Ny Soavalikelin’i Shetland, Biby Malefaka Nefa Matanjaka

● Hahita azy io ianao raha mankany amin’ireo Nosy Shetland, any avaratratsinanan’i Ekosy. Avy ao mihitsy io soavaly io, araka ny hita amin’ny anarany. Nihady tany tao Shetland ny mpikaroka ka nahita taolan’io karazan-tsoavaly io. Hitan’izy ireo tamin’izany fa efa an’arivony taona lasa no nisian’izy io.

Mora fantatra ny soavalikelin’i Shetland. Fohy ny tongony, ary lava ny rambony sy ny volo eo amin’ny hatony. Matevim-be koa ny volony, ka miaro azy amin’ny hatsiaka. Eo anelanelan’ny 70 santimetatra sy 1,07 metatra ny haavony, ary mainty na volontany antitra no lokony matetika. Izay no tena farany haavony, nefa misy maningana ihany ka mahatratra 1,17 metatra.

Matanjaka io soavaly io na dia kely aza. Io no matanjaka indrindra amin’ny soavaly, raha jerena amin’ny habeny. Noho izany, dia nampiasaina izy ireny taloha mba hitaona zezika, na hiasa tany. Nisy koa nampiasaina tany amin’ny toerana fitrandrahana arintany, satria biby kelikely ihany no afaka mitsofoka any anaty tionelina ambanin’ny tany. Maro amin’izy ireny no nijanona tany amin’ireny toerana ireny mandra-pahafatiny, ka tsy nahita ny hazavan’ny masoandro mihitsy.

Malefaka sady mora mankatò ny soavalikelin’i Shetland rehefa voafolaka tsara, ka tena mety amin’ny ankizy. Nampiasaina hanampiana ny kilemaina koa izy ireo, ary noho ilay toetrany mahafinaritra angamba no nahatonga izany hisy vokany tsara.

Noho ilay toetrany mahatehotia, sy noho izy mora zatra amin’ny toerana samy hafa be, dia lasa be mpitia io soavaly io, ka naondrana any amin’ny toerana maro eran-tany. Betsaka koa ny fikambanana natsangana ho an’ny olona tia azy ireny. Ilay nosy niaviany anefa no tena tsaroana amin’ny anaran’io biby io. Tena salama ny soavalikelin’i Shetland any, ary tsy mba ampivadina amin’ny karazan-tsoavaly hafa.

[Sary, pejy 24]

Ny soavalikelin’i Shetland no matanjaka indrindra amin’ny soavaly, raha jerena amin’ny habeny

[Sary nahazoan-dalana, pejy 24]

© S Sailer/A Sailer/age fotostock