efa-bolana ny kibony. Enina andro talohan’ny hankanesany tany, dia nanome azy lahatsoratra iray nalaina tao amin’ny Mifohaza! (frantsay) 22 Aogositra 1980 ilay Vavolombelona. “Diarin’ny Zaza Iray ao Am-bohoka” no lohateniny, ary izao no teny famaranana tao: “Novonoin’i Neny aho androany.” Tsy tantin’i Anita ireo teny ireo, ka nitomany be izy. “Nahatonga saina ahy io lahatsoratra io”, hoy izy.

Tera-bavy i Anita, ary salama tsara ilay izy. Hoy izy: “Tena faly aho izao mahalala an’i Jehovah. Tiako amin’ny foko manontolo izy.” Ampianariny Baiboly koa ilay zanany vavy mba ho tia an’i Jehovah. Miaiky io zanany io hoe: ‘Tsy nisy aho raha tsy teo Andriamanitra. Izy mantsy no nanome aina ahy. Nanavotra ahy koa ny Mifohaza!, izay misy fampianarana avy ao amin’ny Teniny.’

[Fanamarihana ambany pejy]