“Ny Marina Hanafaka Anareo”!

MARINA foana ireo tenin’i Jesosy Kristy ireo, izay voalaza ao amin’ny Jaona 8:32. Manafaka antsika amin’ny finoanoam-poana ny fahamarinana ao amin’ny Baiboly, sady manafaka antsika amin’ireo fanao manimba tsy ankasitrahan’Andriamanitra. Manavesatra ireo fombafomba atao amin’ny Krismasy. Manafaka ny olona anefa ny fahamarinana ara-baiboly, araka ireto fitantarana avy any amin’ny tany samihafa ireto.

Manafaka ny fahamarinana ara-baiboly

Arzantina Hoy i Oscar: “Tsy manana olana momba ny fihinanana sy fisotroana tafahoatra intsony izao ny fianakavianay, ary tsy lany vola mividy fanomezana tsy takatry ny volanay.”

Tena nahatsiaro ho maivamaivana koa i Mario, rehefa nampahafantarina azy ny “lainga momba ny Krismasy”, araka ny niantsoany azy. Hoy izy: “Faly aho satria afaka mampiseho fankasitrahana sy manao fanomezana amin’izay fotoana tiako hanomezana sy amin’izay fotoana hananako vola.”

Kanada Hoy i Elfie: “Tena tia manome sy mandray fanomezana aho. Tsy tiako anefa ny fanomezana tsy vokatry ny fo fa terena. Nahatsiaro ho maivamaivana erỳ izahay tao an-trano rehefa tsy nankalaza Krismasy intsony!”

Hoy koa i Ulli, zanakavavin’i Elfie: “Faly izahay rehefa tsy nankalaza Krismasy intsony i Dada sy Neny. Nanome fanomezana sy nampiala voly anay tamin’ny fotoana tsy nampoizinay mantsy izy ireo. Rehefa nanontany anay ny mpiara-mianatra taminay hoe fa nahoana izahay no nahazo fanomezana, dia namaly izahay hoe: ‘Mba te hanome fotsiny i Dada sy Neninay!’ Na izany aza, dia tsy mora tamin’i Dada sy Neny ny nanaraka ny fahamarinana, satria nenjehin’ny fianakaviana ry zareo. Tsy nilefitra anefa izy ireo, ary tapa-kevitra hampifaly an’i Jehovah. Nisy vokany lehibe tamiko izany.”

Nilaza koa i Silvia hoe “maivamaivana erỳ” izy, rehefa tsy nankalaza Krismasy intsony. Hoy izy: “Tena faly aho satria fantatro hoe mampifaly an’i Jehovah Andriamanitra. Tsy ho faly hoatr’izany mihitsy aho, na dia hankalaza Krismasy an’arivony aza!”

Kenya Hoy i Peter: “Nindrana vola be aho tamin’izaho mbola nankalaza Krismasy, mba hahafahako mividy fanomezana sy manao sakafo be. Voatery nanao asa fanampiny aho, ka tsy dia niaraka tamin’ny fianakaviako. Faly be aho afaka tamin’izany!”

Hoy i Carolyne: “Manome fanomezana ho an’ny namako sy ny fianakaviako aho amin’izay fotoana tiako hanaovana izany, ary omen’izy ireo fanomezana koa. Fanomezana vokatry ny fo sy tsy ampoizina hoatr’izany no hitako hoe tsara indrindra.”

Japon Nanoratra i Hiroshi sy Rie vadiny hoe: “Tsy mba miandry homena fanomezana ny zanakay. Tsy ataony tsinontsinona koa anefa izay fanomezana omena azy. Faly izahay satria fantatr’izy ireo hoe tokony ho vokatry ny fo ny fanomezana.”

Hoy ny vehivavy iray atao hoe Keiko: “Nanao Krismasy izahay taloha. Nasianay fanomezana teo akaikin’ny fandrianan’ny zanakay lahy, rehefa azonay antoka hoe natory izy. Nilazanay izy rehefa maraina hoe: ‘Nitondran’i Dadabe Noely fanomezana ianao, satria hendry tsara!’ Nianatra ny marina momba ny Krismasy anefa aho tatỳ aoriana, ka nampahafantariko ny zanako hoe lainga daholo ireny rehetra ireny. Taitra be izy ary nitomany. Tsapako tamin’izay fa na dia aseho ho toy ny zavatra tsara aza ny Krismasy, dia tsy tsara mihitsy. Lainga ilay izy, ka tsapako hoe namitaka ny zanako aho.”

Philippines Hoy i Dave: “Tsy ho voasoratro eto ny hafaliana tsapanay mianakavy, rehefa nampahafantarin’i Jehovah anay ny fahamarinana ao amin’ny Baiboly. Tsy manantena tambiny izahay rehefa manome fanomezana, ary ataonay amin’ny fo izy ireny.”

Vitsivitsy monja amin’ireo olona an-tapitrisany nafahan’ny fahamarinana ao amin’ny Baiboly ireo. Tsy vitan’ny hoe manafaka anefa izy io. Mampifaly ny fon’Andriamanitra koa isika, rehefa miaina mifanaraka amin’io fahamarinana io. (Ohabolana 27:11) Hoy i Jesosy Kristy: ‘Hivavaka amin’ny Ray araka ny fanahy sy ny fahamarinana ny tena mpivavaka. Fa olona toy izany no tadiavin’ny Ray mba hivavaka aminy.’ (Jaona 4:23) Rehefa mandinika ny fonao àry Andriamanitra, moa ve izy mahita hoe mangetaheta ny fahamarinana ianao? Enga anie ka ho izany tokoa!

[Sary, pejy 9]

Fitiavana no mandrisika ny Kristianina hanome, ary afaka manao fanomezana izy mandritra ny taona